Тексты
Вернуться к списку | редактировать | удалить | Создать новый | Статистика | ? Помощь
Tatjana Berdaševa. Folklori kotih tuotuna
Tatjana Berdaševa
Folklori kotih tuotuna
карельский: собственно карельское наречие
Новописьменный севернокарельский
Kešäkuun
10. päivänä juhlitah Karjalaisien runojen päivyä .Ka mintäh on valittu juuri tämä päivämiärä ?
Še tapahtu Šuomen šuurešša ruhtinaškunnašša , kumpani ennein vallankumoušta vajuan šata vuotta kuulu Venäjän imperijah .Onnakko šielä niise oli raja omine tullineh , ka mi voit piettyä karjalaista mieštä , još hiän tietäy kaikki kiertopolut kuin omat viisi šormie .
Šattu , jotta šuomelaiset järješšyšmiehet-lensmanit otettih kiini laukunkantajie , ka kuiteski še tapahtu ei niin rikeneh , jotta še olis kokonah vienyn halun karjalaisilla käyvä Šuomeh .
Eryähičči piti aštuo yli viisišatua kilometrie – kuin vihmašiällä , niin ni pakkasella .Tietyšti yökši pistäyhyttih omilla oštajilla .A oštajat oltih erilaiset : toičči talonpojat loittosilta huuttoriloilta , a toičči herratki .Ta missä laukunkantajat pistäyhyttih , ni šielä ehottomašti iltasin laulettih runoja !
Juuri näin vanhua šuušanallista runoutta vei kaikista loitommakši koista Akonlahen runonlaulaja Timonen .Häneštä oli kirjutettu ta enšimmäistä kertua julkaistu karjalaisen folklorin näyttehie : kakši loihtuo ta viisi runuo .
Še tapahtu Uusikaarlepyy-kaupunkissa Pohjanlahen rannalla 10. kešäkuuta 1820 piiriliäkärin Sakari Topeliuksen anšijošta .
Topelius oli hyvin kiinnoštun rahvahan runouvešta ta mielelläh otti vaštah laukunkantajie omašša talošša .Sakari kuunteli heitä ta kirjutti runoja vihkoh .Tiijetäh vielä kahen vienankarjalaisen laukunkantajan-runonlaulajan nimet , kumpasilta Sakari Topelius kirjutti : Jyrki Kettunen Čenašta ta Olli Mäkeläinen Vuokkiniemeštä .
Vuosina 1822–1831 Topelius julkaisi karjalaisie runoja viiješšä ošašša , ta niin hiän näytti keryäjillä tien Karjalan runokylih .Myöhemmin šinne läksi kymmenie tutkijie , yksi heistä – Elias Lönnrot , starinamaisen "Kalevalan " luatija .Kirja peruštuu karjalaisih kanšanrunoih !
Karjalaini folklori nyt eläy uutta kiinnoššukšen ualtuo .Kaikkie , mitä aikoinah kerättih tutkijat , nyt uuvveštah tarkaššetah tietomiehet ta innokkahat harraštajat .
Mie onnittelen kaikkie , ketä kiinnoštau karjalaini kulttuuri ta karjalaiset runot , tulijalla Karjalaisien runojen päivällä !
Folklori kotih tuotuna
карельский: собственно карельское наречие
Новописьменный севернокарельский