Тексты
Вернуться к списку | редактировать | удалить | Создать новый | История изменений | Статистика | ? Помощь
Kibir Vasilii . Vologdu
Kibir Vasilii
Vologdu
карельский: ливвиковское наречие
Новописьменный ливвиковский
Konzubo aigu
menöy ylen hil'l'ah ?Lapsennu .
A mibo menöy kaikkii teriämbi ?Sežo lapsestusaigu .Rodi ei olluh ni huoles , ku meni enämbi kuudu hänen roindupäiväs .Läheni keskikezä .Jogi madaldui da hilleni huogavuu syvis vongis keviän peränajandas .Vienpiäl hil'l'azeh uitah mullozet puunlehtet , havut , pienet oksat .Šapšu-jogi huuhtelou pienii suarukkazii da madalikkoloi .Sen hil'l'azel rannal seizou tostu kymmendy laudahistu kaksifatierahistu kodistu .Kodizien da joven välis menöy tie , a sen vieres on ainavo jallaikäveltävy lavvois luajittu n'okoh .Nygöi sidä myö astutah Rodi da muamah .Lapsien päiväkoispäi , kudai seizou mägyčäl kylän agjas , heijän kodissah on kaikkiedah askeldu kaksisadua .Kaiken sen matkan Rodi on ihan vaikkani .Häi taputtau pölyhizii laudoi myö kulunuzis kottazis da rippuu muaman käis .Häi särähteleh , ga täytty vägie oppiu peittää särizendän da ihastuksen .A kuibo toizin !Huruan käin kainalos , kuduan kynäbrys on lujasti painettu kylgeh , on migami !Se ei ole sanottavu nikel .Rodi tahtoi kerras jo päivykois sanuo muamalleh sih näh .Häi eihäi nikonzu nimidä peitä , ga tänäpäi oli mindählienne huigei sanuo , ku hai peitoči pani šižälih zuavessizen omas kravattizespäi .Häi tiedäunimipäivyniekale annetah lahjua , a Lenazel huomei on roindupäivä .Avoi kui häi ihastuu , konzu nägöy iččeh kravattizel uvven zuavessizen !
Lapsien päiväkois heidy toizet lapset niäritelläh .Toiči joukolleh hyö kirrutah : Sulhaine da andilas , ollah yhtes taiginas !
Sit roih ylen abei , ga hyö Lenazenke moizil kerroil sevätähes da punaldetahes sellin mängyjis lapsispäi .
-E-eh !Rodi hyväs mieles muheloittau da kačahteleh ymbäri .Hänen koin vastaspäi , ihan Sapšu-joven rannal , on tahnut-kylän brihaččuloin piälimäine taloi .Huondeksil häi suvaiččou kaččuo , kui vietetäh ruadoh suurii heboloi .Himoittau teriämbi kazvua suurekse da ičel opastuo ohjuamah nengomua hebuo .Gu ei olis hevonkaččojua ,vois nygöigi oppie !A koza Mus'ka , misbo on pahembi ?Vai on pienembi , ga häi yksikai ajelou sil selläs !Nu ga olgah , olgah .Nygöi ei sih päivy pasta .Onnuako , pidäy miärätä zuavessistu ezmäi omah kravattizeh , gu ei pidäs jälles hätkie hälistä Lenazen luo .
Koispäi muamah kerras lähti laukkah .Häi menöy hätkekse .Nygöi sie vastavutah rinnaleläjän naizenke da ruvetah tarattamah ...
"Sem'onovna , minun koza mindäh lienne pahoi rubei syömäh . Etgo tiijä , mil vois parandua ", sanou onnuako muamah .Häi sih näh taratti lapsien päivykoispäi tulles kaiken matkan .
"Sit ruvetah kielii tahkuomah , paginua kestäy tukkunazekse čuassuu ", duumaččou Rodi , dai toizet vuoros seizojat akat tartutah paginoih , dai myöjy sežo : roih paginua !
