Тексты
Вернуться к списку | редактировать | удалить | Создать новый | История изменений | Статистика | ? Помощь
Aleksandra Lesonen. Poika, kumpani šuatto
Aleksandra Lesonen
Poika, kumpani šuatto
карельский: собственно карельское наречие
Новописьменный севернокарельский
Art’om Popov on
12-vuotini poika Koštamukšešta .Hiän jo kolmatta vuotta opaštuu karjalan kieltä kurššiloilla .Täh harraššukšeh prihua toteutti hänen Marina-muamo .
Heti enšimmäisen tunnin jälkeh Art’om maltto , jotta karjalan kieli miellyttäy häntä ta jo omalla taholla jatko opaštumista kurššiloilla yheššä opaštajan Marija Urbanovičin kera .
Art’om Popov opaštuu Koštamukšen Juakko Rugojevilla nimitetyššä 1.koulušša kuuvvennella luokalla .Karjalan kieli ei kuulu koulun opaššušohjelmah , koululaiset opaššutah šuomen kieltä .Karjalan kieltä täššä opaššušlaitokšešša opaššetah ošana koulun ulkopuolista toimintua , ka ei Art’omin luokalla .
AHKERA OPAŠTUJA
Art’om Popovin vanhemmat , kuin ni kaikki kantatuatot , ollah karjalaiset .Muamo on šyntyn Kemin piirin Šomman pos’olkašša , a tuatto – Puanajärven kyläššä .Perehen šyvih karjalaisih juurih kaččomatta , pojan muamo ta tuatto ei paistu karjalakši , ka šäilytettih rakkahuon muamonkieleh .
Marina-muamo muistelou , jotta konša hiän šai tietyä karjalan kielen kurššien avajaisista Koštamukšešša , ni šamašša kirjuttautu niih ta otti matkah ni nuorimman pojan .
– Mie kolme vuotta opaššun karjalan kieltä yheššä Marija Urbanovičin kera . Enšimmäisen kerran mie tulin kurššiloih muamon kera , a šiitä miun ičenki tuli mukava opaštuo karjalua , vet še on miuh muamonkieli , koroštau Art’om .
Priha kertou , jotta hänellä on mukava ta helppo opaštuo kieltä , ka toičči on jykie panna muistih uušie šanoja .
– Mie motivoičen iččie harjottelujen jatkamiseh šanuon , jotta še on miun muamonkieli ta šillä paistih miun kantatuatot . Karjalan kieleššä milma miellyttäy šen kajahtelu , šiinä on hyvin äijän kaunehie šanoja .Toičči koissaki myö pakajamma karjalakši muamon kera .Miun vanhempi veikko ta tuatto ei tiijetä kieltä , vaikka tuatto vähäsen malttau .Tietyšti , miun himottais käyttyä kieltä missänih vielä kojin ta kurššien lisäkši .Toivon , jotta konšanih šemmoni mahollisuš löytyy , šanelou miun pakinakaveri .
Kirššiloilla Art’om opaštuu yheššä aikuhisien kera .Onnakko poika konšana ei jiä takapajulla , ka vielä ni rikeneh ohittau kurššitoverijah kielen käyttöhotošša .Aikuhiset staraijah ottua häneštä esimerkkie .
Vienankarjalan kielikurššija pietäh kakši kertua netälissä – yksi tunti vietetäh online muuvvošša ta toini – Družba - kulttuuri - ta urheilukeškukšešša .Kurššien opaštajana on Marija Urbanovič .Hiän on Jyškyjärveštä šyntysin olija karjalaini .Marija lopetti Petroskoin valtijonyliopisson itämeren-šuomelaisen ošaššon .
KIELEN TAIVAL NYKYMUAILMAŠŠA
– Karjalan kieli on miun muamonkieli .Karjalakši paistih miun kantatuatot ta vanhemmat .Lapšuošša koissa aina kuulu karjalaini pakina .Milma ei opaššettu pakajamah , ka mie maltoin mistä on pakina .Mie läksin karjalan kielen kurššiloih , jotta opaštuo pakajamah muamonkielellä , kertou Marina Popova .
Naisen Ol’ga-čikko niise käypi kurššiloih , a šiitä Marina piätti ottua šinne pojanki , jotta priha muistais juurijah .
– Jo enšimmäisen harjottelun jälkeh Art’om šano , jotta häntä miellyttäy karjalan kieli . Poika helpošti panou muistih vaikeita šanoja , tottaš karjalan kieli on hänen geenilöissä .Nyt myö voimma paissa koissa karjalakši , yheššä šuoritamma kotitehtävie , šanelou Marina .
Naista oikein miellyttäy , jotta poika niise tykkyäy karjalankielisie lauluja .
– Šen lisäkši myö Art’omin kera olemma karjalaisen kulttuurin Viena-šeuran jäšenet . Miula šeura on kuin toini talo .Milma miellyttäy pityä karjalaista pukuo .A šuovattoina myö Art’omin kera käymmä kaupunkin musejoh tanššimah karjalaisie tanššija , ylpeilöy pojan muamo .
Marina Popova aina kiinittäy huomijuo šiih , jotta hiän ei pakota prihua .Art’om iče piätti , jotta karjalan kieli ta kulttuuri ollah hänellä lähiset .
Art’om Popov tahtou iellähki tutkie karjalan kieltä ta perintehie .Niin pojan harteillah karjalan kieli jatkau omua taivalta nykymuailmašša .
Poika, kumpani šuatto
карельский: собственно карельское наречие
Новописьменный севернокарельский
–