Тексты
Вернуться к списку | редактировать | удалить | Создать новый | История изменений | Статистика | ? Помощь
Jöt’kin issunda
Jöt’kin issunda
карельский: собственно карельское наречие
Толмачевский
Miän
paikoilla jöt’kie ennen issuttih monešša koh .
Kurrešša issuttih .
Kyl’än taguana Sosnowka dorogua myöt’ ol’i kakši zavodua , jotkizavodua .
L’emeššä Os’s’ippa-d’iäd’ö istu , Kuamen’kan Os’s’ippa .
Hyö tože oldih Kurrešta l’äht’ennyöt .
Sp’uasušša issuttih .
Enžimäzen , žen Germanskoin voinan jälgeh i miän kyl’äh Ontošihan Sandra luad’i zavodan progonazeh da rubei istumah .
Muwvualla ei kuwlun l’ähil’l’ä .
Mis’s’ä kuin šuot l’äššä da ped’äjämečät , n’in issut , a n’äreikkö da l’eht’imečät , n’in ew mid’äi zavod’ie .
Yht’ä tuohijöt’kie ajua , n’in pid’äw kaikki koivut mečäštä kuor’ittua , a raz’i andaw l’esnoi .
Tuohešta ajetah jöt’kie .
Že viel’ä parembi on , čistoi jöt’ki , čistoiks’i kučutah .
Jallaččiloida da zbruwjua voidua .
Vain el’ä polta .
Čistoilla tuohijöt’kil’l’ä vain kuiva jallačči voija , n’in poltaw .
Pid’äw ražvanke keit’t’iä .
Že pehmen’d’äw , vet’t’ä ei lašše .
Jöt’kin issunda ew hiitroi d’iela .
Vain pid’äw guwba da trubat .
N’e rawdazet .
Muw kaikki koissa luajittava .
Glawnoi hiän on guwba da trubat , n’e ollah oššettavat .
Šid’ä pid’äw pučit jöt’kih varoin , doin’iekka al’i kakši , puizuot skipidarkah varoin .
Hiil’il’öid’ä mywvä , n’in pid’äw mos’t’inua .
Muwda n’i mid’ä ei pie , kanduo pid’äw , t’ervašta .
A zavoda ew Morowzovan fuabr’ikka , pienembi on .
On šen’iin šalvettu huonehukšut kyl’yn muon’e al’i vähäs’t’ä l’eviembi , šammaldamatta , ovi , tagašeinäh lowkko , a kun kakši guwbua , n’in kakši i lowkkuo trubih varoin da kaččuos’s’a .
Muwda n’i mid’ä ew , ikkunua ew .
Oven kohtah , l’ähemmä tagašein’äh on luajittu kiwgua al’i kakši .
Kiwguah on pandu guwba .
Guwba on yl’ähäzekši noššettu kivil’öil’l’ä , štobi guwban alla l’ämmit’t’iä .
Ieštä päin guwba on šalvattu šalvalla , kuin kiwgualawda , a tagašein’äštä l’äht’öw ložie truba , zavodašein’äštä l’äbi pihalla .
Že truba mänöw puizešta l’äbi , mih on vet’t’ä pandu .
Truban n’okka , jo hoikembi , kuin puizešša mi on , tulow puizešta l’äbi .
Žen truban n’okan piäl’l’ä on puwhin’e truba šeizatettu pis’t’yöl’l’eh , rawdazen truban n’okašša , nu , kumban’e puizešta l’äbi tulow , höwry ših nowžow .
Rawdazen truban n’okan alla on hawda kaivettu , truban alla hawvašša doin’iekka , mih jöt’ki valuw .
Dai kaikki d’iesvat šiin’ä .
Jöt’kizavoda ew paja , vähä mid’ä on .
Muwda n’i mid’äi ole ei .
Pučit varušša dai aja .
A issutah jötkie , mie n’äin kuin , en kerdua n’ähnyn .