Rodi heitti piäl merimiehen takkizen , otti hienot gu batistahizet zuavessizet da miäräili kravattizeh .Net oldih parahite .Vot vai nuorazet peityttih ombeluksen sydämeh , kuibo nygöi net suat siepäi ?Polvilleh seizojen häi kaikelleh opii riuhtuo niidy .Nuorazet oldih marlis punotut .
Sen ruavon ruadajes Rodi ei ni kuulluh , kui muamah kiändyi d'engoi ottamah - unohti kodih .
- Oh sinä Vologdá , sinä Vologda ! varaittajen pajattau muamah .Tabavuksis toiči häi nenga nimittäy poigua .Tuattah on vologdalaine , sendäh se nimi tartui poigahgi olet ihan gu tuattas .Muamah painottau kovembah sanan jälgimästy tavuu i sil nengoman čoman sanan muuttau ylen abiekse .
Muamah iänen kuultuu hämmästynnyh Rodi säbjähtih , pöllästyksis punaldih hänehpäi da säristen kobristi ozattoman zuavessizen .
-Varras !gu uravuksis mängyy muamah . Kus sinä nečen otit ?!
Minun poigu on varras !Sano !
Häi riuhtuau zuavessizen eigo anna vastata , vai pergau sil turbieloi šokkazii da pohjattomakse mustennuloi silmäzii vaste .Kargiet kyynälet kirvotah silmis , ga Rodi seizou vaikkani gu puuhine .
—Ah ! mängyy muamah .- Sinä midäbo vaikastat ?! Vai nagratgo minuu ?!Rodi tahtoi sanuo midä lienne ga muamah nygöi jo käski koval pahal iänel : Vaikastu !Vaikastu !Vaikastu !
Omah mängyndäh libunuh , muamah riuhtai remenin da rubei pergamah Rodii kunne puuttuu .Häi iändi :
-Ulvo !Ulvo !Ulvo !Varras !Varras !Varras !Jälgimäi tabavunnuh muamah tabai hallon :
-Täh tapan !
Häi viuhkahutti hallon , a Rodi vai seizou gu kivine .Halgo lendäy čuppuh .Muamah heittyy stuulale , täytty vägie itköy , niistäy neniä da abiesti kiruou .
Hänen iänändäh juostol tuli rinnaleläi feršali , tiputti hänele kuppizeh valerjankua .Rodi hyppäi pihale da juoksi tahnuoh .Häi painoi šokan Mus'ka-kozan lämmiä šulkuštu piädy vaste da rubei täytty vägie itkemäh .Tirpamatoi tusku täytti hänen pienen ryhdähän da säräitti rungua .Häi jo tiedäy-varrastus on pahembi migu toruandu libo st'oklan murendandu , sendäh gu se luajitah peitoči , sellän tagua .Varras !Jokse häi on nygöi varras ?!Eihäi häi sidä tahtonuh , häi tahtoi ihan muudu .
Koza igävästi kaččou tuskavunnuoh ristikanzah .On žiäli , gu kozat ei malteta paista .Onnuako Mus'ka löydänys sanat , kudamil vois rauhastuttua brihaččustu .Nygöi se vai syvästi hengästelih .Muamah tuli tahnuoh pahal mielel da vaikkani riuhtai poijan kozaspäi .Muaman silmät jo kuivettih i rauhattah läpetettih .
-Nygöi lähtemmö Nina Stepanovnan luo , iče sen annat hänele , huolittau muamah .
Häi ozutti hyvän kiirehen poijale , iče itki da saneli oman tabavuksen feršalile .Muamah tahtoi kuitahto oijustuakseh Rodin ies da suaja prosken'n'an , ga ei löydänyh pädevii sanoi , a iče tiezi , tämä vastumielivys pidäs teriämbi loppie .Sendäh häi nareko šupettau gu iändäy :
-Tuattas enämbäl andanus , gu vai tiedänys !
