Texts
Return to list | edit | delete | Create a new | history | Statistics | ? Help
Kui nagrištu kazvatiimmo
Kui nagrištu kazvatiimmo
Livvi
Kotkozero
Kasken
ajoimmo , sen keviäl vieriimmö , poltiimmo ül’en äijäl kandožet teräväkse , štobi tuhkua enämbi rodiaš : nagriš roih karjembi .
Sit sen künniimmö , sit rodih panendan aigu .
L’ehti homehtui – se on panendan aigu nagrehen .
Meniimmö nagrehen puhuimmo .
Puolih puwloissah kačot [puhujes ] – ga se rodiaw nastojuašoi nagriš , puwloin ladvoih kačot – ga rodiew ül’en karju , a muah kačot puhujes – ga rodiaw ül’en hienoine .
Sit nagrehen paniimmo sen da künniimmö , muadu piästiimmö ül’en äijän .
Midä enämbän muadu nagrehele piästät , sidä karjembua nagrištu roih .
Se nagriš kazvoi , üät pimettih , nagriš i rubei kazvamah .
Sit rubeimmo nagrištu ottamah .
Nagrištu rubeimmo ottamah , meniimmö , nagrehen loimmo kobareheh .
Loimmo , sit luajiimmo markan , rubeimmo l’estimäh .
Sit l’estiimmö nagrehen , paniimmo hawdua .
Menemmö huandeksel aijoi , luajimino suwren tulen , kivii hiilutammo , havvan kaivammo .
Sit panemmo hawdah sinne nagrištu , pezemmö da puhtahažet , sen katammo hüvin .
Roih hawdua .
Ehtäl havvan avuamme , kirrummo toižil sellil susiedoi : "Tulgua , hambahittomat , havvale !"
Tullah , hawdua müö annammo heile .
Ičel kaššalit s’el’l’äs , hawdua otammo s’el’gäh , kodih menemmö .
Sit nagriš rodiaw jo otettu , n’uattižet puzuh panemmo .
Puzun luajimmo .
Da tulen suwren luajimmo .
N’uatit havvommo : üksi hawdow , toine survow puzuh sinne , virzulois .
Se puzu kül’mäw sügüzüw .
Havvommo muga : tulen piäl panemmo da kiändel’emmö hangol alalleh sit .
Da sit havvotaheze , roijah kai žoltoit .
Survommo puzuh , kai rubiew vezi valumah , äski rodiaw neče valmiš .
Ruahkan panet nečen , n’uatin , ga se happanow vie , ni žiivattu ei süö .
Pidäw hawdua hüvin , sit žiivattu hüvin süäw talvel .
Puzu külmäw , lundu panow sügüzül , talvel pakkažel sit otammo , regeh panemmo da sit kodih viemmö žiivatoil .
A nagrehet markas päi otammo , kuoppah panemmo da sit talvel , kowz pidäw , sit kävümmö ottamah .
Viemmö hevol , pun’užet kodih viemmö sügüzül .
Sit panemmo päččih da päčin hüvin salbuammo , kriäpimmö savel .
Sit ehtäl avuammo päčin , hawdažet sie päčis otammo , sit kuivuammo n’äivöikse .
A sit tulian kezän sie roih jo meil’ n’äivöidü , omua särvindü .
Niidü livotammo , l’eivänke mečäs ruadajes särvämmö .
Paččoi pastoimmo .
Vai kui nagrehele menemmö , iel’l’eh paččoi tuleh panemmo .
Paččoi pastoimmo aiven .
Nagrištu vie n’äwttiämmö : kuoritammo nagrehen vaičel , sit n’äwttiämmö da n’äwttiä süömmö , ruohkannu .
Talvel päčis puas piimmö hawdua da söimmö .
Rieppoi luajiimmo : kivii päčis hiilutiimmo , sit paniimmo nagrištu vähäžen puččižeh , sit paniimmo kivet hiilavat , sit müös nagrištu paniimmo , sit müös hiilavat kivet , sit müös nagrištu piäl’epäi .
Sit ül’en äijäl katoimmo , heinüviršin piäl’e paniimmo , da od’d’ualua piäl , štobi höwrüine ei nowziš , sit net sih küpsehtütäh vähäžel (riepoikse ei pie äijäl küpsendiä ).
Sit rodiaw ül’en hüviä riepoidu , magiedu .
Se rodiaw nastojuašoi riepoi , puččiriepoi .
Sen ruohkis nagrehis paniimmo sinne riepoikse .
A n’äivöiriepoi se rodiaw magei .
Livotat n’äivöit , se rodiaw magei riepoi , ga süöt süömätöi , moine roih magei , kielengi lainuat .
