Тексты
Вернуться к списку | редактировать | удалить | Создать новый | История изменений | Статистика | ? Помощь
Šašina Maria . Hänel oli midä sanuda lugijoile
Šašina Maria
Hänel oli midä sanuda lugijoile
вепсский
Младописьменный вепсский
Vastusele
kerazihe ristitud , ked navediba Nikolajad , ked sebrastiba da radoiba hänenke , kelle oliba mel’he hänen taidehradod da ked muštaba vepsläšt runoilijad nügüd’-ki .
Ehtan vaumištiba Paginkluban ühtnikad da "Randaine "-ansambl’ , mitte zavodi necen vastusen vepsläižil pajoil .Ezmäi pajanikad ihastoitiba adivoid "Ajagam külähä " -pajol .Sen pohjas om tetab äjile vepsläižile Nikolai Abramovan runo .
Täl vodel Nikolai Abramovale täuduiži 64 vot .Kut om tetpas , hän läksi elospäi kanman ičeze 55-vottušt jubilejad – 23.päiväl vilukud .Kut äjan hän voiži völ ehtta , kut äjan tehta vepsän rahvahan hüvüdeks !Vastusel hänen sebranikad opalas pagižiba , miše nece surm oli tehnus lujas aigoiš , muštliba händast vaiše lämil , čomil vaihil .
Vastusen adivoile ozutadihe Nikolajan fotoid da videoid , starinoitihe hänen elos .Nikolai sündui vodel 1961 vepsläižes Ladv-küläs Piterin agjas .Vodel 1978 hän lopi Vidlan školan , a jäl’ges openzihe Piterin topografižes tehnikumas , Petroskoin valdkundaližes universitetas da Karjalan pedagogižes institutas .Hän radoi sovhozas , piloramas , kul’turpertiš , lehtmehen "Süvärin lämoid " -lehteses i "Suomalaiž-ugrilaižes lehteses ".Äi vozid Nikolai radoi "Kodima "-lehtesen pätoimitajan , a hänen jäl’gmäine radsija oli Karjalan Rahvahaližes kirjištos .
Nikolai Abramov oli tetaban ristitun suomalaiž-ugrilaižes mirus .Hän oli eripoližen mehen – lahjakahan fotokuvadajan , kändajan , kirjutajan , lehtmehen da mugažo artistan .No ezmäi kaiked händast tetas vepsläižen runoilijan .Hänen ezmäine kirj "Koumekümne koume " oli paindud vodel 1994, i se oli ezmäižen runokirjan vepsän kelel .Vastusel johtutadihe Armas Mišinan sanad Nikolajan polhe : "Runotusehe tuli mez’ , kudambal om ičeze mod , ičeze än’ .Hänel oli midä sanuda lugijoile .Ezmäižel kerdal pagiškanzihe vepsläižen mehen heng , kudamb armastab kodiröunad , kodiman mecad da jogid , kudamb om holiš ičeze rahvahan da külän elo-ozas ".
Nikolai Abramov kändi vepsän kel’he äi mirun literaturan klassikoid .Heiden keskes oma Omar Hajam , Uiljam Šekspir , Aleksandr Puškin , Lev Tolstoi , Sergei Jesenin , Nikolai Kl’ujev , Boris Pasternak , Jevgenii Jevtušenko , Nikolai Rubcov , Vladimir Visockii da toižed .Muštehtal kului äi Nikolajan runoid da kändmižid .Jogahine paginik lugi miččen-se armhan Nikolajan runon .Kaikuččel se om ičeze .Suomalaiž-ugrilaižen školan openik Stanislava Šašina lugi Nikolajal kätud Aleksandr Puškinan runon .
Vastusel Nikolajan sebranikad da läheližed starinoičiba ičeze muštlotesid hänen polhe .Ozutesikš , mušteltihe , kut Nikolai kirjuti Vladimir Putinale , konz tahtoi sada tedoid siš , omik Venäman prezident vepsläine .Mušteltihe mugažo , kut äjan hän ajeli madme , kut äi hüvid azjoid hän ehti tehta .Vepsän kelen opendai Nadežda Petrova sanui : "Ku pagišta Venäman literaturan polhe , ka sureks runoilijaks tobjimalaz kuctas Aleksandr Puškinad , a ku pagišta vepsän rahvahan runotuses , ka
sur’ runoilii om Nikolai Abramov .Kaikiš vepsän kelen openduzkirjoiš om Nikolai Abramovan runoid vai starinoid .Hänen runoid lujas navediba lapsed .Hän mahtoi kirjutada muga , miše lapsed lujas kebnas paneba runoid muštho .Hänen panend vepsän kelen kaičendaha om lujas sur’ .Meile ei täudu händast .No Kol’a eläb runoiš , fotoiš , pajoiš , kirjutesiš ".
Ehtan adivod taričiba tehta mugoižid vastusid Nikolai Abramovan muštoks jogahižel vodel .Kaikutte toivob , miše se linneb hüvän tradicijan .
Hänel oli midä sanuda lugijoile
вепсский
Младописьменный вепсский