Тексты
Вернуться к списку | редактировать | удалить | Создать новый | Статистика | ? Помощь
Сидоркин Валерий. Myöštymini juurilla
Сидоркин Валерий
Myöštymini juurilla
карельский: собственно карельское наречие
Новописьменный севернокарельский
Käsityötalošša toimiu
Karjala : Myöštymini juurilla -näyttely .Še on omissettu Venäjän Perehen vuuvvella .
Ekspositijo kertou tašavallan kantakanšojen – karjalaisien , vepšäläisien , pomorien , oneganiemiläisien ta puudožilaisien – käsityön ta koristetaijon piäšuunnista .Näyttelyššä on esitetty kuin vanhoja esinehie ta interjierin korissukšie , kumpasie šiirretäh šukupolvelta toisella ta varovašti šäilytetäh perehissä , niin ni nykyaikasie replikkijä , kumpasie valmissettih muasterit alkuperäsien mallien mukah .
Jo alušša voipi nähä vanhan koššon , kumpasen valmisti viime vuosišualla oneganiemiläini Irina-naini .Nyt še košto šäilyy hänen punukalla Natalja Kuz’minalla .Natalja niise tuli käsityömuasteriksi , ompelou koštoja ta piähisie , luatiu korissukšie .Hänen töitä niise on esillä näyttelyššä .
Näyttelyö jatetah puudožilaisien neiččyjen tyylissä ommelletut pruasniekkapuvut , kumpaset valmisti petroskoilaini disaineri Aleksei Medvedev .Šamoin šielä voit nähä muasterin Jelena Kudr’avtsevan luatima hiäpyyheliina šekä Oksana Hrul’ovan valmissetut naisien piähiset ta korissukšet .
Vepšäläisteema on esitetty vepšäläisien tyylissä ommelletuilla pukuloilla .Kakši niistä valmissettih Šoutjärven kuulusan kanšankuoron artistat , a kolmaš luajittih šoutjärven muasterit L’ubov’ Ivanova , Jelena Kottina ta Irina Išanina .Šanakši , še puku tuanoin otti ošua moskovalaisešša Pohjosen uartehet -kilpailušša ta šai kolmannen šijan .
Taitokolledžin opaštuja Marina Kukšegorova esitti heti kakši vepšäläistä hiäpukuo – miehen ta naisen .
Šamoin näyttelyššä voit nähä 90 vuotta takaperin luajittu merkattu käsipaikka ta korisseltu värttinä vuuvelta 1895.
Pomorien kanšantaijošta muissuttau Fedosija Svinjinan 80 vuotta takaperin ommeltu tilkkutäkki , kummaista nyt šäilyttäy hänen punukka , käsityömuasteri Svetlana Šavirina .Naini jatko ämmön luovua perintyö ta jo yli 20 vuotta johtau Belomorskin Loskutok-tilkkuklubie .
Ekspositijon toisešša šalissa jatkuu tuttavuštumini pomorien , oneganiemiläisien ta karjalaisien kulttuurih .Šielä on esillä vienankarjalaisen naisen puku , kumpasen valmisti käsityömuasteri Natalja Denisova , šekä käsipaikat .Monivärisyttä näyttelyllä lahjotetah puuta tuohityöt , keramiikka .Ekspositijuo täyvennetäh vanhat esinehet Kanšantaijon keškukšen ta Aunukšen karjalaisen musejon fondiloista , šekä petroskoilaisien taiteilijien kuvat .
Näyttelyh voit tuttavuštuo 14. heinäkuuta šuaten Karjalan tašavallan Kanšantaijon ta kulttuurialottehien keškukšen Käsityötalošša .
Myöštymini juurilla
карельский: собственно карельское наречие
Новописьменный севернокарельский