Ga Rodi sidä paginua ei kuule .Häi astuu buuristuksis silmät painettu muah , särähteleh ikoituksenke itku ei vie alevunnuh lopussah .Pahal sanal puhtahakse abeitettu , häi joga askelel öntästeleh , iče hurual käil painau ryndähäh muršittuloi zuavessizii .Pehmieh kyynäliz kastunuoh käin selgämeh oli tartuttu Mus'kan villat .Merimiehen takkizen rindu oli avvoi , paidaine nouzi štanizien sydämespäi , tukat niäs levälleh .
Heile vastah astutah naizet oksienkarzijat , miehet puuloinkuadajat da pilailijat .Ruadajat kiänytäh mečäspäi .
Lapset juostah hypitäh päiväkoispäi , ozutellah kielii da ihastuksis täytty vä - gie mängytäh :
-Rod'ka Begletsov zuavessizet varrasti !
Nikui ei sua arvata , kuspäi hyö tämän ehtittih tiijustua .Ga Rodi rounu ei ni kuule heijän iänii .Häi astuu piä painuksis .länet perretäh piälakkah da kibiesti annetahes korvujuurih : bu-bu-bu , ga-ga-ga .
Pikkarazes päiväkoin piälikön pertizes on mugavu da hil'l'u .Dai iče Nina Stepanovna on gu se pertine pikkaraine harmai inehmine pitkis haluatois , kudai korrottau händy .Heijän nähtyy naine lähti stolan tagua , ei andanuh muamalleh ni suudu avata , kykistih kuolendassah pahasmieles seizojan brihaččuzen edeh .Hyväntahtojat muheloittajat silmät roittihes Rodin silmien tazal .Naine kiirehettäh kaivoi zuavessikuakkuzen sormuizis , net oli muga kobristettu ga kai rystyizet vallettih , sit silitteli brihačun piähytty .
- Lähtin , nečidä joi , minä laukkah .., ei voinnuh tirpua , rubei sanelemah häbevynnyh muamah .Hänen rožat roittihes ruskieloil tačmoil , käzii ei malta kunne panna .Hänen hengitys uvvessah jugeni .
-Olgah , olgah , ei pie paista sih näh , piälikkö varuau , aku muamah sevoittau da pahendau dielon .
Ylen abei itku säräitti brihaččustu , häi tartui häbevynnyön Nina Stepanovnan kaglah da itki äijiä abiembah , migu enne sidä , konzu händy žiälöittih .Nina Stepanovna žiälöijen kandelou Rodii yskäs , sebiäy iččiedäh vaste kallattavalleh , brihačču on suuri , ga nygöi vahnan naizen silmis häi on gu pikkaraine .
- Myösgo työ löittö händy ? vihazel iänel šupettau häi muamale siiriči mennes .- Ebävoivazeksego tahtotto luadie ?!
- Ga , vähäzel , puolistau iččie muamah ,- älä jumal anna , gu tuattah tiijustannou ...
Häigi rubei niistämäh neniä , huigevuksis punaldih čuppuh .
-Emmohäi myö ottanuh nikonzu ni kopeikkua vierastu , a konzugu toiči ryypännöy minun neče , ga omih , velgah emmo pakiče , vihazel ylbevyksel loppi paginan muamah .
Kodih hyö kaikin lähtiettih yhtes .Rodi ku uidau päiväkoin piälikön käzil .Händy puistau vilus , häi nukahteleh .Kois Rodii pannah pehmiele postelile , se on typitty vasteniitetyl vihandal heinäl .I uvvessah , kui kuu enne tädä , brihaččuine unimielis kuulou rahvahan iänet , eroittau feršalin kuulužan iänen , astieloin kalizuksen .Rodi ellendäy : nygöi häi on voimatoi hänes pietäh hyviä huoldu , händy arvostetah .Nygöi parandetah ei tuattuadah vai händy .Kainaloh azetetah viluttavu gruadusniekku , očale pannah märgy käzipaikku
Vologdu
карельский: ливвиковское наречие
Новописьменный ливвиковский
Вологда
русский
-