Texts
Return to list | edit | delete | Create a new | history | Statistics | ? Help
No elet’tii ende uk da ak...
No elet’tii ende uk da ak...
Ludian
Northern Ludian (Kondopoga)
No
elet’tii ende uk da ak .Oli heil brihačču Grin’a , a neičukaine Grun’a .No i emä heil kuol’ , a ižä nai toižee akkaa .Ot’t’ akan , ak ei rubenu l’ubimaa nenid lapšid , hrihačušt da neičukašt .Ižäle sanow , što hätken minä sinunke soan elämää , – sanow , – što davai hävitämmä kunagi heid , brihaččuižen i neičukaižen .No .A neičukaine oli vahnemb , Grun’a .Neičukaine kuwli nämä sanad emindimän .Brihačuižele sanow :
– Huonduksel nouzet , – sanow , – i otetaa meid melsää halgod pilimää .
Neičukaine nouž yöl i meni (по valgeda oli kezäl yö ) meni , kivužid kogož , kogož , kogož pikkaraižid pihal , kormanid yn’nää .I lähtii .Huonduksel emä nostataw :
– Noskat vai , lapset , noskat !Pidäw lähtä meile halgod , – sanow , – luadimaa metsää .Läkkät vai , hyvä päivä on , – sanow da .
Nu i lähet’tii .Ižä läht’ , a brihačuine da neičukaine se lähtii da jälgee matkadaa .A neičukaine aino kormanaspäi kivužid lykkiw dorogad myö .No . Män’dii , män’dii šigä , pilit’tii halgod , se ol’dii .No murginoidii .Emä se sanow :
– Vaibuitto lapsužet , – sanow , – viergät oddohalla , – sanow , – viergät !
No , lapset sei vierdii , vierdii , uinotii , ižä da emä uiditii iäre .Heid šin’a metsää loittoze i jät’etii .
Magatii , magatii , nostii ka ewle ni emäd ni ižäd , ni kudai ei tiettä kuna lähtä .Čuraa , toižee , čuraa , toižee .Neičukaine sanow (juohtut’t’ ):
– Ma lykiin kivužid , vuota , eigo popaditta n’ed kivužed vastaa .
I popadit’tii kivužed heile .Hyö niid kivužid myö , kivužid myö dai yöl tul’dii kodii .Tul’dii , kolotizettaa .Ka emä , emindimä se hämästyw što :
– Kačo , – sanow , – vit’ hatus tuoi heid , metsä tuoi kodii !
No tošpäin ižäle sanow :
– Pidäw loitembi viedä , – sanow , – täs lähil olimme , – sanow , – nygöi puututii tagaze .
Tošpäin lähtii vie loitembi metsää šin’n’a .Uut nostatettaa .Hyö se vaibut’tii , yöl tul’dii , da ei voinu kivužid ni kogota neičukaine .An’t’tii heile leibäd .Neičukaine brihačul sanow :
– Ana tämä leib milei , palain’e .
No brihačuine andoi .Neičukaine se matkadaw da leibäd kroššiw .Emä sanow :
– Midä hill’ah matkadatte , – sanow , – tulgat boičembi !
– A katsumme , – sanow , – mit’e lindužet , – sanow , – katoksil vietettäw , näge kyläl .
Žieli lähtedä metsää .Tiedäw , što jietetää , d’o toimistui tyttö se .Leibät kruššii , kruššii , dorogad myö aino menöw , menöw uut .Ol’dii murginaa suo , ruot’tii , šigä ol’dii .
– No viergiät , – sanow , – viergiät , vaibuito , oddohnigat , oddohnigat !
No a lapset ...kak b t že ?Viertii dai uinotii uut .Uut heidä jietetii šinne , toine kier .Noštii , ka ewle ni emäd , ni ižäd .No lähtii .
– Vuota , leibäd , – sanow , – kroššin , emmä voigo myö leibii myö popadita .
Ga lindužet se kai leibät ned i šyödää ga vs’orovno matkataa ka lindužet pörhetää se leibiš pee .Hyö niid aino linduid myö , linduižit myö da dorogah puututii .Dai uut tul’dii kodii jo .Tul’dii jo huonduspuolee .
No jo kolmanden päin uut emindim sanow :
– Vie lähile vieit , pidäw , – sanow , – viedä , kuga pimedemb metsä on , – sanow , – näge hyö puututaa .
Kolmanden päin uut i lähtää , ka neičukaine sen päin d’o ni midä ei voinu .Ni leibäd ei anttu heile , da ni kivužid ei kogonnu .
– No , tänäpä , – sanow , – naverno meit jo jiet’etää .
No i zastavii , neičukaine sе ni mit’e ei voi magata , ka emindim sanow :
– Midä že et magada , – sanow , – oddohni , eika et pieze kodii tagazin .Magada !– sanow .
