Тексты
Вернуться к списку | редактировать | удалить | Создать новый | История изменений | Статистика | ? Помощь
Balakirev Nikolai. Ogru i Jeudi
Balakirev Nikolai
Ogru i Jeudi
карельский: собственно карельское наречие
Новописьменный тверской
Avaudu
ovi :
– Zdorov teilä .
Ogru šopešta :
– Ken šielä ?
– Ken , ken ? Mie – Jeudi .Jo susiedua iäneštä et ruven tunnuštamah .Midä yksin koissa kokotat ?Missä šiun tytöt ?
– Pyhäpäivän ilda , nin ušto gul’avolla jogirandah lähtei , a Annin hebozinke työnnettih Rževan luoh auttamah peldoloida kyndiä . Oma š ogordan issutit go ?
– Kuda midä issutin , da vielä vilu mua on .
– Da , vilu , – soglasieči Ogru Jeudinke . – I myö vain luukat issuttima .
– Olit go mitingašša Pobedana ? – Jeudi pyörähytti paginan šinne päin , millä rahvaš jälgimät päivät vain i eli .
– Olin . Myö kleverimualla vet’ kivie keräimmä šinä huomnekšena .Kačomma , ken ollou hyppiäy peldoh ravunke : Pobeda !Pobeda !Myö telegöih i kyläh .Ajamma . Viržilöidä laulamma .Ajaldima pravlen’jan pihalla , a šielä jo kaikki kylä , daže lapšet školašta laškiettu .Preda rečuo šanou .Šidä tuaš lauloma .
– A mie nin murginah šua en i tiedän , što voina loppieči , – šanou Jeudi , – riehtä da guomnuo uberiin , pyyhiin . I šie mitingašša lauloit ?
– A kuinbua . Zato kun kodih tulin , illan itin .Šiun , Jeudi , kolme poigua vojuidih i kaikin eloh jiädih , a miula yksi poigane oli da šinne i jäi .Vähän go vain gor’ua mie näin kažvattuas’s’a händä .Ei šuurikkazena brihazena jäi tuatotta , a hänellä vielä nellä , da kaikin tyttözet .Il’l’a jo školah käveli . Školašša učiitel’at šanottih , što benzina i karasina äš vejen piällä paletah .Midä -midä , a tämän hiän yhä hyvin muissutti i šiidä šua rubei varuštuačemah jogie virittiä .
Pellošša traktora z’abua kyndi . Hiän šinne hyppeli kaččomah traktorua . Traktora miän kylissä ših aigah oli šuuri diiva . Nu ka , hyppeli peldoh i šielä nägi puččie .Keräi brihazet .Hyö otettih rengin i lähtei karasinua vaš .Il’l’alla käzissä oli važan händä .
Šeženke hännänke miula tože oli kummua .Žen hännän hiän vielä kežällä katkai kolhozan važalda , konža važoida paimendi .Kuin hiän pagizi , deskat’ , važa rubei kočahtamah aijašta piäličči kagra peldoh .Bilo jo kočahti peldo puolla da Il’l’a kergii pyörähyttiä važalda hännän ymbäri ylimmäzeštä riuvušta .Händä i katkei , vähiä ei juurešta šua .
Jeudi rubei nagramah .
– Ka šie nagrat , – šanou Ogru . – A miula ših aigah ei nagrattan . Natto , kumbane fermašša kaččo važoida , žualieči predalla .Preda miun haukku da i šanou :
– Milleh häviey važa , nin važašta makšat .
Mie hänellä :
– Munašta go miula ottua den’gua ?
A preda :
– Et makša – tyrmäh lähet !
– Hyväšti važa eloh jäi . Il’l’an paimenista ajettih .Hiiz’ händä tiedäy , mih varoin hiän žen hännän kodih toi , da sinčon alla peitti .
Nu ka ...brihazet löyvettih karasina pučin .Il’l’a viritti (žiidaine , jo kuri ših aigah ), viritti kuivannuon hännän i čökkäi puččih : on go šielä benzina ali karasina .Ka i paugai .Hänellä nimidä , a monet viärissyttih .
Jeudi :
– Muissan mie šestä kummua : vet’ miän Pet’alla oldih jallat poltettu , a Mokilla Van’alla nägö kaikekši ijäkši ruškieloinke ruppiloinke jäi .Voinan aigah hiän oli kodvazekši laškiettu kodih , nin toizin kylin tytöt kyželdih Van’alda : "Missä šie šezih rukah paloit "?A hiän heilä : "Tankašša ".
Molen besednikät ruvettih nagramah ...Kodvazin jälgeh Ogrulla huulin uglazet tuaš alettih i hiän lizäi :
– Nu i höššin mie Il’l’an šilloin .Perran da iten , a hiän hot’bi račkahtais’ .Vähäzeldi kažvo – toruamah rubei .Yhtenä Frolana torai pal’uškoizinke .Ei yksin torain , a puolen vuotta prinutkua vain hänellä annettih , a toizet kuin ollou piäštih .