Nagrehen siemendü luajiimmo koiš .
Ištuttajaštu jätiimmö sügüzül , kuappažeh paniimmo tervaksenke da muanke .
Da sit keviäl meniimmö , sie kuappažes kaivoimmo , da nagrehet kaššalih .
Tuliimmo da net vavole ištutiimmo .
Nu händü pidäw beregie , niis on äijü ruadua , ga müö maltoimmo kazvattua , ga kazvoi .
Vie heidü pilmu šordi , sit pidi tuhkua kül’viä da šeluokseh ehtil dai huandeksil sit ištuttajažis ümbäri kävel’l’ä .
Rodih madoštu : madožet pidi kai iäre keräillä palgožis , madožet palgožeh ištutaheze .
Nagriššiemen kazvaw : ga roih palgožet kai sormen pitküöt nemme (niidü sanommo palgožikse ).
Sen südämes on (kui sualištuw palgo ) sen südämes ollah nemme , siemenet .
Nu , äl’ä madožii tapa , palgožen süöw , siemendü ei roi .
A vie pilmat ištuttiheze , niih pidi tuhkua kül’viä ehtäl , kowz kaste langenow : sit pilmat l’ähtietäh iäres , a madožii muiten pidi karäil’l’ä joga ehtiä .
Viižinkümmenin paloin kai paniimmo ičele ištuttajaštu , savoin paloin paniimmo nagrištu ištuttajažekse .
Nu müös , ei joga sijas kazvatettu , müö möimmö nagriššiemendü toižil’e , möimmö .
Ruižvakan alal pidäw kaksi luzikkua nagriššiemendü kül’viä , a ruištu vakku .
Toššu vuvven kül’viimmö ruištu .
Rugehen otiimmo , ruis ül’en hüvin kazvoi nagrišmuale , nagrišmua on ül’en vägöw .
Tuhkua häneh oli piästettü äijü .
A muw vil’l’u gu viärämmö , ga muw vil’l’u täs palaw ...
Täs suarikkoine diäw , ruohku mua , künniimmö da niih üksih kazvoi , a nagriš ei kazvanuh .
Nagrehel pidi äijü puwdu poltua da tuhkua luadie .
Vot sit d’äl’l’es kaksi vil’l’ua vie otiimmo : kagran i rugehen otiimmo , hüvät kazvettih .
A d’äl’l’el sidä heinü rubei kazvamah , jo heiniä niitiimmö niil sijoil .
Net d’o rajakokse diäjäh .
Viidupohjua ei pie nagrehele vallita , pidäw l’epikköine da koivikkoine vallita .
Viidupohjas roijah kargiet nagrehet i pahembah kazvaw , a l’epikköh da koivikkoh roijah ražiet , magiet nagrehet roijah .
Okromi kartohkua da nagrištu ni midä muwdu emmo kazvatannuh .
Ewlluh aigua kazvattamah kapustua da ni midä .
Ainos pidi kaskie ajua da palua viärdiä , da .
Virzut jallas , da ainos pidi rüwdiä sinne meččäh .
Konzu kondii rubei nagreheh käwmäh , ga veimmö liinan komuw , veimmö nagrišhalmehes ümbäri , riboitiimmo .
A jänöi söi – ga jänöin hävitiimmö muga süöndäs : što paniimmo olgie , riboitiimmo .
Kannammo olgie sinne , riboitammo ümbäri halmehes i jänöi heittäw käwndän .
Jänöi süöw , sportiw äijän nagrištu .
Jänöi süöw , ga erähäh nagreheh vai üksi diäw kuori .
Muakondiedu nagrišhalmehel emmo nähnüt , muakondii se kartohkoi vedel’öw , nagrišpaikas emmo nähnüh .
Kondii kedägo süöw , kedägo n’ühtiw .
Menet , ga kai ollah bokalleh n’äivištüttü nagrehet bazaris .
Kondii sportiw äijän nagrištu , a jänöi , kuduan zavodiw , sen i süöw loppow , a sit toižen zavodiw (eihäi ole üksi jänöi mečäs ).
Kerävütäh sih artelil’l’eh , ga äl’ä rua ni midä , ga voit sovsem mennä nagriš , halmeh muga , sudre : ei roih ni nagrištu .
Da sit kaččomah kävümmö puaksužeh .
Da viemmö sinne , midä hüö varatah da , da niidü viemmö , da riboitammo halmehes ümbäri , da heitetäh käwndü .
Tiedohužih niškoi emmo ni midä tie , muga panemmo prosto da .
Nügöi emmo kül’vä nagrištu , nagrehet nügöi dai kai muga ollah .
Nagriš oli siniine .
Kui nagrištu kazvatiimmo
Livvi
Kotkozero