Texts
Return to list | edit | delete | Create a new | history | Statistics | ? Help
Stupiimme kolhozah
Stupiimme kolhozah
Ludian
Southern Ludian (Svjatozero)
Nu
siit se voine , graždanskuoi voine vai kuj oli lopiih , sit häi d’o tuli kodih .
Siit ruaduoi häi Priäžäz , da siid d’o ruadoi ribakannu .
Siid d’o rodittiheze kolhozat , siit häi stupii kolhozah .
Vot .
Omaz omaz d’o elimme , siiten kolhozah stupii .
Sobran’uoih kävütäh net Priäžäspiäi , oli raikomaspiäi Lamppi da kai .
Pol’ežajou precedat’el’akse , meidem mužikk se Pal Ivanič , čotovoodakse , nu , kai praul’en’aid naznačittih .
Üheksä taluoid vai ku kerävüi , köuhäd bedn’akuoit sigä kolhozas s’evo .
Nu davai piendarid mureta , eig ole ...pluuge üks dai siid raudastivo üks .
Davai müö mureta piendarid üöd da päit .
Huondeksel aigaižeh ehtäh müöhässuai ainoz murendamme piendarid da štobi ühtes paššida da olda pluugal da kai ...
A erähad vie ei , ed obščestvittu ei rugehit .
Kel migi nu se külvettih .
Siid rodiiheze sobraanii kezäl .
Gül’l’inge tuli lidnaspiäi .
Entiä mi se häi oli lidnan piälikkö vai mi oli .
Lidnaz , Gül’l’ingökse kirguttih .
Häi tulou sobraan’ait pidämäh sih Pelduoižih .
I soberiu kaikkid bedn’akuoid , dai nu kui peldožnikat kai soberittiheze nu .
Sanou : ”Pidäu teile , häi sanou , rugehet sanou obščesvida sanou , ühteh sanou siithäi sanou rodih teil , s’emje sanou üks da kai el’ädez nu ”.
Nu siit , kač , zavodimme olda da kai , trudodn’eit hüväd ruata da .
Müö ruadamme arttelil , minul äi trudodn’eit , dieduška meil oli vahne se .
Ka viižinsaduoin trudodn’eeluoin oli .
Nu siiten tuattah tožo ščotovodannu , se čotovodannu ruadau , siid vie mänöu niitule se kündäu se midä vai tiedäu muga ruata .
Siid ruaduoi , ruaduoi , ruaduoi müöšte da kai vuoden dai trudodn’eid äi .
Nu , siit kačo rahvahale žiäli .
Midä nenga rukovoditah dai kai , siit hänempiäle sit häntte vie arestuittih : pahoin kolhoozas , sanou , azui provaalan da sen toižen da ku nenga , sanou , ei pidäiž .
Nu , arestuttih , olgah , siid vie - a eig olnu provalat eigo ni midä .
D’älgele , kačo , heil’e pidi precedat’el’akse häned oli sih kolhozah , kai hüö nakl’evetaali tühjat načal’svale , nu heit sn’aali .
Pol’ežajevad dai meiden dai enämbi meiden eini rubennu .
Siid vie kačo häi oli kakskümen päi , arestuittih ka poka dopraašivali da kai ka .
Ei häi a sous’om , oli häi oigei , oslobožden’ain dai tuli iäre sigäpiäi .
Suudo proidii , andettih vai ku prinudraboti kaks kuut .
Häi ned ruaduoi , sit sanou : ”Enämbi , minä Pelduoižeh en rubeda elämäh , da ni kolhozah , l’ähten ku minut sanou za pravoje d’elo nenga ruattih ”.
Da siid enämbi ni olnu ei kolhozas , siit rubeži Priäžäs raiispolkomaz ruadamah , kolhozuoih ajelemmah ispehtor .
Da hüvin da siit , kačo , tämä voine se rodiihäi , tämä d’älgimäine voine .
Akuirovalis’ , d’o olimme Arhangel’skas siid vie dobrovol’no lähti trudarmiih sinnä , täl voin an nu tämä d’älgivoine trudarmiiz oli Arhangel’skas tägä strojiiheze .
Minun lapset , ka nel’l’äi ...
Vie minä sanon : ”Oi , sinä , älä lähte ”.
” Ette , sanov , vai kuole , оlgad vai Arhangel’skas täs elägätte ”.
A siit sigä tuli davai tännä Petrouskuoile .
Siid ruaduoi häi voennuois organizacais , hätken oli ...ei , ruaduoi onnako vuotte kakstož ruaduoi da siit toižeh da siid .
Nügü , kač , penz’aile lähti , da siit enämbi ni ruannu ei da sit .
Minul starikke kuoli .
N’üg olen üksinäh d’uuri .
El’ä midä malttanet .
Tožo starikas penzii naznačittih minule , elän da siid midä , kačon sidäi ruadan .
– A kous kolhoozah teidem pereh sinne mäni , dak midäbo teil oli elot , midä anduoitte sinnä ?
Kolhozah sinne ku lähtimme , anduoimme kolme lehmät , kolme lehmät kaks hebod anduoimme .
Veneht emm andanu , d’etka ainoz ongele kävüi .
Nu , t’el’egäd andoimme , kord’ad anduoimme siid andoimme kartofe , kartofeit siemenekse , ozrad anduoimme , kagrad anduoimme kai .
Da vie minä organizučutin vahnembit kel olnu ei nenit köuhembit , nu mängät heile vie anduoin peitoči mužikas kagrad da siid ozrat siemenekse , štobi kir’utettaižiheze kolhozah , and enämbi rodih bedn’akkat kolhozah .
Lehme d’iäi vie meile kodih , toine vie d’iäi meile kodih , toine vie d’iäi Vasil’ Ivaničan se oli , minum mužikan vel’l’i , hänel se neveskäle d’iäi .
Nu zavodiime kolhoozas siid elädä dä .
Ei oliiž voinad olnu , ka elädägi hüv olnuiš kolhozas .
Ka kehnon voine meit siit rozrušii , kačo , kedä kunnagi .
Nemse se nastupaiččihäi , kaikem muan lopii .
Stupiimme kolhozah
Ludian
Southern Ludian (Svjatozero)