Texts
Return to list | edit | delete | Create a new | history | Statistics | ? Help
Kui enne vedoh kävüimmö
Kui enne vedoh kävüimmö
Livvi
Kotkozero
Enne
veduo veimmö müö , eiku nügöi rowno .
Enne oma hebo oli , hevole regeh pidi panna hein’iä , pidi panna kagrua , pidi panna l’eibiä .
Ajammo nečine Nirkah , kilometrii on kaksikümmen kois päi .
Nirkas , hierus , pidi vie ajua kiiometrii kaksitostu meččäh , süväh meččäh .
Ongo dorogu , vai ewlo sinne meččäh mennä hierus päi : konzugo on , konzu tuhun d’älgeh ajat sinne üön meččäh .
Menet sinne , puwn tüvel’e .
Smotrakka (enne nazịvaittihezen , smotrakat , nügöi nazịvaičeh muast’eri ) vedäw meččäh , l’eikkuaw sinule palan meččiä , značit , metrii kaksikümmen – nenga , kaksikümmen – nenga , n’elličuppužen pawstan , viiboročnoi meččü , kl’eimittü oli .
Sit pidäw ottua parret i ladvušku karzie .
Ei pidänüh , kudai sih puwhut diäw , ni pilkastu luadie , ümbäri puwlois pidi kui tahto ottua händü .
Eiga hüväh puwh luajit pilkan molodn’akkah , se sportihezen , sravih , ei kazva enämbiä , hapannuakse l’ähtöw .
Rubiet üösijua luadimah .
Kuhbo üösijan luajit ?
Omah pawstah pidäw luadie mökki .
A mökit mittuat oldih ?
Mökit oldih moizet : kaksi metrii yksielepäi , toine kaksi toizielepäi .
Luajit mökkižen , kaksiel’epäi katat , keskel tuli palaw .
Kaksi venčua panet libo kolme čurale – toizele da piäh .
Ukseh roihezen od’d’ualaine riputettu : onhäi ku nügöi zanoviesku ikkunale .
Sie pidi üöl’öi muata .
Heinütukus ollah l’eivät , pihal .
Heinütukus ollah kai süömižet , produktat .
Mökkih vaiku sinne otat mi pidäw kerrakse suvvä .
Keität sie .
Külmiä l’eibiä kirvehel l’eikkuat , tulipastoh panet sulamah l’eivän .
L’eibü se sulaw : kuzgo sulaw , kuzgo palaw .
Huondeksel vuotat d’o nügöi ku vaiku valguos vähäžel , l’ähtižit ajoh , ei sua muata , vilu on .
Maimua keität kattilal , čugunkattilal , suwrel , laččupohjal .
Kartohkua buoloitat sinne , talkunjawhuo panet , suwppua keität , maimusuwppua .
Konzu gu on sie vie brossua jiänüh , libo suwrimua kuaššua keittiä , ga hüvä on , a konzu gu ewlo , ga siit i muga välttäw .
Huondeksel süöt , päiväkse otat l’eibiä palan , l’eikkuat da sit sie tulel mečäs suluat da sidä süöt .
Kaksi kerdua päiväs sai ajua .
Matku oli pitkü , kaksitostu kilometrii vedo oli , Tukšuh veimmö .
Tukšun jogi nazịvoiččiihezen Nirkan peräl .
Brihačut oliimmo müö vie nuoret .
Tuatto oli jo nügöi vanhembua puoldu .
Huondeksel vedämäh l’ähtöw üksinäh vahnembi brihačču .
Müö tuatan kere kuammo sie puwdu .
Minä oliin vie pieni .
Pieni oliin , ga sit lumes kualua vähän sai .
Tuatto oli mužikku zdorowvoi .
Häi ottaw minun selgäh da toižen puwn tüvel’e kandaw .
Sie puwdu piluat čihaitat .
Käit külmäw .
Tuatto andaw kindahat .
"L’ämmitä , poigu , käit , – sanow , – minun kindahis , sinun käit külmettih pilan ručkah ".
