Texts
Return to list | edit | delete | Create a new | history | Statistics | ? Help
Zolotoi koroli
Zolotoi koroli
Livvi
Syamozero
Оn cuari .Cuaril on
poigu , i häi nägöw kolme yödy unis yhteh palah , što "sinul , cuarin poigu , pidäw ruveta naimah , i ken tullow ezmäine vastavus , se mučoikse ottua ".
I häi sanow tuatalleh i muamalleh :
– Nenga i nenga .Minä kolme yödy yhteh palah näin unis , što minun pidäw naija i ottua , ken tulow ezmäižikse vastah , mučoikse .
Hyö i sanotah :
– Nu nai sit , gui käskietäh .
Paistah illal i yöl jo duumaiččow , što huondeksel lähtöw naimah .I huondeksel nouzow , pezöw silmät , silmät ristiw , syöw da ottaw tuatas i muamassah blahoslovenjan , ristiw silmät , kumardah jalgah :
– Blahoslovikkua naimah .
I lähtöw .Pordahien piäh menöw , opät’ silmät ristiw : "Hospodi , blahoslovi naimah ".Lähtöw , pordahis heittäh – lökšähtäh hänel pägeil löpšöi , sanow :
– Ota minuw mučoikse .
Häi sanow :
– En ota .
Lähtöw ielleh astumah – opät’ i löpšöi pägeil , palaižen astuw – opät’ i löpšöi pägeil .Järilleh häi kodih kiänäh , muudu ni kedä ei näi , kolme kerdua löpšöi pägeil hyppiäw .Tulow järilleh kodih , pahas mieles vieröw muata .Tuattah da muamah kyzytäh :
– Midä pahas mieles olet ?
Ei sano , istuw pahas mieles , eigo voi syvvä , eigo juo , eigo midä .Ni istuo , ni muata ei voi – moine paha mieles , vai panettelow .
Vai yöl uinuow , opät’ i nägöw unis :
– Mindäh et ottanut mučoikse , tulihäi sinulles vastineh ?
– Da kuibo minä otan , gu minuw ei tule ristikanzua vastah ?
– Ga se on sinun mučoi , jo roindusijal sinul on tukat yhteh pletitty , sе sinul blahoslovittu i se sinul pidäw ottua .
Nowzow opät’ huondeksel i silmät pezöw , ristiw , syöw .Opät’ i lähtöw , menöw pordahien piäh , kumardah päivän nouzuh päi : "Ноspodi , blahoslovi ".Heittyw vai alah , opät’ löpšöi i köpsähtäh pägeil :
– Ota minuw mučoikse .
Opät’ häi punaldah pertih .Menöw pertih , sit rubiew sanomah muamalleh i tuatalleh , što "nygöi minul jo egläi kolme kerdua i tänäpäi tuli löpšöi vastah , i egläi unis näin , što se on lepitty minul , ottua pidäw ".
Muamah i tuattah sanotah :
– Gu on lepitty , on jumal blahoslovinuh , sit se pidäw ottua . Olgah miittuine tahto .
Sit häi ottaw heis opät’ blahoslovenjan i kolmanden kerran lähtöw pihal .Vai menöw , dai sе i pägeil köpsähtäh .
– Nygöi läkkä , – sanow , – otan .
– En , – sanow , – nygöi lähe . Tule huomeỉ yheksän čuasun aigah ottamah iččes kaỉvon pihal i tule yheksäl podvodal ottamah minuw .
Tulow pertih i sanow muga .
– Mih , – sanotah , – nygöi kaivon pordahal löpšöin ottaes pidäw yheksä podvodua ? Ei pie ni midä !
Annetah hänel yksi hebo .Eigo kučuta heimokundua , eigo midä .Lähtöw häi yheksän čuasun aigah hevol , i menöw ajaw kaivon pordahil .On sih hänel azetettu priduanoidu kymmene podvodua , neidine ylen hyvä .Häi ihastuw , ei tiije midä ruata , ei tiije ni iččie – ylen hyvä neidine !
– Midä tulit yhtel hevol ? Mene tuo vie yheksä podvodua .
Dai häi ihastuksis menöw sanow tuatalleh i muamalleh : nenga i nenga , i kai sanelow .Kučutah ruadostis heimokundu .Tuvvah mučoi , yheksä podvodua priduanoidu , kymmenendes iče tullah mučoin kel ruadostis .Cuari akan kel ruadostis ei tietä ni midä ruadua , juostah vastah , nevesky nengoine hyvä i vie priduanoidu !
Pietäh svuadibu ylen hyvin .Eletäh kodvaižen .Mučoi pyrrittäw :
– Läkkä , – sanow , – pyörittyižil .
– Kunna , – sanow , – pyörittyižil , kaivoh tuane ei äijiä pyörittyw pie .
– Emmo , – sanow , – kaivoh , lähtemmö tuatalluo .
– Kuzbo on , – sanow , – sinun tuatto ?
– Minun tuatto , – sanow , – on zolotoi koroli . Läkkä sinne pyörittyižil .
Tuatalleh i muamalleh kyzytäh i lähtietäh hyö pyörittyižil .Mene tiijä kus on loitton , loitton zolotoi koroli , i lähtietäh hyö sinne .Ajetah , ajetah i puututah hyö sinne zolotoih kodih korolilluo .Mennäh pertih , tervehys laitah , sanow :
– Terveh tuatal , terveh muamal !
A hyö ni tuta ei , ken sе on .
– Kenbo sinä olet , gu tuatakse sanot ?
– Ga olihäi teile tytär Man’a ?
– Oli , ga vedeh Man’a-tytär meni .
– Ga te olen minä , – sanow .
Tuattah da muamah kai pitkälleh pakutah .Muamah sanow :
– Minä ainos kaheksa vuottu itkin , – sanow , – daže tervehyön menetin .
(Tyttöine meni vedeh kymmene vuodižennu , a nygöi kaheksatoštu vuottu on igiä .)
– Kaheksatoštu vuodižennu annetah miehel , – sanow , – gu en voinus minä nygöi miehel piästä , sie pideli ostali igä olla .
Sit händy ylen äijäl ihastutah i annetah mene tiije , mene tiije mi priduanoidu ! Ei sua arvata , mene tiije mih tuhandeh !Tuodih net valmehekse tänne .Tuldih muamah da tuattah s udovol’stvii päččii murendamah , hyväs mieles , hyväs ruadostis .
Hyväs mieles goštittih dai hyväs mieles lähtiettih , hyväs ruadostis !A hyö ruvettih elämäh ielleh hyvin da sobuh .
Zolotoi koroli
Livvi
Syamozero
–
–
–
–
–
–
–
–
–
–
–
–
–
Золотой король
Russian
–
–
–
–
–
–
–
–
–
–
–
–
–