Тексты
Вернуться к списку | редактировать | удалить | Создать новый | Статистика | ? Помощь
Nadežda Mičurova. Valentina Kondratjeva: karjalazen eloksen kirjuttai
Nadežda Mičurova
Valentina Kondratjeva: karjalazen eloksen kirjuttai
карельский: ливвиковское наречие
Новописьменный ливвиковский
Anuksen
kanzallizes kirjastos piettih karjalazen kirjuttajan Valentina Kondratjevan vuozipäiväle omistettu Pädis tarattua livvikse-vastavus .
K evätkuun 21. päivänny Valentina Kondratjeva täytti 75 vuottu .Valentina Mihailovnan nimi on hyvin tuttu anukselazile da karjalazen literatuuran suvaiččijoile .Häi kirjuttau runoloi da kerdomuksii prostoil da čomal karjalan kielel , mittumal paistih enne hänen roinduhierus Issoilas (nygözes Immalas ).Sen merkittih äijät vastavuksele tulluot .Hyvittelemäh nimipäivyniekkua kirjastoh tuli Valentina Kondratjevan omua , dovariššua da karjalazen lugemizen suvaiččijua .Heijän joukos Anuksen rahvahan horat "Terveh , briha " da "Karjalan koivu ", kus Valentina Mihailovna pajatti viizitostu vuottu .Pajojoukkoloih niškoi Valentina Kondratjeva kirjutti šuutkakkahat runot , muuzikan niilöih pani anukselaine säveldäi Nikolai Riškin .Erähii pajoloi sai kuulta vastavuksen aiguagi .A Anuksenlinnu-pajuo kai sanotah Anuksenlinnan gimnakse .Sidä pajuo pruazniekkuvastavuksen allus pajatti Karjalan koivu -hora .Jälles sananvuoron otti iče nimipäivyniekku .
KAI ALGAVUI ŠUUTKAKKAHIS PAJOLOIS DA ČASTUŠKOIS
Runosuoni Valentina Kondratjeval puhkei vuvvennu 2005, konzu häi penziele lähtiettyy tuli pajattamah Anuksen naizien horah .Enzimäzien runoloin joukos oldih "Vesselät kezäkižat ", "Minun ukko ", "Kuldoi nukahtih ", "Anuksenlinnu ".Ei yhty kerdua Valentina Kondratjeva lugi omii runoloi Täs synnyinrannan minun algu -literatuurufestivualin aigua , a vuvvennu 2010 kai rodih Brendojevan nimizen literatuurupalkindon laureatakse .
KAI ON OTETTU ELOKSESPÄI
Ylen äijäl Valentina Mihailovna suvaiččou kirjuttua juumorupajoloi da -kerdomuksii .Histourieloi da sanoi niilöin kirjuttamizeh häi kai ottau omas eloksespäi .Vastavuksen aiguagi Valentina Kondratjeva ei ruvennuh igävöimäh , nägratutti kaikkii omil kummakkahil juumoruistourieloil .Hänen jälles toizetgi ei jiädy bokkah .Alavozen taigin -teatrustuudien artistu Valentina Libertsova lugi hänen kirjutetun šuutkakkahan runon , kudamah on segai pandu sanua ven’an , suomen da karjalan kielel .A Alavozen taigin-teatrustuudii toi Valentina Mihailovnale lahjakse uvven Kolme keppisty-spektaklin karjalan kielel .Sen kirjutti alavozelaine Vera Larionova .Teatrustuudien artistat ozutelman aigua pajatettih Valentina Kondratjevan sanoih kirjutetun pajon .Karjalan koivu -horan ohjuaju Larisa Fofanova pajatti vesselii častuškoi karjalan kielel yhtes Teveh , briha-joukon miehienke .
KAIKEN LASKOU OMAS SYVÄIMES LÄBI
Vastavuksen aigua oli merkitty , gu Valentina Kondratjeval on tovelline kirjuttajan nero .Häi hyvin maltau kuvata ristikanzan elaigua , ozua , syväinkibuloi da mielii .Kaiken sen häi laskou omas syväimes läbi .
– Valentina Mihailovna on mieldykiinittäi da kuulužu kirjuttai Anuksen čupul . Ainos , konzu suammo Oma Mua -lehten libo Taival-al’manuahan hänen kerdomuksienke , kerras tartummo niidy lugemah .Häi kirjuttau ylen hyväl karjalan kielel .Ylen äijy sie löydyy toiči unohtettuu sanua , sanondua da sananpolvie .Valentina Mihailovna kirjuttau sidä , midä on ristikanzan mieles .Äijy on hänel mostu runuo da kerdomustu , kudamii lugiettuu nagrat tävven vačan .Myö hänele toivotammo vie enämbän mieldykiinittäjiä kirjutustu da uuttu kniigua .A myö niidy mielihyväl rubiemmo lugemah , sanou Valentina Libertsova .
KAHTES KNIIGAS TATAN DA MAMAN ELOSTU
Valentina Kondratjeval on piässyh ilmah kaksi kniigua .Enzimäine "Kaksi pedäjiä " nägi päivänvalgien vuvvennu 2012, a kuvven vuvven peräs oli painettu Ozan tiešuarat -kogomus .Kyzymykseh kui häi rubei kirjuttamah kerdomuksii , Valentina Mihailovna vastai , gu ylen äijäl himoitti kirjuttua maman elostu da kirjuttigi .Enzimäzes omas Poluudittu syväin -kerdomukses Valentina Kondratjeva sanelou omas inkeriläzes muamas , kudai piäzi kahtes vangiluageris läbi da jäi hengih .Ozan tiešuarat -kniigu sanelou enämbän Valentina Kondratjevan tuatan da hierun elostu : kui tuatto kazvoi , sluuži Leningruadas da voinan aigua sai jygien satatuksen kädeh .Sih kaččomattah ruadoi kai miehien ruavot .
– Konzu minä enzimäzen kerran luvin "Kaksi pedäjiä ", en voinnuh nikui azettuo . Luvin loppussah .Sehäi kai pidi omas ičeš läbi laskie .Valentina Mihailovna on ylen hyvä karjalaine kirjuttai da ristikanzu .Häi on enzimäine meijän abuniekku .Mittuine pido ollou kirjastos , kučummo .Gu voinnou , ainos tulou .Kui sanotah karjalazet : vilu vezi juodavakse – ruisleiby syödäväkse .Undu da nälgiä .Tervehytty Valentina Mihailovnal da uuttu kirjutustu !sanou Galina Fedulova , Anuksen kanzallizen kirjaston Kodialovehliteratuuran ozaston johtai .
Pädis tarattua livvikse -vastavuksen aigua kuului äijy hyviä da lämmiä sanua Valentina Kondratjevan puoleh .Hyvittelemäs händy oldih kai virguniekat Petroskoil da Anuksespäi .Valentina Mihailovna on luadinuh suuren panoksen karjalazen literatuuran kehittämizeh da uskommo vie kirjuttau äijän midä omal armahal karjalan kielel .
Valentina Kondratjeva: karjalazen eloksen kirjuttai
карельский: ливвиковское наречие
Новописьменный ливвиковский