Тексты
Вернуться к списку | редактировать | удалить | Создать новый | История изменений | Статистика | ? Помощь
Balakirev Nikolai. Kakši Vas’ka-dieduo
Balakirev Nikolai
Kakši Vas’ka-dieduo
карельский: собственно карельское наречие
Новописьменный тверской
Ših
aigah , kumbazeh näh pagina lähtöy , elettih miän kyläššä kakši ruavašta mieštä .Oldih hyö yhennägözet : šilmäzet valgeizissa ripčizissä , kun keviällizet lätäkközet , kulmat , usat , lyhyččäzet parrat valpahat kun rugehen tähkät .Šynnyttih molen yhellä vuuvella , yhellä kuulla i daže yhtenä piänä .Yhtenä piänä i pappi hiät rissitti yheššä kupelissa i nimet yhenmuozet ando – Vasilii .A kun tuatot heilä oldih Hodarit , nin vanhuoh šua kaikin kyläššä heidä kučuttih Vasil’ F’odorov , i toine toista hyö pagautettih Vasil’ F’odorov .
Konža kyläläzillä Joventavuššalla lizättih kažvannuot mečällä da tuhjolla muat , molen Vasil’ F’odorovat yheššä korčuidih kandoloida , juurettih tuhjoloida , poltettih lomuloida , kaivettih muada , missä adralla , a missä i zuastupalla : lieni , kun ennen šanottih , huuhta .
Pahattava muahut , da i äijäldi edähänä kyläštä – virstua kolme , vain min šie ruat : perehet šuuret , vs’o liiga jyväne .Ka jo kolme vuotta ukot kylvettih omie polostazie touvolla , i šinä vuodena tahottih kagrua kylviä .
Kakši ukkuo , kakši ristivellie , molemmilla yhenmuozet nimet , yhenmuozet aziet , huolet i ožat .Millä ois’ ukot tähitä , štobi lugija ei yökšyis miun kirjutukših ?– Aha ! Ka kuin : yhellä Vasil’ F’odorovalla hevos’t’a kučuttih Mal’ko , a toizella – Savrassu .
Huomnekšella aivokkazeh Vasil’ F’odorov val’l’ašti oman Mal’kon telegäh i läksi Joventavuššalla kyndämäh polostua .Tuli peldoh , tahto jo lažettua hebone telegäštä , štobi val’l’aštua adrah , ...kaččou , a adrua eu telegäššä : "Oho , žiiherie , prosti hospodi , adran kodih unahin "!Pyörähytti hebozen i läksi Mal’ko lyglyttämäh järelläh kyläh .
Jo puolen matkua ajo , kun vaštai toizen Vasil’ F’odorovan Savrassulla .Že noššaldi kartussin :
– Zdorov , Vasil’ F’odorov . Min tuačči pellošta myöštiäčet ?
– Zdorov ! – koššutaldi oigiella kämmenellä omua kartussie . – Mie da Mal’ko tiijämmä . – Hevos’t’a ei piettän .
Enžimäne ukko tuli kodih , nošti adran telegäh i vanhua dorogua myöt’ ajau järeštäh peldoh .Ajau i ajau , kodvin jälgeh ken ollou vaštah raččahalla ."Ei go Vasil’ F’odorov Savrassulla ? Hiän !"
– Kunne šie , Vasil’ F’odorov ?
Že vaštah :
– Mie da Savrassu tiijämmä .– Muhahti Mal’kon izändä , ajau kunne hänellä pidäy . Tuli polossalla . Kaččou reunašša susiedan telegä šeizou .Telegäššä adra , a kežälängilöidä eu .
– Ka tämä nin da ! – rubei nagramah , – Myö , kakši ukkuo , jo ynnäh häbeydymä , aiga poigie työndiä peldoh muada ruadamah .
Lugija miun kirjutušta šanou : mih varoin oli ukkoloida hebozin nimilöih šiduo , vet’ voičči heidä famil’joida myöt’ kuččuo .
– Voit že voit , – mie šanon , – vain ših aigah kyläläne rahvaš rigeneh i omua famil’jua ei tiedän . Da i tiediä eulun mih varoin , jesli ristikanža ei kävele školah , ali ei palkuače ruadamah linnah .
Toko školašša učiitel’a kyžyy lapšelda : "Как твоя фамилия "?, štobi žurnualah kirjuttua .Lapši šanou mi piäh tulou : "Ivanov ".A ei , nin i čuarin famil’jan – Romanov .Žentän miän kyläššä oldih i Suvorovat , i Puškinat , i Kutuzovat , i Romanovat .Miun maman rodnoit vellet i čikot piettih famil’joida i Timofejevih , i Ivanovih , i Morozovih – kellä mytyš famil’ja mieldy , žen i pani ...Tämänmuozet aijat oldih .
Kakši Vas’ka-dieduo
карельский: собственно карельское наречие
Новописьменный тверской
–
–
Балакирев Николай Михайлович
Два Василия Федоровича
русский
-
-