Тексты
Вернуться к списку | редактировать | удалить | Создать новый | Статистика | ? Помощь
Пехконен Маргарита. Starinat autetah čukeltuo šuomelais-ugrilaisih kielih
Пехконен Маргарита
Starinat autetah čukeltuo šuomelais-ugrilaisih kielih
карельский: собственно карельское наречие
Новописьменный севернокарельский
Venäjällä
toteutetah projektie , kumpasen rajoissa ammattinäyttelijät iänitetäh šuomelaisugrilaiskielisie starinoja .Karjala niise ošallistu alotteheh .
Piiteriläiset aktivistit toteutetah projektie nimeltä "Venäjän kanšojen iänet : Iänitetty kartta ".
– Projektin ideja šynty miun työkokemukšešta . Olin ollun teatterinäyttelijänä ta šiitä koitin iänikirjojen lukijana .Olen kotosin Permin alovehpiiristä .Šiitä šyyštä piätin , jotta projekti keškeyttyy šuomelais-ugrilaisih kielih .Še on keino šäilyttyä näitä kielie , projektin koordinattori Jekaterina Radosteva kertou .
Radostevan mukah projekti keškeyttyy kanšallisstarinoih , šentäh kun nämä starinat tuttavuššutetah perintehih .Projektie varoin valittih 25 starinua .
– Projektissa on mukana viisi kieltä : vepšä , karjala , šuomi , komiperm’akki , ersä ta mokša . Joka kielellä luvetah viisi starinua .Ečimmä starinoja šekä verkošta jotta kirjaštoloista .Ainehiston valinta tuntu erikoisen vaikielta .
Karjalan -, vepšän - ta šuomenkielisen ainehiston valinnašša projektin toteuttajie autettih Karjalan tutkimuškeškukšen Kielen , kirjallisuon ta istorijan instituutin asientuntijat .
– Meiltä kyšyttih , millä karjalan murtehella starina on kirjutettu . Lisäkši ratkaisima luatijanoikeuvukšie koškijie kyšymykšie , instituutin ruataja Svetlana Nagurnaja kertou .
Projektin ominaisuona on še , jotta starinoja luvetah kanšallisien teatterien näyttelijät .
– On miellyttävä , jotta kaikki ihmiset , ketä pyytimä liittymäh projektih , oltih valmehet ošallistumah šiih , Radosteva huomauttau .
– Olemma jo käynyn Permin alovehpiirissä šijottujašša Kudimkarissa tallentamašša starinoja komiperm’akin kielellä . Kun kuuntelima näyttelijien pakinua muamonkielelläh , kävi šelväkši , jotta heilä tämä ei ole eksottista , toimikunta kirjutti projektin VK-šivulla .
Muutoma netäli takaperin projektin toteuttajat käytih Karjalašša tallentamašša starinojen iänissykšie .Starinoja šuomen , vepšän ta karjalan kielellä luvettih Karjalan kanšallisen teatterin näyttelijät Julija Kuikka , Aleksandra Aniskina , Andrei Gorškov ta Ronja Kinnunen .
– Projekti on mielenkiintoni , šentäh kun še kannattau vähemmistökielie ta šen kautti niijen kulttuurie šemmosena aikana , kun muailmašša on äijän muutokšie . Ušein šemmosina aikoina unohamma herkäšti niin šanotut pienet ta vähemmän tärkiet kulttuurin ošat , ta šen kautti ne šuatetah kokonah kavota , Kinnunen kertou .
Näyttelijä on luken starinoja šuomen kielellä .
– Olen iloni , jotta šain kučun täh projektih , ta kannattamah kielen kulttuurikokonaisutta Karjalan alovehella . Olen luken starinoja ta luatin iänissykšie aikasemminki , ka tämä on enšimmäini kerta , kun olen mukana šemmosešša projektissa , näyttelijä jatkau .
Kinnunen on luken kolme starinua .
– Luvin starinoja , kumpaset ei oltu miula aikasemmin tuttuja , ta oli mielenkiintoista lukie mitänih hyvin tutulta kuulujua , ka uutta . Työ oli miula helppo , šentäh kun pakajan kieltä muamonkielenä , hiän jatkau .
Kinnusen kollega Julija Kuikka on luken starinoja vienankarjalakši .
– Olen kotosin Kalevalašta ta olen kuunnellun vienankarjalaista pakinua lapšuošta . Omakšuin kielen ämmöltäni ta opaššuin šitä koulušša .Vienankarjalan kielitaito autto milma šuomen opaštumisešša , näyttelijä kertou .
Iänissykšien tallentamisešša Kuikalla ei šyntyn vaikeukšie , šentäh kun hänellä on jo ollun kokemušta tällä alalla .
– Ošallissun šiännöllisešti karjalan - ta venäjänkielisien materialien tallentamiseh Karjalan rativoyhtijöššä , Kuikka šanou .
– On hienuo , jotta on olomašša kantakanšojen kielie kannattajie alottehet , hiän koroštau .
Projektin tarkotušryhmänä ollah lapšiperehet , koululaiset ta šuomelais-ugrilaisie kielie opaštujat ihmiset .
– Ymmärrämmä , jotta meijän projekti voi kiinnoštua ihmisie , ket ei ošata šuomelais-ugrilaisie kielie . Šiitä šyyštä starinoja iänitetäh šekä šuomelais-ugrilaisilla kielillä jotta venäjäkši .Verkkoh latatah 50 iänissyštä , Radosteva huomauttau .
Starinojen iänissykšet latatah projektin VK-šivulla šekä erilaisih podkast-palveluih .
– Myöhemmin iänissykšet löyvytäh projektin kotišivuilta . Täh aikah verkkošivu on työn alla .Šuunnitelmien mukah še avatah yleiskäyttöh 8. šyyškuuta , kun Venäjällä juhlitah Venäjän kanšojen kielien päivyä , Radosteva kertou .
Venäjän kanšojen kielien päivä on uuši juhla .Še lisättih Venäjän juhlakalenterih vuotena 2025 presidentin ehotukšešta .Juhlapäivyä vietetäh runoilija Rasul Gamzatovin šyntymäpäivänä .Tänä vuotena juhlapäivyä pietäh toista kertua .
Starinat autetah čukeltuo šuomelais-ugrilaisih kielih
карельский: собственно карельское наречие
Новописьменный севернокарельский