Texts
Return to list | edit | delete | Create a new | history | Statistics | ? Help
Opät’ tuldah krasnuoit
Opät’ tuldah krasnuoit
Ludian
Southern Ludian (Svjatozero)
– Nu
äigo sigä tuttavid mužikuoid oli beeluois ?
Ej olnu ...
Siid d’älgel ol’d’ih hüö meidem mužikat ol’d’ih , meiden küläm mužikat , pogostalpiäi Kaškanaspiäi ol’d’ih , oli Kaškanah nastupaičči , sigä hüö karavulittih d’ogisilduoid da nečis Lahten doroguoiz .
Da kai buitoku krasn’armeičat tuldah mečäspiäi d’ogiči neččih Lahteh !
Da kai vot sigä ol’d’ih .
A Priäžäs ej oldu meiden küläm mužikat , sigä pogostal oldih .
Siit , kačo , veškel’skuoi heil siid da Bel’ajou Timuoi rukovodittih .
Moižih t’el’egät eigo tiettü enämbi .
Kemb andau kres’t’aanin tačkad andetah ?
Höštögen vedettävät , orožat sinne pl’äigütetäh astutah .
Nu oman kül’än ned mužikad lähtedih Sekon St’opanad , Laurim Miikkulat , Kuz’minan , nene Pešat , nu , kai sigä Kos’t’it kai kedä heid mublizuittih sinnä lähtedih .
Tüöttih Lahtemmägele kunnagi vastah da kai .
Vašakkah azetettih se miero heidem voiske , nu oldah a Kaškanaspiäi tulou krasnuoi .
Nu rubettih häi ambumah (huondeksel aigaižeh päi nouzou muga ), oi , siid opät’ bohatišto : ”Vot kehnot , sanou , op’ät’ tuldah n’ügu , sanou .
Kačo , ristitüt tuldih , k andettih valgedad d’auhod da kai da meil la nügü sanou opät’ tuldah krasnuoit , siit sigä heit ”.
– Kottebratanat ?
Nu .
Kottebratanad nu sanou tuldah , kačo sanou opät’ sanou tuldah sanou ristitüt meile ”d’auhot vessah , d’auhod , voit kaikked andetah ”.
Sit heid ajettih siit ken kuzgi , ajettih kengätä d’uostih sinne oigedah Riiselgän dorogad müöti .
Dai ku flotte ajuoi , ken venehed , mi oli kai mublizuittih venehil tuodih külid müöti ei dorogad müöti ajettu .
Muga sigä heit krasnuoi se heit ku pugnii , erähid ruaničči , ken kunna .
Nu , erähät meidenküläläižet pagettih sinne , lähtedih suomelaižiden kera .
Lähti St’opin Kosti , lähti Rugam Vas’a , lähti , siid lähti piälikkö se Teren’t’ovam Miša lähti , Tin’t’um Vas’a lähti , Kuz’minan Peša - nu kedä heit sinnä lähti kai lähtedih , sinnä meččäd müöti pagettih kaikin .
Nu , a ken sih d’iäi ka ken kunnagi eini erähät ni pagettu .
A se Teren’t’ovan Ivan Ivanič ei voinu pageta .
Hänel oli kačo pereh suuri , lapset , da siid Balahonovan ned e nadod da kai , ei kärüh kärih sündüttü da t’el’egäh , da siid muga d’iädih kodih , nu , d’iädih kodih .
Siit tulou d’o krasnuoi , uspokoilis’ .
A ku neče , ken ei ehtinü pageta da kai ...Loginaz oli moine mužikke , ka meile üökse tuli minä sanou .
Mama meiden sanou : ”Ka , oi , kačo , sanou , tuli üökse sanou , ilmai on sil aigal l’eibäd vähä da , sanou , häi vie , kačo ”.
Sid hüö üöks natraviihes .
Sanou : ”Oi , minä olen bratan , sinun bratan ”.
Minä sanon : ” Olevai vaikkani , muamo , minä s’eičas hänen la pugnin ”.
Nu , minä lähtin pihale sigä kävelin kävelin vähäižen tulen ka sanon : ”Hoi , mami , tuli la krasnarmeiskuoit saldattat .
Küläs ei enämbi sündü la ei , mäne tiedä mi on , tuha tuhad on la ”.
Se mužikke ku hüpniuhäi (sigä beeloluoiz oli ): ”Oi , čidžuoi prosti !
Teidem mučuoi neče , sanou , on urai , sanou , kačo viestin viei sanou , minut sanou tabatah nügü ”.
Hüpnii , kengätä lähti oigedah tožo d’ogeh da sinnä Priäžäh vai ent’iä kunna lähti meččäd müöti sinne .
Muatuška se nagrau , sanou : ”Sinä gos’t’an terväh provodiit ”.
”Ka midäbo la nenid gostit kudai la , beeluois kävelöu da siid meile vie gost’akse tuli ”.
Nu siid d’o tulou päi , toine proidiu päi vai enämbi mouže proidii , sigä krasnuoi tuli heboluoil ajettih .
Meile hüvä mielez d’o ku nene moižet : hebod hüväd mužikad net ....oficerat vai entiä prostuoit saldatad moižet , nu omat ka omat mugomad hüvät .
Sit Teren’t’ovan se Ivan Ivanič arestuittih , sigä oli piälikkönnü , viedih häntte Priäžäh .
A minul d’o ukko , dorogam müöti tuli ka häi d’o sel’sovetas ruadau Pühärves .
Kouz dorog avaidui , tuodih häntte lidnaspiäi d’o , tänne sluužimah pogostale .
Sit hänem mučuoi sinnä mäni Priäžäh , Kikin ambariz , oli se Ivan Ivanič .
Nügü sanou : ”Sano Paul Ivaničale , tulgah minut tännä viikupimmah , ei ka sanou minut ...”.
Da siit oli vie per’vuoi starikke toine , nu , hüö vrode kaku kulakat näget , heit sinnä krasnuoid arestuittih .
Siit tuli mučuoi siit Paul Ivaničale meiden d’algah minun ukole : ”Oi , sanou , mäne sanou !
Nenga tüöndi viestin sanou , mäne sinä häntte eikä , sanou ...
Entiä andetah vai kunna tüötäh vai midä ”.
Nu siid minun ukko selgini , kävüi sinnä , pagiži niilüöiden kamisaruoiden ker da kai .
Siit se Ivan Ivanič piästetti , iäre dai starikke piästettih , se Ser’göu starikke , tuldih iäre kodih .
I muga siit kačo täh voinassuai elettih .
A starikke se kuoli ende starikal siit , vahnan dielo , a Ivan Ivanič vie eli hätkengi .
Opät’ tuldah krasnuoit
Ludian
Southern Ludian (Svjatozero)