Texts
Return to list | edit | delete | Create a new | history | Statistics | ? Help
Bohat’t’eri-mučuoi
Bohat’t’eri-mučuoi
Ludian
Southern Ludian (Svjatozero)
Oli
tuatol dа muamol ainuoi poige , ylen vägöw da strašnuoi bohatte .Tuattah , muamah kuoltah .Rubedaw naimah .I iččeih mielte myöi ni kui ei voi löwtä našte .Val’l’astaw kaks hebod , ottaw kuučarin i lähtöw akkad eččimäh toižeh muah , toižeh carstvah .Ajaw perevozah . Pidäiž perevozida .Kaččow , neidine pezöw sobid .I ylen hyvä neidine , vägöw . Mieldyi neidižeh .Neidižele sanow :
– Eigo voi meile murginuoita i heboid šyöttädä täs sinullo ?
Sanow :
– Minä sobat kerädän i lähten avaidan veräin , voitte ajada saraile .
Avaidaw veräin neidine , laskow heid , prikažiw kuučerile hebod laskettada i kagrad andada .Briha mänöw perttih , ylen hyvä briha .Neidine ottaw panow stolale murginan , enzimäi gostittada pidäw briha .Rubetah hyö neidižen ker syömäh kahtei . Ištutah vastakkai , kačotah toine toižeh .Ylen hyö oldih , bohat’t’erit , čomad .Briha sanow hänele , ku rubettih suad’bodieloluoid pagižemah :
– Edgo tule minule mučuoikse ?
Neidine sanow hänele :
– Pidäw kiere oppida ozad .
Rodittih hyö ukko da akke .Enzi huondeksen nowzow miez . Panow kušakan vyöle i kirvehen vyön alle i ottaw konatan i lähtöw meččäh .Leikkadaw kymmene syltte halgod i tuow kai kodih takaz i perttih nell-’l’udaw .I mučuoile sanow , iččeh akale , sanow :
– Vot miez on , ka vot on miez – kymmene syltte yhtes čuasus leikkaži i kai kieras tuoi !
Naine vastaži :
– Nengomid miehid on äi , da lewhketä vai ei .
Syveldyi häi naižen piäle , ei pakiče ni d’uoda ni syödä .Tošpäin huondeksel nowzow vie aigembe , ni syö ni d’uo ei .Kakskymmen viiž syltte leikkaži kolmes čuasus i kai yhtes takas tuoi .Oččah lykäiži , kai pertti lekahtih .Tuli perttih i naižele sanow :
– Vot on mies , ka vot on miez – yhtes takas tuoi vuodeks halgot !
Akke vastaži hänele :
– On nengomid miehid äi , da lewhketä ei .
Syveldyi miez akan piäle ylen äijäl .Ei pakiče ni syödä ni d’uoda .Huondeksel kolmanden päivän nowzow miez aigaizeh .Selgidäw i akale sanow :
– Proššai , – sanow , – sinä miud elä tiedä , minä sinudaiž !
Akke vastaži hälle :
– Mäne terveheks !
Lähti miez astumah peldod myöte . Kaččow – palteges on kivi ylen suuri , ku päčči .Fattiw kiven kahtel kädel , vierettäw mägele .Ištuiheze kivele i rubeži duumaimah .Kuulow – kyndäw miez kolme sadad virstad meren taga . Kuuluw "nu " i "tpru ".Häin sanow : "Minä lähten sen miehelloh , ken on šigä kyndäi "?Tulow miehelloh häin .Kyndäw mies kolmel volal i kolmet pečatnuoit syltte vagon ajaw .Kyndäjäl miehel yks käzi , yks silme , yks d’alge .I sanow :
– D’umal abuh , diedo !
Häin sanow :
– Tule , pidäw , poige !
Laskettaw starikke hebod murginale i keittäw kalan , i priglassiw syömäh mieste .I kyzyw starikke :
– Kenen miez olet , kus tulet ?
