Тексты
Вернуться к списку | редактировать | удалить | Создать новый | История изменений | Статистика | ? Помощь
Kuuzi torvensoittuo
Kuuzi torvensoittuo
карельский: ливвиковское наречие
Новописьменный ливвиковский
6 I
net seiččie anhelii , kudamil oli seiččie torvie , varustettihes puhaldamah torvih .
7 Enzimäine anheli puhaldi torveh . I tuli raistu da tuldu , verenke segai net oli lykätty muah . Kolmas vuitti muadu paloi , i kolmas vuitti puulois paloi , i paloi kai vihandu heiny .
8 Toine anheli puhaldi torveh . I buitegu suuri tulel palai mägi lykättih mereh . Kolmas vuitti meres muutui verekse , 9 i kolmas vuitti kaikis meren elävis kuoli , i kolmas vuitti laivois hävii .
10 Kolmas anheli puhaldi torveh , – taivahaspäi pakui suuri tiähti palajen gu tulirobl՚o . Se pakui kolmandeh vuittih jogilois da vien nouzemile .
11 Sen tiähten nimi oli Kargei heiny , i kolmas vuitti kaikis vezis rodih kargei gu kargei heiny , i äijät rahvas kuoltih vien periä , gu se rodih kargei .
12 N՚elläs anheli puhaldi torveh . Sit hullai kolmanden vuitin päiväzes , kolmanden vuitin kuus da kolmanden vuitin tiähtis . Net pimettih kolmandeksel : kolmas vuitti päiväs oli pimei , muga pimeni i kolmas vuitti yös .
13 Sit minä näin kotkan , kudai lendi keskitaivahal da kuulin , kui se kirgui kovah : "Gor՚a ! Gor՚a ! Gor՚a niilöile , kudamat eletäh mual ! Midä rodieu , konzu puhaldetah torvih vie kolme anhelii "!
9
1 Viijes anheli puhaldi torveh . Sit minä näin taivahaspäi muale pakkunuon tiähten . Sille annettih pohjattoman havvan avain ,
2 i se avai sen havvan . Siepäi nouzi savvu gu suures päčis , se savvu pimendi päiväzen dai ilman .
3 Savvuspäi lähtiettih muale čirkat , i niilöile annettih moine valdu , mittuine valdu on mual skorpionoil .
4 Niilöile oli sanottu ei vahingoittua ni muan heiniä , ni midä muudu vihandua , ni puuloi , a vahingoittua vai rahvahii , kudamil ei ole očas Jumalan pečattii .
5 No niilöile ei annettu tappua heidy , a vai muokata heidy viijen kuun aigua . A muokku , kudaman hyö tuvvah rahvahile , on gu muokku skorpionan n՚uokkuandas .
6 Niilöinny päivinny rahvas ečitäh surmua , no ei löytä . Hyö tahtottas kuolta , no surmu pagieu heis .
7 Čirkat net oldih gu torah val՚l՚astetut hevot . Piäs niilöil oldih gu kuldazet venčat . Niilöin rožat oldih gu ristikanzan rožat , 8 a tukat oldih pitkät gu naizil . Niilöin hambahat oldih leijonan hambahien jyttymät ,
9 i niilöil oldih rynnässuojat gu raudusovat . Niilöin siivis lähti jymy , gu ajettashäi torah äijy kärryy , kudamii täytty juoksuu vietäh hevot . 10 Hännät da pystimet niilöil oldih gu skorpionoil ; hännis niilöil oli vägi vahingoittua rahvahii viijen kuun aijal .
11 Suarinnu heil oli pohjattoman havvan anheli , jevrein kielel hänen nimi on Avaddon , a gretsien kielel – Apollion .
12 Proidii enzimäine gor՚a . No jälles tulou vie kaksi gor՚ua .
13 Kuvves anheli puhaldi torveh . Sit minä kuulin , kui Jumalan ies olijan kuldazen altarin n՚elläs sarves tuli iäni , 14 kudai sanoi kuvvendele torvenke olijale anhelile : "Piästä niilöi n՚elliä anhelii , kudamat ollah sivoksis suuren Jefratjoven rannal ".
15 I oli piästetty n՚elli anhelii , kudamii piettih valmehennu täh čuassuh , päiväh , kuuh da vuodeh niškoi , gu hyö tapettas kolmas vuitti kaikis rahvahis .
16 Heil oli toramiehii raččahis kaksikymmen tuhattu kerdua kymmene tuhattu , minä kuulin niilöin luvun .
17 Nengozinnu minä näin hevot da niilöin selläs istujat minun nävys : raččumiehil oldih tuliruskiet , sinizet da keldazet gu rikki rinduravvat ; a heboloin piät oldih gu leijonan piät , niilöil suus tuli tuldu , savvuu da rikkii .
18 Nämien kolmen pahuon täh – tulen , savvun da rikin täh , kudai tuli heijän suulois – kuoli kolmas vuitti kaikis muailman rahvahis . 19 Heboloin vägi oli heijän suus da hännis . Hännät oldih gu mavot , niilöil oldih piät , kudamil hyö luajittih vahinguo .
20 Loput rahvas , kudamat ei kuoltu nämien pahuzien täh , yksikai ei kiännytty iäre omien käzien pahois ruadolois . Muga hyö iellehgi kumardeltihes karuloile da kullas , hobjas , bronzas , kives da puus luajittuloile valehjumaloile , kudamat eigo voija nähtä , eigo kuulta , eigo kävellä .
21 Hyö ei kiännytty iäre ni tapandas , ni tiedovoičendas , ni karguandas , ni varrastelendas .
Kuuzi torvensoittuo
карельский: ливвиковское наречие
Новописьменный ливвиковский
1
Откровение святого Иоанна Богослова (Апокалипсис). 8:6-13 - 9:1-21
русский
1