Vierdii da uut uinotii .Uinotii hyö , uut i uiditii , ižä da emä .Herastut’tii , ka ewle ni ižäd ni emäd .No i lähtii , ei tiettä kuna .Kävel’dii , kävel’dii , kävel’dii , ei puwtuta ni kuna .
Puwtui moin’e metskodiine , pikkaraine , šigä Jagibuab .Tul’dii , kai on kodiine , šeinäd on pränniikkähižet , a katoz on pečenjähine .Hyö nälgähižet käveldii hät’k’ .Dai davai brihačuine sе šeinid puremaa , što prännikkähižet on , magedad .Neičukaine braniw :
– Elä jalo , – sanow , – vähembäl , – sanow , – eika kuuldaa .
No Jagibuaba kuul’ se , tuli pordahile , tuoi podnosala heile kaikked se strepn’at . Hyö pagoo lähtii .
– Elgät pageko , tulgat , ma teid šyötän , juotan , dorogaa vien , – sanow .
No hyö i tul’dii .Tul’dii .Jagibuab heid šyöt’ , juot’ .Ot’t’ da brihačuižen salbaš tännä lievää , kuga kozid še pid’etää .A tädä neičukašt Grun’at pani ičelle šihe por’adničat’ , kuharkakš .Pezöw da kai hällä , stirajow da keit’täw da paštaw .
– A Grin’ale , – sanow , – (midä panow viedraa ) vie šin’n’a !
Kui härgän šie šyöttädä , što lihow da iškedä iäre .A neičukaine se aino hällää view šin’n’a šyömišt parembat , parembat , view da brihačuižele sanow :
– Kui Jagibuab kyžyškädöw šillas sormed oppida , sä anda balkaine (Andoi hälle balkaižen šin’n’a ).Sa čokkaida balkaine , – sanow .
I brihačču mugai ruodaw .Jagibuab se jo šyöt’t’ händää kuun odnako vai kakš .Mäni :
– Nu anda vai , – sanow , – sor’m , jogo lihoid ?
Hän ottaw balkaižen andaw .Hän mujelow :
– Midä že , – sanow , – pahoin sa šyötät händää ?Vie täwded viedrat .(Näge , leibäd lošši šigä , štobi̮ šyöž ). Hätkigo händää šyöttädä ?
Toižen tien ššupajow .Uut kuun šyöt’t’ .Aino sor’m on kova .No vot i rešila .Avaiž iäre brihačun , ot’t’ päčin lämbit’t’ , lämbit’t’ raudaižen . Kai ruskedakš .
– No , davait’eko , – sanow .
A neičukaine brihačule sanow :
– Ku labidale vieretäškädöw , ka sinä čiihoita kädet i jalgat , – sanow , – štobi̮ päččii et mahtuiž .
No , labidan pani :
– No viere labidale , – sanow .
Brihač se vieri , käded jalgad čiihoit’ti , päččii ei ni mahtu .
– Ozuta sa , - neičukaižele [sanow ].
Neičukaine sе tože vieri , käded – jalgad čiihoit’t’ .
– Ette malttago !
– Baboi , ozuta , – hyö Jagibuabal kyzytää , – ozuta vai se meile , – sanow .
Hyö kahtei pid’etää labidaa .Jagibuab se labidal ših vier’ , itsen alle jalgad kurčišt , käded i kai .Hyö otetii i kahtei händää päččii šin’n’a tolnitii da zaslon edee dai tugetii .Da šin’n’ai paloi Jagibuab .Brihačču da neičukaine pieštii hänen kodii šihi .No hällää oli d’engat äij , Jagibuabal , no elod äij , sundugad yn’nää , kai .Hyö se šiid šyödii , juodii , ol’dii .D’engoid otetii , no mi voidii , sumkaa otetii kai dai lähtii .
Kävel’dii , kavel’dii i puwtutii dorogaa .Puwtutii dorogaa dai kodii puwtutii .No ka tul’dii , ka tuodii näge kuldad sumk , hobedad toine , d’engoid niid Jagibuaban .
Ižä se da emä ihaštut’tii , što bohatat nygy tul’dii .Priimitii heid šihe .No šiid jo lietii jo tobjad , nygy brihačču se da neičukaine sanotaa :
– Myö d’engoi t’eile emmä ankkoo , ed ajane iäre tädä , – sanow , – akkad , ka myö sinunke emmo rubeko elämää !
Dai ižä ot’t’ akan iäre ajoi , rubeš poigan da tyt’tärenke elämää .
No elet’tii ende uk da ak...
Ludian
Northern Ludian (Kondopoga)
–
–
–
–
–
–
–
–
–
–
–
–
–
–
–
–
–
[Брат и сестра у ведьмы]
Russian
–
–
–
–
–
–
–
–
–
–
–
–
–
–
–
–
–