Тексты
Вернуться к списку | редактировать | удалить | Создать новый | Статистика | ? Помощь
Valentina Libertsova. Täl kohtua oldih voinan dorogat
Valentina Libertsova
Täl kohtua oldih voinan dorogat
карельский: ливвиковское наречие
Новописьменный ливвиковский
Alavozen kyläs
Voitonpäivänny da sidä vaste piettih äijy kunnivvo - da mustopiduo .
Voitonpäivän vaste mašinat , kuduat suatettih kodoilah studentoi , kyläläzii , duačniekkoi , ajettih flaguloil čomendettuu dorogua myöte .Ymbäri nävyttih puhtahakse kabrastetut pihat .Alavozen škola tavan mugah pidi subotniekat .Školan opastujien jytyi kylän laukoin dai toizien laitoksien ruadajat sežo ruvettih kabrastamah omii paikkoi .
Voitonpäivy on Alavozen kylän parahii pruazniekkoi .Ihan täs , nygözen Anus-joven randua myö kylgiän "Valpas-sinizen " dorogan sijas oldih Anuksen da Karjalan vällälepiäständymatkat Sviri-Luadogan bojuoperatsien aigah .Ihan täs vihaniekat perustettih vangiluagerit .Sillostu nälgiä , juotatustu , atkaloičendua vie nygöigi kyynälsilmis mustellah alaigäzet vangit .Tänäpäi hyö tagavoruadajienke ollah piälimäzet pruazniekas – kahtel lauččazel sijoituonnuot , enimmytteh naizet , kudualoil puutui kestiä jygiet vuvvet da ozat .
Voinuveteruanat
Heidy terväh ei jiä nikedä .Meijän ainavo voinuveteruanu Boris Vasiljevič Kornišov , kudai jo jälles kylän vällälepiäständiä astui seiččievuodizen voinumatkan , ken jälgivuozin vältämätä tervehtii omii kyläläzii , tänäpäi ei voinnuh yhtyö pruazniekkah voimattomuttu .Toivotuksen hänele tervehytty da pitkiä igiä kaikin vastattih käzienpläkytyksil .
Ihastuksekse , löydyi gostien keskes Tuuloksen hierun eläi – Mihail Ahtiev .Tuuksen hieruh rodivunnuh Mihail F'odorovič puutui voinale kuuzitostuvuodizennu brihannu .Konzu händy käskiettih mikrofonalluo , enzimäine sana oli karjalakse : "Terveh !".A sit puhtahal ven'an kielel hyvitteli ristittyzii Voitonpäivänke da ylbeillen ližäi , ku hänen nelli poigua nygöi ollah armies sluužbas vahniminnu ofitsierannu .
Ičel Mihail F'odorovičal ei piädynyh puuttuo ofitsierakse "voinan aijan zakonoin mugah ".Sil ammuzel 1944 vuvvel häi parahannu loppi pulem'ottu-batal'onukursat Severodvinskas .Vastuonalaine da mielevy kursantu työttih opastumah ofitsieroin ämmättiopistoh .Onnuako kahten nedälin peräs opastundu loppih - tarkastajat tiijustettih , ku hänen tuatto oli repressiiruittu .Sit jälles oli viizi vuottu sluužbua Pohjazes merilaivastos , kus Mihail F'odorovič vastai omamualazen Anuksen piirin brihan F'odor F'odorovič Koškinan , kudai jälles sai Geroi Sotsialističeskogo truda - arvonimen .Kui sanotah , miero on ahtas , a karjalazet toine tiozele ainos ollah omat .
Jälles voinua Mihail F'odorovič ruadoi Tuuloksen meččyruadokeskukses Anuksen lohkol , sit eläkkehele lähtendiä vaste - Videlen souhozas .Veteruanan ryndähäl suau nähtä äijy palkindomerkii .
Hyö pyzytäh kuolemattomat , kuni heidy mustammo
Yksisama hyö ollah täs , toizele ilmale mennyöt voittajat , voinuveteruanat , kuduat vie ei ammui annettih rohkevuon urokkoi .Nygöi hyö kačotah meih fotokuvis , kudualoi tarkah kannetah "Kuolemattoman polkan " joukos heijän lapset , vunukat , pruavovunukat .Hyö kačotahgi meih fotokuvis , kudamat keräi ozutteluh "Hyö puolistettih Roindumuadu " kul'tuurutaloin foijeh Valerii Kirillov .Heile olemmo kiitollizet omas elaijas .
Nygösty kolonnua ei sua jagua virgoi da ruadosijoi myöte – astutah perehilleh , paiči kuvii kannettah , venkoi , kukkii , ilmumiäččylöi .Jogahizel ryndähäl on näbei Georgien lentaine .Tunduu , enämbi astuu lastu , tiettäväine , škola on tänäpäi kylän aluskivi .
Pajot , runot , tansit – kembo sanoi "vahnattih "?
Jälgimäine kohtu , kuduassah menöy "Kuolemattoi polku ", on velleskalmu , kus tavallizesti pietäh Alavozes Voittopäivän miitingoi .Sydämellizet voinan aijan pajot kučutah yhtymäh pidoh .Miitingas ei kuulu tuhjii herroin paginoi .Vai Alavozen administratsien johtajan Irina Filinan lyhyöt hyvittelysanat .Piähenginny ollah lapset , vedäi Ol'ga Bogdanova vai "sidou " runot yhteh voitto-rauhallizeh joundeheh .Runoloin lugijat ollah moločat .Nägyy , ku monii vuozii Alavozen školas varustetah da pietäh perindöllizii Voitonpäivän runokilboi .Kunnivovardoičukses tavan mugah seizotah kymmenenden kluasan opastujien junarmeiskoin "Viktorija "-joukon ozanottajat .Hyö juatahgi Georgien lentazii .
Suuret tarkat ruavot azui Alazet-stuudien johtai Irina Palatina .Joga päiviä lapsile piettih rohkevuon urokkoi .Paginkanzoinnu urokoil oldih ruadoveteruanat , virguniekat , Bojets - sportukluuban ozanottajat .
Miitingu loppih Voitontiähti - flešmoubal .Voinanaigallistu val'sii tansuittih eriigäzet rahvas .Enzimäzikse libui opastajien puaru - Viktor Borisovič Tunkel' , afganskoin voinan veteruanu , da hänen mučoi Jelena Valerjevna .
Myöhembi Alavoizen kul'tuurutalois ozutettih suuri Voitole vastah - pruazniekkukontsertu .
Täl kohtua oldih voinan dorogat
карельский: ливвиковское наречие
Новописьменный ливвиковский