Puwn suat pitkäl’l’eh , ladvuat sie , polletat parret .
Kaksi partu piäzöw pediäs .
Puolenpiän aigah hevot tullah mečäs päi (kaksi hebuo oli ).
Tulow sie kahtel hevol (üksinäh vahnembi velli vedi päivükerdua ).
Üökerrakse müö mollei brihačut l’ähtemmö , tuatto jiäw kuorittamah .
Meil’e jiäw puwdu kuattuw kuoritettavakse .
Jo nügöi toižekse kerdua enne pidi parret kuorittua : valgei ku bumuagu pidi olla parzi .
Da , n’edälii kaksi sie kočuičet pojieskan mečäs , puolen kuwdu .
Pühänpäivän aijakse tulet kodih , olet gu tapettu , joga sijas kubaittaw , kun’ et külüh kävü .
Kül’üh kävüt , osvežittos vähäžel , pezet kai revut , roihezen buitoku kebjiembi .
Pühänpiän ehtäl , jesli tahtot uvvessah zaarabotkah mennä , pühänpiän ehtäl pidäw panna jo kois regi .
Pidäw heiniä tuvva sie , ku ei ollene kois heiniä tuoduw , pidäw pühänpiän ehtäl heiniä tuvva .
L’ähtet jo nügöi huondeksel , čuassuw kolme ajamah järil’l’eh sinne Nirkah .
Nirkah ajat , valgiele Nirkah menet .
Pidäw vie meččäh ielleh kaksitostu kilometrii ajua , süväinmeččäh .
Süväinmeččäh sinne ajat , nu endižeh mökkih sih puwtut , omah mökkih .
Kuni on vie sit meččiä l’ähil , ruat , a pawstu lopeh , sit pidäw vie toižeh pawstah eistüö , sinne kilometrii možebut’ piolitostu , libo kaksi piäliči toizis pawstois , ruattulois .
Sit allat sinne kävvä libo mökin sinne luajit .
Oli jugei ruado se .
Toizen kaksi n’edälii olet da müöstin tulet kodih .
Suovattan ku udaičehezen priimittiä , priimität suovattan .
Eiku nügöi čotat oldu .
Čotat nügöi ollah pätnatsatogo da pervogo .
A sie oli : konzu kudamal suovatal puwttuw zdaija , sit čottu annetah .
Kudamal suovatal ei sie kantoršiekat da biržovoit voija priimie , sit jengua et poluči , kun’ et voinne mat’erjualua zdaija avansua enne ei annettu meil’e .
Muga ruat talven , sit kevätrospuwtal kodih tul’et , jo nügöi odva hengis olet vähäzel .
Ristikanzu moižekse muakkavut i moižekse hevot mennäh .
Hevot väzütäh dai iče väzüt .
Keviäl sinä jo mečän zdaičet , jengua puwttuw .
Nemih jengoih ostat sie kezäkse midä pidäw : čuajuw , zuaharii , nižustu jawhuo ostat sie možbut’ puwdan-puolentostu kezäkse .
I ostat sobamat’erjualua vähäzen sie , siiksua : paijat piäl’e äijäksepäiviä (enne pidi uwdiine olla paidu piäle ).
Možbut’ ajah jengua , ostat pind’žakkožen i kost’umažen mittuan tahto .
Vot sil’l’eh müö eliimmö endižeh elaigah .
A nügöi elaigu on toižeh luaduh .
Nügöi kaheksa čuassuw roihezen , ajaw mašin pihah .
Mašinah mužikku nowzow , ajaw omah ruadosijah , zavodiw ruata .
Ruadaw viideh čuassussah .
Viizi čuassuw roihezen , šabaššiw .
Mašin tulow ottamah , omah pihah tuow järil’l’eh .
Nügöi mužikku on pruazniekal endižeh niškoi .
Emmo müö puwttunuh täh sizonah , vai meil aigu proijii , nügöi ollah vaiku meijän poijat .
Anduakkah poijile i vunukoile ielleh mostu alaigua .
Kui enne vedoh kävüimmö
Livvi
Kotkozero