Texts
Return to list | edit | delete | Create a new | history | Statistics | ? Help
Iivan pojjal, kudai kuoli voinal
Iivan pojjal, kudai kuoli voinal
Livvi
Tulmozero
Lähti
ku armaz idozeni ilmazil lekkehil .
Piin vaalijane naine valehuzinnu .
Engo minä käynnyh kandomustu kaimailemah ,
ni pordahien edyzih en käynnyh evähätöi naine .
Ehto spaassazet annettih erinomazet eloksuot :
sit evähäzis tuli elävinny eroilla .
Sit tuldih aigomazel edeh aidazet ,
eigo voinnuh ylies tulla , eigo ymbäri ,
eigo voinnuh ottamazeni peeliči peestä .
Sit vuotin vierdynyt naine ainos vieštizii ,
sit vuotin kimalehuzis kirjazii , ku oli učen'n'azet učittu ,
liiččazeni oli listoin livailtu .
Ka oli imehel naizel kolme vuottu
ylen igävys vierahan vallan al ,
kolme vuottu en olluh yksiz valdazis vaalimozeni ker .
Sit kui kuvamazen lähtettyy vaattiezet kuluttih ,
vasta sit ruvettih susiedoin sulgazis
tulemah kimalehuzis kirjazet .
A minä , imehyd naine , istuin ikkunan vieres
ylen suuris igäväzis :
Ku oli kybenyt kylmänny , kuvamazeni kuolluonnu .
Ei voinnuh vieštisii viritellä vierdynnyöl naizel .
Ilmoin vaalimat vaivuteltih , ilmoin suurimat sustuteltih ,
sit ylen suuriz vaivaziz elin ,
ku oli vaččazis vaivavunnuh ,
vaski keegäzien (?) taakse vaibunnuh .
En olluh vierdynnyh naine veziluzikkaa andamas
ihalien syndyzien nettyzil ildazil aigazil .
Armahat anhelizet händy alendeltih ,
parahat spaassazet händy
korgieloin syndyzien edyzih keräiltih .
Vuotin elävie vieštizii kuvvet vuvvet vesselii ,
sit tuli idozes ylen igävät vieštizet ,
kuvamaizes tuldih kuolinvieštizet .
Ilmoin verhomat vierryteldih , vierahat hot vedeldeltih .
Kolmet suutkat oli ylen suuris suruzis ,
sijazel vai venyin da itkin kuvamastu .
Iivan pojjal, kudai kuoli voinal
Livvi
Tulmozero
Сыну Ивану, погибшему на войне
Russian
[