Тексты
Вернуться к списку | редактировать | удалить | Создать новый | История изменений | Статистика | ? Помощь
Sem’onov P’otr . Nieglikko da jänöi
Sem’onov P’otr
Nieglikko da jänöi
карельский: ливвиковское наречие
Новописьменный ливвиковский
Jänöi
vastavui nieglikonke da sanoi :
– Nieglikko , sinä kaikin puolin olizit hyvä , vaiku sinun jallat ollah koukulleh da astujes sinä öntästelettös .
Nieglikko tuskevuksis sanoi :
– Sinä midäbo irvistät ? Minun viäryjallat juoksendellah kirkiembäh sinun oiginazii .Nygöi ama vai pyörähtelemmös kodih , a sit juoksemmo kiistah !
Nieglikko meni kodih da sanoi akale :
– Minä kiistin jänöin kel , tahtommo juosta kiistah !
Nieglikon akku sanoi :
– Sinä , nägyy , uravuit ! Kuibo sinä voit juosta kiistah jänöin kel ?Sen jallat ollah vikkelembät , a sinun ollah viärät da tupakot .
Nieglikko vastai :
– Sen jallat ollah kirmiembät , a minun mieli on raviembi . Vaiku sinä azu , kui minä käsken .Läkkä pellole .
Sit net tuldih kynnetyle pellole jänöin luo .Nieglikko sanoi akale :
– Sinä peity täh vavon agjah , a myö jänöin kel juoksemmo vavon
toizes agjaspäi .Konzu se libuu juoksemah , minä kiännyn järilleh .
A konzu se juoksou sinun agjah , sinä lähte da sano :
– A minä jo ammui vuotan .Se sinuu ei tunnusta .Duumaiččou , se minä olen .
Nieglikon akku peityi vavon agjah ,a nieglikko jänöin kel lähtiettih juoksemah vavon toizes agjaspäi .
Jänöi vai libui juoksemah dai nieglikko kiändyi järilleh da peityi
vavon agjah .
Jänöi juoksi vavon toizeh agjah .Kaččou ,ga nieglikon akku jo
sie istuu .Se nägi jänöin da sanoi sille :
– A minä jo ammui vuotan !
Jänöi ei tunnustannuh nieglikon akkua da duumaičči :
– Mibo kummii on . Kuibo , nečidä , se piäzi ielepäi ?
– Nu , sanoi jänöi , – opimmo vie kerran juosta !
– Opimmo ! vastai nieglikko .
Jänöi yrrästih järilleh , juoksi toizeh vavon agjah ,kaččou – a nieglikko jo sie on , da sanoigi :
– Ohoh , velli , sinä vaste nygöi tulit , a minä jo ammui täs olen .
– Mibo kummii on ! duumaiččou jänöi .– Kui ravieh minä juoksin , a yksikai minuu se jätti jällele . Ga sit juoksemmo vie kerran , nygöi jo et piäze edeh .
– Juoksemmo ! sanoi nieglikko .
Hypästeleh jänöi , mi vai oli vägie .Kaččou : nieglikko istuu ielpäi da vuottau .
Silleh jänöi juoksendeli vavon agjas toizeh , kuni ei väzynyh .
Jänöi sanoi sih :
– Iellehpäi nikonzu en rubie kiistämäh .
Nieglikko da jänöi
карельский: ливвиковское наречие
Новописьменный ливвиковский
–
–
–