Texts
Return to list | edit | delete | Create a new | history | Statistics | ? Help
Oli ukko da akka...
Oli ukko da akka...
Karelian Proper
Tunguda
Oli
ukko da akka .Heilä oli eluo koza da bokko .Kozua da bokkuo ukko da akka piettih oigein hyvin , no kozalla da bokolla tuli igävä .Hyö duumaidih pois lähtie da alettih varuštua eväštä kesselih .Koza šanou :
– Keryä eväštä kesselih , igävä meilä täššä tulou .
Da ukko da akka kun lähtiettih , hyö kerätäh kesselin täyteh eväštä .Lähettih matkah , otettih kesselin šelgäh .Männäh , männäh , jo pimie tulou .Koza šanou :
– Kačo sie , eigö missä tulda nävy ?
Bokko kaččou dai nägöy : kylä sielä on višših .Kačotah : tuli palau .Hyö juoštih tulella .Kačotah , ga siinä yhekšän hukkua illasta keittäy .Heidä bokko da koza ei huomattukana alušša .Pölläššyttih .No koza kyžyy :
– Midä myö ildazekši keitämmä ?
– Ka šua šuurin hukan piä kesselistä da keitä še , – šanou bokko loitombuata .
Hukat kaċotah siinä kummua da aletah jo varata .Ken šanou kunnegi lähtievän , da toin’e toizen jälgeh männäh meččäh da pagoh .Siih jäi jo keitetty ildane .Bokko da koza šyömäh .Šyödih .Bokko kesselie kanduas’s’a oli vaibun .Kun šai šyyvä , ni šanou :
– Rubiemma muate .
– Ei , – šanou koza . – Hyö moužot tullah jälelläh .
A hukat kun juoštih pagoh , juoštih kieli pitkänä da kerot kahallah .Tulou heilä kondie vaštah , kyžyy :
– Minne työ juokšetta , kun näin huahitatta ?
– Ga koza da bokko kun tuldih da alettih šuurimman hukan piädä kesselistä ottua , ni duumaiččima , jotta miän muamo tahi tuatto on tapettu , da läksimä pagoh .
– Ga iċe hyö teilä keitettäväkši tuldih , – šanou kondie . – Lähemmä yheššä sinne .
Dai lähettih juokšomah keittopaikalla yhekšän hukkua da kymmenendenä kondie .Juoššah , jotta mua jymäjäy .A koza da bokko kun kuuldih , jotta tullah , dai hädäyvyttih .Koza šanou bokolla :
– Nouška , velli , puuh , šyyväh miät .
Bokko kun kesselin kera rubei vualiudumah da vielä kun oli vaibun , ni jallat luiskahettihki puolipuušša .No mit’ein lienöy heilahtan , ni tarttu šarveštah okšah da jäi rippumah , a koza nouzi ladvah .A hukat da kondie tuldih siih .Paissah :
– Puuh ne on mändy .
– Pidäy lähtie kaččomah , – šanou kondie .
Tulou puun juurella .A bokolla himottau kaččuo , jotta midä hyö sielä alahana ruatah .No kun ei šua ni mit’ein piädäh kiändyä .No kiändi mit’ein lienöy piädäh , ka šarvi i luiskahti .Silloin hiän jymähti kesselin kera kondiella šelgäh .Koza tämän kun nägi , karjeutu puun ladvašta , jotta bokko rohkautuis :
– Pie sidä kondieda kiini , muut ollah miän !
A kondie jo muit’einki oli pöläštyn , da tämän kun kuuli , ni työnnäldäydy juokšomah pagoh .Hukat kun nähtih , jotta kondie läksi pagoh , dai hyö alettih juošša pagoh .A koza šolahti puušta da šanoıı :
– Nyt miän , bokko parka , on parašta kodih lähtie .Ei tämä muailmalla kulgu huvita .
Da lähettih da mändih kodih , eigä šen jälgeh enämbi puattu pois ukon da akan luoda konžana .
Oli ukko da akka...
Karelian Proper
Tunguda
–
–
–
–
–
–
–
–
–
[Напуганные вoлки]
Russian
–
–
–
–
–
–
–
–
–