Тексты

Вернуться к просмотру | Вернуться к списку

Kui Houkku Toven osti

История изменений

07 ноября 2024 в 14:27 Нина Шибанова

• создал(а) текст
• создал(а) текст: Osti Houkku bazaril Toven. Hyväh hindah osti, et midä sano. Maksoi sit kolme mielettömiä kyzymysty da vie järilleh kaksi potkuu sai sduačakse. Dai lähti astumah. Ga hyvä on sanuo – lähti astumah. Toven astuo ei ole kebjei. Ken oppi, se tiedäy. Suuri se on, Tozi, jygei. Ajua sil – et aja, kandua yskäs – loitokse et piäze. Ribaittau Houkku omua Tottu, vaibui. Ga žiäli on lykätä, den’gathäi on maksettu. Tuli kodih odva-odva. – Kusbo olit, Houkku? tartui häneh akku. Sellitti Houkku kai, kui dielo oli. Yhty vai ei voi sellittiä, mikse se Tozi pidäy, midä sen kel ruadua. Viruu Tozi keskipihua, nikudamih aiduveriälöih ei syndynyh. Urai akan kel piädy kubaitetah – midä sen kel ruadua, kui sidä hoz’aisvah pujoittua. Kiänneltih yksin-toizin, nimidä ei vuidi. Minbo ruat – nikunne se tozi ei päi. – Mene, sanou akku Houkale, – myö oma Tozi. Äijiä älä kyzy, min annetanneh, segi hyvä. Yksikai tolkuu sit Toves ei ole nimittustu. Höntiäy Houkku bazarile. Seizatui hyväh kohtah, hol’aittau: – Tozi! Tozi on myödävänny! Kelle Tottu – kiirehtä ostamah. Ga niken ei osta, niken ei kiirehtä. – Rahvasrukat, iändäy Houkku. – Ostakkua Tozi – huogeheh myön. – Ei, sanotah rahvas. – Meile sinun Tottu nimikse ei pie. Meil on oma, ostamatoi. Sit tulou Houkalluo yksi Mielevy. Punohes Toves ymbäri, kyzyy: – Midä, brihačču, Tottu myöt? Äijäsgo myöt? – En äijiä kyzy, ihastui Houkku. – Annan passibos. – Passibosgo? Rubei miettimäh Mielevy. – Ei, se on liijan kallis minule. Ga sit tuli vie yksi Mielevy da sežo rubei hinnoittelemahes. Hinnoitettih, kačeltih da piätettih ostua yksi Tozi kahtele. Käit loškattih toine toizele. Leikattih Tozi kahtekse. Rodih kaksi puoldu. Jogahine Puolitozi oli kebjiembi da pädevembi, migu kogonaine Tozi. Kaksi aiga hyviä Puolitottu – tules vai kaččomah. Astutah kaksi Mieleviä bazarii myöte, kaikin heidy kadehtitah. Sit toizetgi Mielevät heijän jyttyöh ruvettih ičelleh Puolitoziloi hommuamah. Leikatah Mielevät Tottu, Puolitoziloi luajitah. Nygöi heile on äijiä kebjiembi paista keskenäh. Silloi, konzu pidelis sanuo: “Sinä olet ilgei padin!” – voibi sanuo: “Sinul on paha taba”. Huigiettomua voibi sanuo baloušiekakse, kielastelijua – huaveilijakse. Tädägi Houkkuu nygöi niken Houkakse ei sano. Houkkua sanotah “ristikanzu, kudual on oma mielikandu”.