Тексты
Вернуться к списку | редактировать | удалить | Создать новый | Статистика | ? Помощь
Galina Baburova. Gleb Fomin tegihe parahimaks kodikelen opendajaks
Galina Baburova
Gleb Fomin tegihe parahimaks kodikelen opendajaks
вепсский
Младописьменный вепсский
28.–29. sulakud
Petroskoiš mäni "Karjalan Voden opendai – 2026" -konkurs . Erine nominacii konkursal oli tehtud kodikelen opendajiden täht .Vägestuses neciš nominacijas voibištelihe nel’l’ mest .
Konkursan emäižel etapal Petroskoin Suomalaiž-ugrilaižes školas mäniba kodikelen opendajiden ozuteluzurokad .Ühtnikoin oliba karjalan kelen opendai Marina Perttunen Kostomukšaspäi , suomen kelen opendajad Inna Lantratova Petroskoišpäi i Arina Jefimova Präžaspäi da vepsän kelen opendai Gleb Fomin Šokšuspäi .
– Minun ozuteluzurokal oliba eri-igäižed lapsed . Valičin heiden täht "Irdnägo "-teman , mittušt opetas ezmäi nelländes klassas , a sid’ senke süvemba tundištadas jo vanhembiš klassoiš .Nece tem hüvin kožub vändurokan täht , sikš ku vepsäks om lujas melentartušt kuvata ristituiden irdnägod .Lapsed surel tahtol tegeba sanundoid .Urok mäni hüvin , mö lapsidenke äjan vändim .Meletan , miše vändon kävutoitand openduses om lujas tarbhašt , – sanui Gleb .
Gleb Fomin radab Šokšun školas kudenden voden , "Karjalan Voden opendai – 2026" -konkursaha hän ühtni jo toižen kerdan .Ičeze ozuteluzurokaks Gleb zavodi vaumištadas koumes nedališ edel konkursad , eskai vedi ezmäi sidä ičeze openikoidenke .Gleb sanui , miše hänen täht nece tegihe parahimaks kodvindaks edel konkursad .
Ozuteluzurokoiden jäl’ghe opendajil oli völ kaks’ konkursan tegendad : "Pedogogine mastar’-klass " da "Pagištoituz opendajidenke ".
– Kaikuččel konkursan tegendal oli ičeze jügeduz . No ozuteluzurok , paginad ühtesradnikoidenke da lapsiden kazvatajidenke toiba minei hüväd mel’t , – starinoiči Gleb .
Täl vodel "Karjalan Voden opendai – 2026" -konkurs mäni jo 30. kerdan .Kaiked konkursan regionaližehe etapha ühtni 29 opendajad Karjalan 15 rajonaspäi .Konkursan nelläs kodikelen opendajaspäi Gleb Fomin tegihe parahimaks .Regionaližen etapan vägestajad voibištelesoiš "Voden opendai " -konkursal .Nece etap om jo ühthižvenälaine .Se mäneb sügüz’kus Lipeck-lidnas .Gleb jo zavodi vaumištadas sihe .
Gleb Fomin tegihe parahimaks kodikelen opendajaks
вепсский
Младописьменный вепсский