Šuošta al’i ammuzelda pilkalda šuahah t’ervašta , ammuz’ie ped’äjän kandoloida .
Kannot n’e ollah jo ynnäh hapannuot , pinnat hapannuot da hoikat juwret .
Vagalla noššallat – kebukkazeldi nowžow .
Häneh on vain šiämyštä jiännyn , t’erva .
Že ei happane .
N’е kannot tukušša kuivetah , i vejet’äh hiät zavodan luon .
Ložiet juwret pilalla pil’it’äh , kannot i n’e ložiet juwret šärgiet’äh .
N’e šärgiet’yt t’ervakšet plotno složitah guwbah , t’äwven guwban ahetah .
Guwban šalvatan šalvalla da viel’ä šavella ymbär’i šalvašta kaikki ragozet voijetah , ruvetah l’ämmit’t’ämäh .
Ei guwbah tulda panna , guwba on šalvattu .
Raz’i voit t’ervakšet virit’t’iä !
N’e palettais’ dai kaikki .
Guwban alla hallolla l’ämmit’et’äh , kuin pert’in kiwguada .
Tul’i nowžow , ymbär’i guwbašta on väl’it randoih jät’et’t’y .
Guwban alla kuin hallot paletah , n’in tul’i nowžow guwban pohjah i randoih , a piäl’d’ä on truba katokšeh , šinne šavu nowžow .
Ka l’ämmit’et’äh , l’ämmit’et’äh , kuin guwba palavoiduw , t’ervakšet ruvetah kuivamah , höwry l’äht’öw trubah , mi on guwban peräh ažetettu , guwbašta tulow , da pučista l’äbi mänöw .
Trubašša že höwry jäht’yw , kuin truba on veješšä da vilu .
Šiel’d’ä rubiew , trubašta , skipidarka ed’izeh t’ippuman .
Čurčettaw i tulow doin’iekkah , mi on hawvas’s’a .
A kuin viel’ä l’ämmit’ät , n’in rubiew i jöt’ki tulomah .
Ed’izeh tulow vez’i da skipidarka , jöt’kie on vähä .
Žen doin’iekašta kuadaw yht’eh puizeh , a šid’ä , kun vez’i da skipidarka heit’t’äw tulennan , rubiew vain jöt’ki tulomah .
Jöt’kin hiän kuadaw puččih .
Konža heit’t’äw jöt’ki vuodua , kiwguašta tul’i pid’äw šammuttua , guwba jähyt’t’iä , avata i ottua šiel’d’ä hiil’et .
T’ervakšet kaikki männäh hiil’ekši .
Hiil’et n’e vain hel’äjäw .
Purretah guwbašta hiil’et da toista t’ervašta ahetah .
Kun on kakši guwbua , n’in yht’ä jähyt’et’äh , a toista l’ämmit’et’äh , ajetah jöt’kie .
N’iin vuorokkeh kahella i ruatah .
Hiil’et n’e samvuarah ei god’iečeta , pajah mywväh .
A jöt’kie puččie kakši-kolme ajaw da t’el’egäh , kyl’ie myöt’ .
Kyl’äššä kel’l’ä ei pie jöt’kie !
Kaikin oššetah .
Voidamatta et aja .
– Tuohešta ?
N’iinžei tuohešta , vain t’ervakšen n’eičči tuohta ahetah .
Yht’eh luaduh kaikki mänöw .
Tuohijöt’ki on parembi , nu i kallehembi on .
Mit’yš hiil’i tuohešta !
Guwbašta da kiwguah al’i pihalla kunne , hawdah , yks’i truha .
L’emen , že Kuamen’kan Os’s’ippa-d’iädö iin’igäzen ijän jöt’kie ajo .
Sprawnoi talo ol’i .
Kakši t’yt’t’yö kawn’ičči .
Molemmat hyviin miehel’l’ä ando .
A poiga ol’i yks’i – L’evo , n’yt kyl’äh on nowššun , kolhozah .
Jöt’kin issunda
карельский: собственно карельское наречие
Толмачевский