- Žen jälgeh talvella , aivis’ pakkazilla , lähtei monella podvodalla ozrinke zagotovkua Lihoslavl’ah viemäh . Šinne šua nelläkymmendä virštua .Kylmettih voššikat .En tiijä kellä heistä piälakkah tuli viinalla lämbiečie .Kiilnačettih yksi ozravärči myyvä , a vähyš keškenäh jagua .Da unahettih ušto .Ka Il’l’alla yhtä värčie ei fattin ...Suudu .Issutettih kahekši vuuvekši .Vähän go mie itin ?
Kuni oli tyrmäššä , lieni viona .Il’l’a ei kaikkie istun , tuli kodih .Lämmitin kylyn .Vain kergii kylbie , šinä že piänä miän rajonnoi (председатель сельсовета ) Anni zajuri i työndi Tolmaččuh vojenkomattah , ei andan ni yhtä yöhyttä koissa muata .Šuatoin mie Il’l’an Papinaholla šua .Läksi kopittamah šalkunke šelläššä , a mie jäin röngymäh meččärannalla .Šiidä šua mie händä en i nähnyn , vain unissa harvazeh tulou .
Šinä vuodena šygyžyllä pohoronnoi tuli , a šiidä väliän kirja Il’l’an komandirašta .Komandira kirjutti , kuin Il’l’a hyvin vojuičči .Täh šua kaikki šanazet muissan : "Сражался геройски , в боях был примером для товарищей и пал смертью храбрых ".A jälličekši : "Благодарю за воспитание преданного Родине сына .Вы можете гордиться своим сыном героем ".I kaikki …
Ogru iänisty i paikan šivokšella pyyhki šilmät .
– O-ho-ho-o , – jygiešti hengähti Jeudi , – Vähän go gor’ua rahvahalla toi tämä voina ei vain frontalla , a i miän nägözillä . Vähä go ruadua pidi kaikilla : pienillä i vanhoilla .Otamma hot’ miun .Iivana miun oli predana , a ei andan otkažie brigadiralla hot’ kerdane ni myttynäzeštä ruavošta .Olen järie , nin aivis’ mužikoin ruadoloida ruavoin : lämmitin , ahoin riihilöidä mie , puija leibie ali loukuttua pelvašta – tuaš brigadira milma työndäy , härgäzillä kyndämäh kežanduo – tuaš "Mäne Jeudi ", ladjuamah kegoloida vain milma i työnnettih .Iivana i iččiedä ei žualivoinun .Tois’vuodena voinua illalla tuli pravlen’jašta , istuoči karžinlauvalla da ših i kuoli , – piä Jeudilla ripahti vähiä ei polviloih šua .
Ogru :
– Loppieči voina da viikon vielä rubieu rahvaš händä muistamah .I mid’ ollou pidän hajuttomalla Gitlerillä meistä , akoista ?Miun poijan salduatan tappo , nu min šie ruat – voina .A milma min tuačči vähiä ei tappan ?Kerran kopitan Joventavuššalda kodih murginalla , en jo i muissa midä šielä ruavoin .Enžistäh kuuluššin , a šiidä i dogadiin samol’otan , lendäy alahazena dorogan piällä miun päin .Lendäy , nin lendäy , vähä go heidä šilloin lendeli , kun reunašša , Jornovan pellolla , ajerodroma oli .
Šiidä kačon , ymbäri miušta dorogalla pölyzet kočitah .Täššä vašta dogadiin muššat rissit šiibilöillä .Kekšiin , miuh pahalane ammukšiu .Ammukši , a šiidä peitty mečän tagah , duumain , uidi ...Ei .Kačon , tuaš lendäy .Jo tagada päin , ušto pyörähti mečän piällä .Hot’ olin i šiändyn , a peityin konuavah .En ših rukah šurmua varaja , kun varajin tyttärie jättiä täh ilmah , vet’ jälgimmäzet kakšozet vielä školah käveldih .
– Muissan , muissan . Myö monen olima Kuz’mičan pihalla , a šie haravanke viijit kylä verejistä i ravajit : "Prokl’uatoi Gitleri , mänetät šie voinan , jo kun Germanista šua samol’ottie työnnät tappamah akkoida "!Ken ollou meistä rubei nagramah : "Ogru tiedäy , miän liey Pobeda "!A Pobedah šua oli jiännyn vielä enämbi kahta vuotta .
Jeudi rubei nagramah i Ogru hänellä yheššä .
Ogru i Jeudi
карельский: собственно карельское наречие
Новописьменный тверской
–
–
–
–
–
–
–
–
Балакирев Николай Михайлович
Огру и Евди / Аграфена и Евдокия
русский
-
-
"
"
"
-
-
-