Texts
Return to list | edit | delete | Create a new | Statistics | ? Help
Bukina Valentina . Mečänkaččojan suarnu
Bukina Valentina
Mečänkaččojan suarnu
Livvi
New written Livvic
Mečän
laijas seizoi kodi , sie eli mečänkaččojan pereh – häi jo ei ruadanuh , ga suvaičči mustella endisty elostu da histouriedu meččyzvierilöis .
Puaksuh vahnu mečänkaččoi lapsien ker käveli meččiä myöte : hyö kerättih gribua , siendy da muarjua , vahnušši saneli , kui pidäy vediä iččiedäs mečäs da ei yöksyö .
Nuorembaižet vunukat suvaittih kuunnella suarnoi , kudualoi died’oi keksi mustelles omua elaigua .Ga i buabo puaksuh keksi suarnoi meččyelättilöih näh .Lapset puaksuh mustellah Rastavan suarnua , jänölöin ker tapahnunnuoh tiedohuoh nähte .Täs i nygöi enne Uuttu Vuottu lapset pakittih händy midätahto keksie , ga häi työndi heidy died’oilluo , hänen kai histouriet ollah gu suarnat .Died’oi uskaldi jälles murginua sanuo Uvven Vuvven histourien .
Vaigu buabo rubei päčispäi suamah lihasuuppua da kuaššupadua , da tytär neveskän ker pandih stolale leivän , luzikat da suupputorielkan keskistolale , lapset jo ištuttihes laučale stolan tuakse .Kaikin hyväs mieles syödih suuppua leivän ker , a ennevahnas kai pereh syödih yhtes astiespäi , sit brossukuaššua argivoin ker da juodih maiduo .
Lapset tirpajen vuotettih , konzu died’oi zavodiu suarua sanomah .
− Sanon minä teile , kui myö meččäh kävyimmö kuuzahaštu eččimäh , zavodi died’oi . − Minä vahnembazen poijan ker kerävyin meččäh , gu Uvven Vuvven pruazniekale kuuzahaine kuadua . Lapset jo buusat , čomua nuorastu , äijän bobaštu luajittih , bumuagas fonariidu da lumihiudalehii , puuhebozii da kalazii , vuatas kaikenjyttymii liipukkazii da börölöi .
Kaikin tahtottih , gu kuuzahaine olis čoma da pehmiekkäine .Teijän sevoittaret , velli da sizär , tarittihes meijän ker , gu avvuttua vallita kaikis paras mečäs kaunehin .Sit myö kerävyimmö , panimmo kuatančat jalgah , turkit , šuapkat da alazet kädeh , da lähtimmö hiihtelemäh suksil .
Vaigu tulimmo pellon reunale – kačommo , ga jänöin jälgie on ylen äijy , a yksi jänöi rihmoih puutui , särizöy – meidy varuau .Poigu terväžeh händy piästi .Pagei jänöi .A myö suksitammo – kuuzahaštu ečimmö .Silkeskie Miikulale oččah käby lendi – kačommo gu se oravat oksii myöte hypitäh – kižatah .
Ihalmoičimmo myö ilokkahii hyppijöi da ielleh meččäh lähtimmö .Varvoi enzimäine dogadii mečän raunal madalaizen meččypuun .Kuuzahaine kazvoi koivikos , a sen oksil ripui mondu käbyy .Diivimmökseh myö sit – iče pieni , a jo kävyt oksis …
Poigu ajoi kuuzahazen rinnale , silitäldi käbyzen da sanoi :
− Vot gu olis korgiembi vähästy , gu lagessah tabuas …
Silkeskie kuuzahaine buito puisti oksat da kazvoi .
− Vot on čuudo , sanoi poigu , − käby on tiedovoittu !
A lapset ajettih puun rinnale da ruvettih kirgumah käbyzii silittäjen :
– A myö tahtommo , gu kuuzahaizes n’amuu da juablokkua ruskiedu kazvas .
Sil aigua kuuzahazeh jiäviihes n’amuu da juablokkua .A minä toivotin käbyy koskettajes , gu tämä kuuzahaine olis meijän koiš .Kuuzahaine hävii .Myö vähäizel pöllästyimmö , ga uskoimmo , gu kuuzahaine jo on koiš .Myö kiirehel hiihtimmö järilleh kodih .A koiš meidy vuotti čoma puuhut !
− Vot mittuine čuudo oli Uuttu Vuottu vastates ! loppi oman suarnan died’oi .
A vunukat ruvettih kyzymäh :
− Voibigo meile toivottua , gu kai olis muga , kui suarnas ?
Died’oi vastai :
− Rastavan yön hyvät tahtot varmah todeh mennäh !
Lapset ylen äijäl ruvettih vuottamah Rastavua , gu arbaittua omat sydämellizet toivot .
Mečänkaččojan suarnu
Livvi
New written Livvic
−
–
−
−