Тексты
Вернуться к списку | редактировать | удалить | Создать новый | История изменений | Статистика | ? Помощь
Balakirev Nikolai. Uužie dengoida vaš
Balakirev Nikolai
Uužie dengoida vaš
карельский: собственно карельское наречие
Новописьменный тверской
Mar’u
F’oklanke , miän kyläläzet akat , keräyvyttih Kolašnikovah , bazarilla .Ei ammuin dengoin reforma oli , dengat toizen nägözet liettih .Voit šanuo , vähä ken kyläššä uužie dengoida nägi .Kyläššä i vanhua dengua eulun äijä , a uuvet mistä liivutah .Ammuin go voina loppieči ?A hot’ i oldais’ dengazet , nin miän laukašša eu äijäldi midä ottua .
On sel’die , on suaharuo , da kanfetkua "podušečka ", on karasinua , slava hospodi , a vielä täyvet pal’čat bankua .Bankoilla resuidu mi ollou vrode kuin hämähikkö , vain ruškie , krabakši šanuočou .Miän akat niidä kraboida vielä ni kerdua ei mol’kattu .A mih varoin otella , kun šanotah , kraban liha pohodiu ruakun omah , vain pahembane .A ruakkuo omašta jovešta vunukat buaboloilla varoin pyyvetäh min l’uubo .
Akoilla himotti uudizih dengoih keviäkši perehillä varoin oštua kološua , da šuureh pyhäh pyhävoida .Ors’an laukašša (магазин отдела рабочего снабжения ), šanotah , nagole on äijä tavarua i huogehemmat tavarat , čem toizissa laukoissa .
Pakottih hevos’t’a brigadiralda , da že ei andan , šanou : "Hebozet ei jouveta , ruvetah vedämäh heiniä Duuničašta keviäkši žiivatoilla varoin , kuni vielä keštäy doroga , ottakkua , – šanou , – härgäne ".Min šie ruat ? Val’l’aššettih härgäzen .F’okla regeh pani puan meruttuo voida , a Mar’u kakši rengie : yksi rahkanke , a toine muigienke maijonke .Kyläštä lähtei yöllä , štobi kuin valguou , olla rinkalla .
Kolašnikovah tuldih aijalleh .Härgäzen jätettih Mar’un omih i lähtei torguimah .Rinkalla rahvašta oli vägi äijä , akat ihaššuttih : "Ei viikokši zatläyvy hiän torgu : oštajua äijä , oštajat hyvinke dengoinke "!Kolašnikovašša šuuri zavoda , stanča , leshoza , kakši školua , tehnikuma , ruadajilla makšetah hyvin .
Mändih kontorah , vaškeizilla dengazilla makšettih torguiččijat , šielä že annettih heilä valgiet perennikät , viesat i akoilla torgu avaudu .
F’okla kun vain zaimi oman šijan , rubei ravajamah :
– Берите , берите масло хорошее , сладкое !
Mar’u rengilöinke šeizo iänettä …Hil’l’ah mid’ ollou heilä torgovl’a mäni ...Kuin ollou yksi mužikkane kačahti , muhahti :
– Ты что , бабка , масло сахарным песком посыпаешь ?– i läksi pois’ .
F’okla iänisty kodvakši , bobittau :
– Mintän mužikka täh rukah šano ?– a šiidä tuaš , – Берите , берите масло хорошее , сладкое !
Jo loppu bazarie yksi naine ošti häneldä kilon voida i karielakši šanou :
– Mintän šie šeniin huukat ?Hormakši ei šanota "magie voi ", šanotah "vkuusnoi voi ".
Naine uidi .F’okla iččiedä haukkumah :
– Kačuo , hajuttoma akka ! Midä mie kidahuin täh šua ?Nu kko pruobuičen kun naine šano , – i F’okla tuaš kagahumah : – Берите , берите , масло хорошее , скусное !
Paremmin ruvettih ottamah , vain jo rinkalla rahvašta ei jiänyn , a voida – vähiä ei puoli padua .
Mar’ulla aziet euldu paremmat .Muigieda maiduo ynnäh ei otettu .Oštaja tulou :
– Та-ак , тут творог , а здесь что ?
Mar’u hänellä :
– Кислое молоко .
Že nenän kiändäy i uidiu .Rahkua Mar’ulla šai myyvä vain kiluo kakši , muigieda maiduo ni yhtä .Prauda yksi brihačču hänen vähäzeldi viiručči .Mist’ ollou hyppiäldi :
– Чем торгуешь , бабушка ?
– Творожком !
– Вот тебе новыми 25 рублей , вываливай в мою тару весь свой творог .
Loi stolalla den’gat .Mar’u ei kerrin šanua šanuo , kun brihačču iččeh fatti rengin rahkoinke , kuado omah aštieh i ...pagoh .Mar’u hänellä jällesti :
– Бери и кислое молоко !
A že jo edähädä :
– Я , бабушка , ничего кислого не люблю !
Mar’u otti den’gan käzih . Kuottelou : ložiettava …a hiiz’ händä tiedäy , možo uuvet den’gat ložiet i ollah .
Täššä F’okla mögähti :
– Mar’u , aššu pois’ , jo eu nikedä oštajua .Aššu miun čikkoh , murginoičemma , a šielä kačomma midä ruadua .
Tuldih Mar’un omahizih .
– Nu , kuin aziet , kupčat ? – vaštuau heidä Dun’a , Mar’un čikko .
Mar’u šai kormanista šivotuot paikkazeh den’gat , ando Dun’an tyttärellä : "Luve , äijä go on "?
Že keritti paikkazen :
– O -o -oh !Mar’u -t’ota , šiun muanitettih , annettih klejutuot gazietašta snimkat uutta den’gua .
– Kačuo , pahalane , kačuo , mytyš kehno brihačču , vet’ akan muanitti ! – paigai käzillä Mar’u .
Murginan aigah myöjöillä i leibäpala keroh ei männyn .Viiručči Nas’t’a , Dun’an tytär , kumbane ruado bol’ničašša :
– Andakkua tiän voit da muigiet maijot , mie myön omilla ruadajilla , a den’gat teilä työnnän , – da vielä i nagrau . – Mar’u -t’ota , šiun muigie maido hormakši šanuočou "квашеный творог ", a ei "кислое молоко ", – i lizäi , – Ajakkua Jumalanke kodih .
– Passibo , vara , ušto Jumala neugou kellä žiivattua kaččuo , a kellä rahkalla torguija , – abeizekši muhahti Mar’u .
Uužie dengoida vaš
карельский: собственно карельское наречие
Новописьменный тверской
–
–
–
–
–
–
–
–
–
–
–
–
–
Балакирев Николай Михайлович
За новыми деньгами
русский
-
-
-
-
-
-
-
-
-
-
-
-
-
-