Vot moločče i sanow :
– Minä nain perevozas .Enzi päivän tuoin kymmene syltte , perttih tulin , sanuoin : "Vot on moločče , ka vot on moločče – kymmene syltte tuoi takas , leikkaži i kaaduoi ", a häin , naine , sanuoi : "On nengomit moločuoid äi , ka ei lewhketä ".Tošpäin , – sanow , – leikkažin i tuoin takas kakskymmen viiž syltte halgot , tulin , – sanow , – perttih : "Vot on moločče , ka vot on moločče – vuodeks halgot tuoin ".A häin sanow : "On nengomid moločuoid äi , ka lewhketä ei ".Kolmanden päin nowzin , sanuoin akale : "Proššai , sinä minud älä tiedä , minä sinud ".Häi sanuoi : "Mäne terveheks ".Vot i tulin sinulloh .
Starikke sanuoi :
– D’ogo lopiit paginan ?Kuundele , – sanow , – minä rubedan nygy sanomah .Vot , – sanow , – miez , meid oli kakstošt vel’l’este , minä olin nuorin kaikis , kahekstošt puudad viessad oli minus , a toižet oldih d’ugedembad i vägevembäd .Myö , – sanow , – duumaimme : emme rubei ruadamah , a lähtemme kiškomah ristityid .Vot , – sanow , – lähtimme myö toižeh muah kiškomah . Kiškuoimme kakstošt takkat kuldad da hobd’ad .Vot tulimme , – sanow , – sinun mučuoilloh perevozah – pidäw toizele puolele piästä .Häin perevozii , – sanow .– I sanomme sinun neidižele : "Perevozi poikki d’oges "! Häin sanow : "Min voin čagaril nostada , se mille andagat viendäs "!Myö soglasiimmohez andai .Ottaw ylen suuren venehen i view meid poikki d’oges toižele čurale .Pani čagarih d’uaščikan ylen suuren i sanow : "Pangad nygyöi d’engad "!Panimme takan , panimme toižen – čagari aino seižow , i panimme kaik kakstošt , i šiid ot’ti čagaril kai kakstošte takkad d’engad i sadii venehen , toižel kädel sadii venehen , toižel kädel sadii venehen !Toižele čurale veneh mäni , a sinun mučuoi diäw meiden ker .Myö sanomme sinun mučuoile : "Kuus takkad ota , a kuuz anda meile ".Häi sanow : "Ni kopeikkad en anda , työ kiškuoitte ristityid "!
Kakstošt bohatterit sanotah : "Ed anda , ka rikomme sinun "!Meile oli nälge , rodii vie nälgembi nygyöi . Sinun mučuoi sanuoi : "Eigo sua teile miwd rikkoda , mängät kus piän tulitte , kuolgad nälgäh ".Hänen mučuoile sanotah : "Rikomme , ku ed d’enguoid andane "!Ylen äijäl tuskevui neidine .Stukniw d’algan muah , kovah tandereh , kivičuuruh upponi d’alge polveh suai .Kačomme : rikkow kaikkid vel’l’eksid .Myö pagoh .Häi dälgeh yldyi meile .Kačomme : on rikottu bohat’t’eri peldole , i piäluw on diäny viitte syltte .Myö kakstošt vel’l’et istuimokseh sih piäh .Sinun mučuoi nel’l’udaw meile dälgeh , tulow sih piälloh .Ku potkal heittäw sidä piäd !Ykstošt vel’l’este kuoli , a minä diäin hengih .Siid minul pakui käzi , d’alge , silme .
Starikke sanow :
– Mäne kodih , i min pidänöw , sen ole ; kunne käskenöw , sinne mäne !
Mies tuli kodih i sanow :
– Akke , minä sinun dielon tiedustin , hot’ talusvedet käske d’uoda , ga d’uon .
Rubeži elämäh iččeh mučuoin ker .
Bohat’t’eri-mučuoi
Ludian
Southern Ludian (Svjatozero)
–
–
–
–
–
–
–
–
–
–
–
–
–
–
–
–
–
Жена-богатырша
Russian
–
–
–
–
–
–
–
–
–
–
–
–
–
–
–
–
–