Тексты
Вернуться к списку | редактировать | удалить | Создать новый | История изменений | Статистика | ? Помощь
Puavil suari Agripan ies
Puavil suari Agripan ies
карельский: ливвиковское наречие
Новописьменный ливвиковский
23 Tossupiänny Agrippa da
Verenika tuldih kaikes omas ylähyös , da astuttih yhtes torapiällikkölöin da linnan herrumiehienke suureh zualah . Festu käski tuvva Puavilua
24 i sanoi : "Suari Agrippa da kaikin muut , ket oletto tiä meijänke !
Täs näittö miehen , kudaman täh jevreit Jerusalimas dai tiä joukol tartuttih minuh da yhteh iäneh kirruttih : händy ei sua jättiä hengih .
25 No minä näin , häi ei luadinuh nimidä mostu , mis pidäs händy suudie surmah . No gu häi iče tahtou piästä keisarin suvvon edeh , otin mielen työndiä händy sinne .
26 Minul vai ei ole nimittumua tarkua tieduo hänes , ku kirjuttua herrale .
Sikse toin händy teijän edeh , enne kaikkii sinun edeh , suari Agrippa , gu jälles kyzelendiä minul olis midä kirjuttua .
27 Minuu myö ei ole tolkuu työndiä kiiniotettuu dorogah sanomattah , mis händy viäritetäh ".
26:1 Agrippa sanoi Puavilale : "Nygöi voit paista omas puoles ".
Sit Puavil nosti käin da puolisti iččie nämil sanoil : 2 "Suari Agrippa !Pien iččie ozakkahannu , ku voin tänäpäi sinun ies puolistua iččie kaikis niilöis dielolois , kudamis jevreit viäritetäh minuu !3 Sinähäi perinpohjin tiijät jevreilöin kai eländytavat da heijän kiistat .
Sendäh ole moine hyvä , tirpa da kuundele minuu .
4 Kai jevreit tietäh , kui minä nuores ijäs algajen elin omal roindurannal dai Jerusalimas .
5 Hyö jo ammui tietäh minuu , i vai tahtotanneh , voijah tovendua : minä olin fariseinnu da sidä periä elin meijän uskon kaikis jyrkembän sektan mugah .
6 A nygöi seizon suvvon ies sendäh , ku nad՚eičemmos sih uskalmoh , kudaman Jumal andoi meijän tuattoloile .
7 Tämän uskalmon täytyndiä nad՚eijahes nähtä meijän rahvahan kaksitostu rodukundua , konzu heittelemättäh , yöt dai päivät , sluužitah Jumalale .
Sen nad՚oužan periä , suari Agrippa , jevreit minuu viäritetäh .
8 Miksebo teile se on uskomatoi , ku Jumal nostattau kuolluzii ?
9 Minägi enne smietiin , minul pidäy täytty vägie torata Iisus Nazariettalazen nimie vastah .
10 Muga ruavoingi Jerusalimas . Suaduu ylimäzis pappiloispäi vallan , panin tyrmäh äijii jumalanuskojii , i nostin käin sen puoles , ku tappua heidy .
11 Äijän kerdua minä muokkain heidy kaikis sinagougis , ku tahtoin pakoittua heidy kiruomah Iisussua , i agjattoman tavan vallas ahtistin heidy en vai omal mual , a vierahisgi mualois .
12 Nämis dielolois minä lähtin Damaskah , suaduu ylimäzis pappilois vallan da käskyn .
13 No sit matkas olles , hyvä suari , puolenpäivän aigah näin , kui taivahaspäi läimähtih päivästy valgiembi valgei , kudai valgai minuu da minunke matkuajii .
14 Myö kaikin langeimmo muah , i minä kuulin , kui iäni sanoi jevrein kielel : "Saulu , Saulu , mikse vihuat minuu ?
Vaigei sinul on mennä veičen teriä vastah ".
15 Minä kyzyin : "Ižändy , ken Sinä olet "?
Ižändy sanoi : "Minä olen Iisus , kudamua sinä vihuat .
16 Nouze jalloilleh . Minä jiäviimmös sinule , ku luadie sinuu minun käskyläzekse da sen tovendajakse , midä näit nygöi da midä minä vie jiävin sinule .
17 Minä piästän sinuu sinun oman rahvahan da Jumalua tundemattomien rahvahien käzis , kudamien luo sinuu työnnän 18 avuamah heijän silmii , anna hyö kiännyttäs pimies valgieh da sattanan vallas Jumalan puoleh .
Konzu hyö ruvetah uskomah minuh , heijän riähkät prostitah heile da hyö suajah sija Jumalan pyhitettylöin joukos ".
19 Juuri tämän täh , suari Agrippa , en voinnuh olla noudamattah tädä taivahallistu nägyy .
20 A enzimäi Damaskas da sit Jerusalimas , sit joga puolel Juudiedu dai Jumalua tundemattomien rahvahien keskes sanelin , gu pidäy hyllätä riähkät , kiändyö Jumalan puoleh da ruadua moizii ruadoloi , kudamis nägyy se kiännyndy .
21 Tämän täh jevreit tavattih minuu jumalankois da tahtottih tappua .
22 No Jumalan avul piäzin nämih päivih suate , i kačo , nygöi seizon täs sanelemas sego pienile , sego suurile .
Nimidä muudu en sanele , vaiku sidä , midä ennustettih Jumalan iänenkandajat da Moisei : 23 se on – Messiel pidi tirpua kuolendugor՚at , enzimäzenny nosta kuollielois da sanella valgien tulendua , kui meijän rahvahale , mugai Jumalua tundemattomile rahvahile ".
24 Konzu häi nenga puolisti iččie , Festu sanoi korgiel iänel : "Puavil , sinä et ole tolkus ! Kniigat on sevoitettu sinun piä ".
25 No Puavil vastai hänele : "Tolkus olen , arvožu Festu .
Midä pagizen , se on tozi da tervehel piäl sanottu .
26 Tiedäyhäi suari nämä dielot , sendäh hänele voin paista kohti .
Nikui en usko , ku mitahto nämis dielolois olis hänes peitetty – eihäi se olluh kustahto čökinčupus .
27 Uskotgo Jumalan iänenkandajii , suari Agrippa ?
Tiijän , uskot ".
28 Agrippa vastai Puavilale : "Smietitgo , nenga kebjieh luajit minus hristossalazen "?
29 "Kebjieh libo jygieh ", sanoi Puavil . "Annakkah Jumal , ku ei vai sinus , a kaikis muisgi , ket minuu tänäpäi kuunnellah , roittas moizet , ku minä , vai ilmai nämii čieppilöi ".
30 Sit suari nouzi , muaherru da Verenika sežo , dai muut heijänke istujat nostih .
31 Lähtijes hyö paistih keskenäh : "Tai mies ei luadinuh nimidä mostu , mis händy vois tappua libo panna tyrmäh ".
32 Agrippa sanoi Festale : "Tädä ristikanzua voinnus piästiä , ku häi ei eččinys keisarin suuduo ".
Puavil suari Agripan ies
карельский: ливвиковское наречие
Новописьменный ливвиковский