Тексты
Вернуться к списку | редактировать | удалить | Создать новый | История изменений | Статистика | ? Помощь
Anni Vlasova. Tapahtumie karjalaisen kulttuurin alalla Piäjärveššä
Anni Vlasova
Tapahtumie karjalaisen kulttuurin alalla Piäjärveššä
карельский: собственно карельское наречие
Новописьменный севернокарельский
Tahon
kertuo lehen lukijilla mimmosie tapahtumie karjalaisen kulttuurin alalla Vienan Virta -šeuran jäšenet vietettih Piäjärven Karjalaini pirtti -etnokulttuurikeškukšešša tämän vuuvven kešän ta šykyšyn aikana .
TAPUAMINI KOULULAISIEN KERA
Kešän alušša pitimä vaštavukšen Piäjärven ta Sohjanankošen koululaisien kera , ket opaššutah karjalan kieltä kerhoissa .Tilaisuš tavan mukah oli vietetty Karjalaisešša pirtissä ta še oli tovellah mukava .Enšin piäjärviläiset näytettih pieni Meččämökki-näytelmä , kumpasen oli kiäntän karjalakši Valentina Saburova .Tuntu , jotta keräytynyillä vanhukšilla ta ošanottajilla miellytti esityš , kummaista myö kuuvennen luokan opaštujien kera valmistima kahen kuukauven aikana .Šitä ennein tämä spektakli jo oli esitetty Voitonpäivän juhlašša .
Šiitä yleisön huomij uo vallattih meij än vierahat , kumpaset tultih meijän luokši omien kašvattien kera .Himottau enemmän kertuo heistä .
Sohjanankošen koulušša karjalan kielen kerhuo yhen kerran netälissä vetäy kylän kirjašton johtaja Nina Grigorjeva .Še on mukava , jotta häntä aina autetah kulttuuritalon johtaja Jelena Ligotskaja ta aktivisti Zinaida Ust’ugova (hiän on Ninan čikko ).
Naiset yheššä käyväh kouluh ta šiitä pyhinäpäivinä pietäh harjotteluja kulttuuritalošša .Tuntuu , jotta še on antan hyvie tulokšie , vet heijän kašvatit 1.-4.luokkien opaštujat – oikein reippahašti esitettih pienie näytelmie , laulettih karjalaisie ta karjalakši kiännettyjä lauluja , esimerkiksi , Päiväsen pyörä -lauluo .
Šen lisäkši Nina taitavašti veti koko ohjelman – hiän kerto , mimmosie kerhoja hyö vietetäh ta kuin järješšetäh omua toimintua .Kaikki lapšet leikittih , tanššittih , arvual’tih arvautukšie .Tanššiloissa apuna oli Kuranova Katerina , šamoin hiän šäješti ni meijan esityštä .Viimekši joima čäij yö kalittojen kera .
Tapuamini mäni oikein hyvin , nyt voimma ottua esimerkkie sohjanankoškilaisista .Voisin lisätä vain , jotta meij än piirissä on vain yksi kulttuuritalo , missä näin kannatetah karjalaista kulttuurie .
PIÄJÄRVEN KYLÄPRUASNIEKKA
Heinäkuun toisena päivänä Piäjärven kylä juhli oman peruštamisen 50-vuotispäivyä .Meijän karjalaisšeura aktiivisešti otti ošua juhlah .Niin , myö valmistima omien tuottehien myönti-näyttelyn – šiinä oli kuvotuja mattoja , villašukkie , kukkatauluja , tilkkukukloja .Katerina Kuranova kučču lapšie leikkimäh karjalaisih kisoih .
Šen lisäkši myö olima piirin kyykkäottelun piäjärještäjinä .Kilpailu vietettih Karjalaisen pirtin pihakentällä .Peluajat tultih Kalevalašta , Louhešta , Tunkutjärveštä ta Piäjärveštä .Voittajiksi piäštih kalevalalaiset .
Kolmannen šuuren tapahtuman järještimä elokuušša , Kantakanšojen päivänä .Tavan mukah Piäjärven nellä joukkuo pelasi kyykkäh , a šiitä kaikin yheššä kaččojien kera pyörimä kruukašša .Šen jälkeh kostittima peluajie čäijyllä kalittojen kera ta kertoma heilä omašta työštä .
Šamoin kešällä meijän luokši kävi ta tuttavušti meijät omah uuteh tevokšeh Marija Kundozerova , Karjalan tietokeškukšen ruataja .Hiän on meijän Piäjärven kyläštä .Še tevoš oli juštih "Kiestinkin šeuvun kertomušperinnehtä ", mi kiinnošti kuuntelijie , ta vielä kaikin šuatih kirjat lahjakši .
KEKRINPÄIVÄN VIETTÄMINI
Šeurava pito tapahtu vašta šykyšyllä , še oli Kekrinpäivä .Ka tapuamisen alušša myö muistelima ihmisie , ket oli jätetty meijät tänä šykyšynä .Hyö ollah šeuran jäšenet – entini opaštaja Tamara Mihailovna Padarina , hänellä oli 85 vuotta , ta Sergei Jakovlev , meij än piirin taitaja karjalankielini runoilija , kumpani niin äkkie ta vuottamatta šiirty tuonilmasih vaikien šairaukšen jälkeh .Ikuni muisto .
Vanhua karjalaista pruasniekkua Kekrie myö pitimä jo viijettä kertua .Tavan mukah kertoma mitä olemma ruatan tämän vuuvven aikana .Totesima , jotta olemma toimin hyväkšetyn šuunnitelman mukah , šeurasima kaikkie karjalaisie pruasniekkoja ta tapahtumie .Šeuran jäšenet tilatah ta luvetah Oma Mua -lehtie , kirjutetah karjalaisien uutisista sosialiverkoissa .
Šiitä monet kerrottih omista lempiharraššukšista , šuurin piirtein paissetuista piiraista , äšen šulččinoista , kumpasie myö mielellänä maistelima .
Muamonpäivän kunnivokši lauloma lauluja Katerina Kuranovan šäješšykšellä .Šen lisäkši kulttuuritalon ruataja Jelena Sergejeva opašti keräytynyitä aikuhisie ta koululaisie tanššimah karjalaisie tanššija .
Oli mukava ilmapiiri , kiittimä kaikkie ošallistumisešta , a esittäjät šuatih lahjakši anhelija ta šyväimie olešta .Kuččuma kaikkie muasteri-oppih , jotta tuttavuštuo täh tekniikkah – floristiikkah , šen vetäjänä oli Anni Vlasova .
Šamoin myö Piäjärven teatterikerhon kera , kunne käyväh koululaiset , ottima ošua Karjalaini šuarna -kilpailuh lapšien kešen .Lähettimä festivali-kilpailuh Meččämökki-videofilmin ta šaima šiitä diplomit .
Karjalaini pirtti nyt aina on auki .Etnokulttuuriseh keškukšeh käyväh kyläläiset opaštumah karjalan kieltä ta kutomah kankašpuilla , a vierahat tullah tutuštumah meijän ruatoh .Myö olemma valmehet ottamah vaštah kaikkie – tulkua tervehenä !
Tapahtumie karjalaisen kulttuurin alalla Piäjärveššä
карельский: собственно карельское наречие
Новописьменный севернокарельский