Тексты
Вернуться к списку | редактировать | удалить | Создать новый | Статистика | ? Помощь
Ol'ga Žukova. Baban uudimed
Ol'ga Žukova
Baban uudimed
вепсский
Младописьменный вепсский
Meiden
tätüižed ištuba divanal .Mö Lena-sebranikanke vändam baban fateras .Sobitam da udes rušim meiden tütrid , veretam heid magadamha .Minä homaičin stolal jättud babal nitid neglanke .
– Lena , ombelkam tätüižele platjo .
– Ombelkam ! – sanub Lena , – ka , tarbiž mitte-ni ruzuine löuta .
Minä kacuhtin sinna – tänna ...
– A čapkam palaine uudimespäi . Naku kacu , miččed čomad , änikoidenke ripuba päčin taga , magadandhonusehe mändes .
– A babaiž ei käregande meiden päle ? – küzub Lena .
– Ei , hän ei homaiče-ki .
Lena pidäb uudimen röunan , a minä čapan raudaižil palaižen , kehkeran , ani ümbri änikos .Naku om čoma , omblem tätüižele platjon .Mö tartuim radho .
Pordos päliči tuleb baboi lehmäd lüpsmaspäi .Hän mäneb keitimpolhe , sehloičeb i valab maidod bankoihe .Sid’ tuleb honusehe , kus mö vändam , i ohkahtab :
– Ka mi nece uudimele tegihe , mikš mugoine röun-se rebinu ?
Baboi kosketab uudimen i kacuhtab meiden polhe :
– Neičukaižed , ken necen radoi ? | – küzub baboi .
– En minä , – sanub Lena .
Minä mugažo sanun :
– En minä .
A ved’ minei i pähä ei tulend , miše hubin radoim .Vaiše nügüd’ el’genzin i pöl’gästuin baban käreidust .
A baboi kaiken el’gendab , rad om jo tehtud , uudimed om travd’ud ,midä lapsid laida ,nägub , miše varaidaba , ei pahas meles tehtud azj , a vändos .
– Toižel kerdal meletagat , midä voib tehta , a midä ei , – sanub baboi , – i küzugat minai , ku midä-ni tarbiž .
Nügüd’ minä olen jo kaznu , no igän muštan laps’aigan vändoid .I sen azjan , miše en rohtind sanuda , ken uudimed čapoi .Minä ostin babale uded čomad uudimed , i ühtes hänenke mö johtutim aigad , konz minä olin penen neičukaižen
Baban uudimed
вепсский
Младописьменный вепсский
–
–
Бабушкины занавески
русский
–
–