Texts
Return to list | edit | delete | Create a new | history | Statistics | ? Help
Kaksitostu vellesty
Kaksitostu vellesty
Livvi
New written Livvic
Karjalane suarnu
Lähtiettih kerran kaksitostu vellesty niityle .Niitettih ildassah .Niitettyy heiniä oli ylen äijy , ga niitettäviä vie enämbi jäi .Moine heinäkäs kezä ugodih .Jiädih yökse .
– Ga kuibo , vellet , myö muate vieremmö ? yksi kyzyy .
– Mugai vieremmö , ijän mugah .
Virututtih heinikköh .Dai kerras kahtestostu velli sanou :
– Nenga ei ole hyvä .Kaikin keskes virutto , minä yksin laijas .Minul roih vilu yöl , a minähäi olen kaikis vahnin .
– Dai minä laijas maguan , dai minul roih vilu , a minähäi olen kaikis nuorin .
– Ei ole hyvä , sanoi kuvves velli .
– Paha on , sanoi seiččemes . Vierkiä meijän keskeh .Sit etto ole laijal .
Ehtittih vai viertä ezmäine da kahtestostu kuvvenden da seiččemenden keskeh , ga jo toine da yhtestostu ruvettih väčkämäh :
– Nygöi myö olemmo laijas !Meile vilu roih !
Ruvettih vaihtelemahes .Nikui alevuo ei voija .Sissäh viereteltihes , kuni ezmäine da kahtestostu uvvessah laijal virutah .
– Kuibo nenga rodih ? Nägyy , uvvessah roih vaihtellakseh !
Juuri sih aigah ugodih susiedu siiriči ajamah .Niitylpäi kodih .Kaččou susiedu – milienne hoppu velleksien keskes on .Azetti hevon , astui tyveh .Susiedan nähtyy vellekset ihastuttih .
– Mi on hyvä ku sinä tulit ! Toinah nevvot meidy , kui pidäy viertä .
– Mibo rodih ?
– Ga emmo malta oigieh viertä , ainos kaksi ugoditah laijal muate .
– Ga täs taki gor’as minä teijät piästän !
Otti susiedu kangen , kudamas ymbäri heiniä suattoh laijatah , da pysti sen muah .
– Vierkiä ymbäri , kai jallat kangen puoleh , sanoi susiedu dai lähti hieruh yökse .
Viertih vellekset .Kaikil rodih hyvä !Ezmäzel on kahtestostu da toine rinnal , kahteltostu – ezmäine da yhtestostu ...Niken ei ole laijembaine , kaikin ollah keskes !
Aijoi huondeksel ajau susiedu hieruspäi niityle .Kuulou – vellekset tuas riijelläh , odva vai ei torata .
– Minun jalgu on ! kirguu seiččemes .
– Kuibo on sinun ! suutuksis vastau kahtestostu .– Tämä on minun jalgu !
– Ga kačo , minulhäi kynzi yhtes varbahas on viäräs , sanou seiččemes .
– Gu kynzi ollou viäräs , se on minun jalgu ! kirguu ezmäine .Vuottu kolme tagaperin minä kirvehel varvastu iškin !Minun on jalgu , andakkua iäres !
– Miksebo uvvessah riidelettö , midäbo juatto ? kyzyy susiedu .
Ga omii jalgoi emmo voi löydiä , vellekset vastatah .Piät kaikil ollah erikseh , a jallat kai yhtes tukus .Jo olis aigu ruveta niittämäh , a myö emmo jallai piäze .
– Dai täs gor’as autan minä teidy . Virukkua , vuotelkua vie kodvaine ...
Meni tuhjikkoh , leikkai lujua viččua tävven kobran , da gu rubei pergamah velleksien kandupiälöi !
Kerras pystyy hypättih .Eulluh aigua varbahii valliččemah , jogahizel omat jallat lövvyttih !Hypittih kodvaine heinikön kasties , ku jallanpohjat vilustuttas , dai ruvettih niittämäh .
Sit enämbiä nikonzu ei jiädy vellekset yökse niityle .Sanottih : "Emmo malta iče jalloinke peril piästä , ken sidä susiedua tiedäy , agu lähtöy ajamah tostu tiedy myö ."
Kaksitostu vellesty
Livvi
New written Livvic
–
–