Тексты
Вернуться к списку | редактировать | удалить | Создать новый | Статистика | ? Помощь
Nina Zaiceva. Sit' - sarnaline jogi. 02.pala
Nina Zaiceva
Sit' - sarnaline jogi. 02.pala
вепсский
Jogelpäi
mändes Hanh’ sanui , miše homen homendezzor’al lähteb Sit’-jogen ülä -
ladvoile , eskai koumeks päiväks lähteb .
– Sinei hüvä om , – hengahti Sergei . – Kuna tahtoid , sinna lähted-ki .
– A kenak sindai pidäb . – Ed-ik varaida maman lepkišpäi erigata ?
Sergei oli vaikti .Hänen tagut sanui Tan’aine :
– A sinä ala händast pagištoita .Hän ei lähte .I ala händast lepkiden täht värita .
– Ka en minä värita-ki , en pagištoita-ki . I ičeinke nikeda en kucu .Ika otad mugoižen vällän da veda händast ičeze selgäl .
– Nece mindai-se vedada !? – Sergei abittui , i hänen sil’mäd tegihe kehkeroikš . – A muštad-ik , kut Malejevkas olim ? Surele sole ...
– Muštan , muštan ! Ka nügüd’-ki läksižin , ku ei olend öks .
– Ka naku-se om-ki ! Ödumata ka urad-ki läksiži .
– Ota mindai , – ühtnägoi sanui Tol’ka .
– Lähted-ik koumeks öks ? – küzui Hanh’ .
Tol’kan polhe sanutihe , miše hän om varaidai , kuti jäniš , i niken en varastand hänespäi mugoižid sanoid .
– Ka midä ! Voin !
– Nu sinei tatoi jäl’ghe andab-ki ! – sanui Tan’aine .
– Sinä-se vaikti ole , sindai niken ei küzu . Tat iče starinoiči , miše edel kogonaižile nedalile käveliba jogele .
– Hot’ oli-ki muga , a sinei putub hänespäi , – ližazi möst Tan’aine , kudamb ei tahtoind , miše Hanh’ läksiži mecha üksnäze .
– A mikš sinä pöl’göitad ? – kärauzihe Hanh’ hänen polhe . – Jose iče läksižid minunke ? Ka lähtkam !Siloi jo nikeda ota en , – ližazi hän .
– Urad oled ! – ruskoni Tan’aine . – Minä sinunke eskai školha-ki üksnäin en läksiži .
– Ka siš om-ki azj ! – nagrdes sanui Hanh’ . – Minä en ole merimez’
Baltikaspäi . Sinä ed lähte minunke , sikš ku en ole bohat , a niššat .– Hän sül’gi hambhiš läbi .
– Oled sinä huiktatoi ! Urad !– Tan’aine eskai seižutihe , ei voind löuta sanoid . – Neičukaižed , jägam heišpäi . Mängha hö edehepäi .
Koume neičukašt , kudambad oliba noremb Tan’ašt , vaikti seižutihe hänennoks , kactes prihaižiden jäl’ghe .
– Baffal oled ! Kacum , kut Sitiš poikpoli ujuid !... – sanui Tan’aine .
Neičukaižed oliba vaikti .Voib olda , om-ki muga , ku Tan’aine sanub .Hän om jo aigvozne , tahtoib olda lekarin , i kaik tedaba , miše Aleksei Laškov , konz tuleskeli tal’vel lebule , kucui händast kaks’ kerdad kinoho .Ka hö oliba ühtes tancuil-ki .
I sen-žo aigan , küläs kaik teziba , miše lapsed tartuteliba händast Vas’ka Hanheze , miš heile kodiš putli vicad .Küläs meletadihe , miše Hanh’ om mugoine kundlematoi , i nimidä hüväd hänespäi ei voi sada .
– A minä ka Vas’kanke en varaidaiži mänmaha mecha , – argas sanui Maša R’abova , vaugedpäine neičukaine . – Hän neičukaižid nikonz ei abidi . Hän mindai-ki ei üht kerdad polesti ...
Tan’aine sanui vastha :
– Ka pakite .Voib olda , žalleičeb sindai da otab .
Maša ruskoni i ei löudand , midä sanuda sihe .
Ka midä sanud , ku Hanh’ om mel’he hänele .I hän ei ole-ki urad vai torakukoi !
A käveleb rebinudes paidas , sikš ku ei ole tatad .I mam om ühteta kädeta , ei voi sada dengoid kanzale .
Pagin hilleni , edemba astuiba vaikti .
Tan’aine oli r’azinsapkaižiš , miččed kuti jaloihe oliba valetud .Hän astui ezil , maihuten udel portfelil .Hänele oli tusk .Jo ei üht kerdad Hanh’ johtuti neciš merimehes .
I midä hän tedab sen polhe ?Aleksei-merimez’ tozi-ki kucui händast kinoho , biletad ostli , tancuile vedeli .Muga om-ki .Ka nu i midä ?Ved’ sen jäl’ghe Aleksei gul’ai L’uba Suvorinanke .Nügüd’-ki hö oma kirježiden vajehtesiš .Ka mikš siš pagišta !Midä oli , ka jo om unohtadud .
I sen-žo aigan Tan’a ei voind unohtada , miše tal’vlebud edel , Aleksejan tulendad edel , Hanh’ nikonz ei pagižend hänenke muga nagrdes .Hö openzihe ühtes viž vot , ištuiba eskai ühtel partal .I sen jäl’ghe , konz Vas’aine jäi videndehe klassaha toižeks vodeks , hö völ oliba sebranikoin .I pühäpäiväle i lebuks hö käveliba kodikülähä ühtes , i Vas’aine kandoi hänen sumkan .A kut-se ka i kandoi päliči ojas .
No talvlebun jäl’ghe kaik vajehtihe .Edel Vas’aine voiži kucta händast mecha , – ved’ edel hö käveliba muraškoid poimmaha , senid keradamha .Ka nügüd’-se hän ei läksiži Vas’aiženke …Midä tehta keväz’mecas ?A hän-se , kacu , nagroi hänen päl kaikiden edes !
"Ka olgha-ki muga , tacin händast päspäi ", – käredas meleti Tan’a . – "Nagrgaha !
Minä-ki midä-ni voin tehta !"
Sit' - sarnaline jogi. 02.pala
вепсский
–
–
Анатолии Петухов
Сить - таинственная река
русский
—
—