Тексты
Вернуться к списку | редактировать | удалить | Создать новый | Статистика | ? Помощь
Anna Usova. Ijän kestäi ystävys. 2
Anna Usova
Ijän kestäi ystävys. 2
карельский: ливвиковское наречие
Новописьменный ливвиковский
ANTONINA TALANOVAN ELOS
Toine L’udmila Vladimirovan ystävy on kaikis vanhin .Se on Antonina Nikiforovna Talanova .Naine rodivui Kondupohjas vuvvennu 1931.Hänel oli kymmenes vuozi , konzu zavodih Suuri voinu .Vahnin sizär oli ruadanuh Jaltas , keskimäine jäi puolistusruadoloih , a Ton’a muamanke ajettih evakkoh Taškentah .Naizen mustos eletäh kuvat täs pitkäs da vaigies matkas .Konzu poujezdu azetui , kai lapset , ku linduzet , ečittih peldoloil midätah syödäviä .Nälgyhäi kaikil oli .Konzu kentah ei ehtinyh nosta omah vagonah , heidy otettih saldattoin vagonoih , mugai kaikin uvvessah puututtih omielluo .Kerran azetuspaikal heijän poujezdah , kudai kerdyi kolmes vagonas , ajoi Stalin-nimelline parovozu .Ton’an vagonas 78 ristikanzas hengih jiädih vaiku 13 hengie .Toizet kaikin palettih .Ton’an muamo löydi tyttären lavvoin välis .Lapsi oli äijis skittish palanuh da kaksi luudu oli katkattu , ga ozakse hengih jäi .da vetty .Tuldih Sverdlovskassah .Muamo lähti kuččumah liäkärii lapselluo .Ei ni äijy aigua oli mennyh , ku rahvas ruvettih šupettamah da ozuttamah Ton’ah päi .Tämängo tytön muamo on kuolluh .Vuidi muga , gu tytön muamo puutui poujezdan uale .Sit Ton’a puutui lapsien kodih .Nelli vuottu lapsien kois lennettih ku linduzet .Nellitostu igähizenny tyttö lähti remeslennoih opistoh , kus opastui kaksi vuottu .Opastunduaigua heidy harjaitettih ruadamah stankoil .Ton’a oli pieni kazvol , sendäh ruavon aigua hänen jälloin uale pandih kolme pualiččastu , gu häi täydynys stankassah .Moine oli ruadai .Stankoil varustettih kriepindyozii samol’ottah niškoi .Opastumine loppih i pidi lähtie ruadoh zavodale .Ton’a kaiken aigua tahtoi löydiä sizäreksii .Häi tiezi , ku yksi voi eliä Jaltas .Se mugagi oli .Myöhembi vahnin sizär saneli , kui voinan aigua häi ruadoi nemtsoin perehes .Jygiet päivät net oldih nuorel tytöl .Jygei ruado , sen ližäkse händy perrettih da piettih puoles nälläs .Söi tyttö sidä , midä ehti tavata počin syömizis enne poččiloin tulendua kartalluo .Kaksi kerdua tyttö pageni , ga händy tavattih da tuodih uvvessah samale paikale .Tämä sizär ajoi Karjalah voinan loppiettuu da rubei elämäh Kondupohjas .Häi oppi löydiä omahizii , ga eibo vuidinuh .A T’ona ruadoi zavodal Sverdlovskas da igävöičči omua roindupaikkua da arbaili , jäigo kedätäh hengih omahizis .Häi piätti lähtie roindumuale Kondupohjah .Zavodan johtai kovah kieldi lähtemäs moizeh pitkäh matkah , ga uskaldi ostua lipun poujezdah .Matkan aigah Ton’al varrastettih čamodanan da kai dokumentat .Loppujen lopukse Ton’a taki puutui omah Kondupohjah da löydi sie vahnemban sizären .Hyö hätken itkiettih konzu ellendettih , ku ollah mollei hengis .Vahnin sizär kyynälis läbi kerdoi , gu kaikin piettih händy kuolluonnu .Sizärekset mendih arhiivah eččimäh Ton’an dokumentoi .Heile annettih roindutovestuksen koupien da Petroskois luajittih uvven pasportan , niilöin suaduu Ton’a kerras lähti opastumah dorogulaborantakse .Kolmen kuun peräs häi jo puutui ruadoh , ga palku oli ylen pieni .Nuorele neičykäle himoitti ei vaiku syvvä , ga i šuorivuo .Häi piätti lähtie asfal’turuadoloih .Jygei oli ruado , ga sie maksettih hyvin .Avtokolonnas löydyi brihagi , kudai myöhembi tuli hänen miehekse .Ton’ale annettih eländyperti .Brihan muamo ruadoi yhtes Ton’anke dorogal .Tytöl tuli himo vaihtua jygei ruado kebjiembäh .Kerran brihan muamo tuli da kučui Ton’ua elämäh heijänke .Mugai pereh rodih .Ruadogi uuzi löydyi .Leibymašin pideli täyttiä leiväl da ajella šouferinke laukkoi myö da purgua sie tuovut leivät .Vuvvennu 1953 laukalluo Nina vastai inehmizen , kudai rubei pagizuttamah händy .Naine mainičči adresin , kus eli Ton’a .Se oli sizär , kudai jäi puolistusruadoloih .Häi tuli Urualalpäi .Nygöi kaikin kolmei sizärekset kerävyttih yhteh .Oppikkua vai smiettie : kaikin kolmei jiädih hengih .Mittuine ilo da oza se oli heil sanua vaigei löydiä .Sizär kerras kučui Ton’ua Urualale .Ton’a silaigua jo oli miehel , kazvoi poigaine .Nuori pereh lähti gostih Urualale , ga ei tulluh miehel se paikku mieldy myö .Šahtan pölys lumi da kai mua ymbäri oli mustu .Tuli perehel lähtie järilleh kodih .Ton’al rodih vie yksi poigu .Mugai elos meni .Nygöi Antonina Nikiforovnal jo ei ole nigo lapsii , nigo miesty .Kaikin jo kuoltih .Ilokse jiädih tyttöbunukku da kaksi suurdu pruavobunukkua .Antonina Nikiforovnal lähti jo 93 vuozi , ga häi vie on streppan .Kois kai iče ruadau , pezöy sobii , kabrastau pertilöi , keittäy syömizii , laukkahgi kävyy .Sanou , iče spruavimmos , ei pie minule nimituttu abuu .Vie Antonina Talanova suvaiččou gribah kävvä .Joga vuottu omale ičele daigi kaikile ystävile niidy keriäy .L’udmila Vladimirovalgi jiäškuapas on gribatuomastu Ton’aspäi .Nämä naizet vastavuttih Veteruanoin nevvostos , kudai ruado Kl’učevaja-mikropiiris .Antonina Talanova kerras rodih L’udmilan enzimäzenny abuniekannu joga dielos .Tänäpäi naizet jo huogavutah niilöis hommis , ga vastavutah L’udmila Vladimirovan kois , juvvah čuajuu sego mustellah elettylöi vuozii .A mustella heil kaikil on midä .Himoittau toivottua jogahizele lujua tervehytty , pitkie igiä , hyviä mieldy da ku heijän ystävys kestäs vie monii vuozii .
Ijän kestäi ystävys. 2
карельский: ливвиковское наречие
Новописьменный ливвиковский