Texts
Return to list | edit | delete | Create a new | history | Statistics | ? Help
Akku lapsen söi
Akku lapsen söi
Livvi
Vidlitsa
On
akku da ukko , heile on kazakku . Mučoi on kohtuine .Mužikku lähtöy , kunne lähtenöö ajoloih i kazakal käsköö : "Gu ugodii saaha , älä pahoi jovvuta emändää ".A kazakku uniz nägöö : lapsi roih ylen ozavu . Midä vai häi tahtonnoo , sidäi roih .Mučoi lapsen saa , häi lapsen saaduu sih unohtaa , ei tiijä ni iččeedä , a kazakku lapsen ottaa da sen viebi leskeh akkah , a mučoil hieroo vereh igenet .Mučoi tostah :
– Kuzbo ıninun lapsi on ?
Häi sanoo :
– Ga said dai söid lapsen !
Mučoi itköö :
– Gu minä lapsen olen syönyh !– moliihez .
Häi kirikköh rubiaa käymäh joga molen’jal .A brihaččuine kazvaa vägi brihaččuizekse .Kazakku lähtöö taloiz äärez i ottaa sen lapsen leskez akaz .
Astutah hyö sie korvez ylen suurez .Mužikku sanoo :
– Pädiz meile elää , gu oliz meile täz kodi !
– A rubiazimogo myö täz elämäh ?
– Ga rubiaazimmo !
Brihaččuine i sanoo :
– Minun suus , spaasan korvah , štobi̮ gu oliz meile täs kodi !
Dai heile roih kodi ylen suuri da hyvä .I hyö eletä-hollah , ga mužikku sanoo :
– Gu oliz minul akku , sinul maamo , pädiz i elää !
Brihaččuine i sanoo :
– Minun suus , spaasan korvah , štobi̮ gu oliz minule maamo , taatal akku !
Joučendu parvi nouzoo i heitäh alaz , i yksi muuttuu ristikanzakse , i ottaa mužikku mučoikse hänen .
Hyö eletäh da ollah , ga ei oman maaman dytyi ole .Ruvetah hyö maata .Brihaččuine menöö kravatin alle .Mučoi kyzyy :
– Kuibo työ koin azuitto ?Mittuine korbi oli täs !
– Vod myö laimo koin , ga brihačču on ylen ozavu , häi midä tahtoo , sidäi roih .
Mučoi kyzyy mužikal :
– Kuzbo sinä otit brihačun ?
– Minä otin taloiz , olin kazakannu , mučoi oli kohtuine , gu sai lapsen , ga minä igenet hieroin vereh , a lapsen otin . Leskez akaz minä händy kazvatin .
A brihaččuine nene paginat kuundeli .Huonduksel nostah magaamaz ääre , brihaččuine sanoo :
– Minun suus , spaasan korvah , kui maamo jouččenennu tuli , mugai mengähes !
Mučoi jouččenekse muutaldah dai ääres lendää .
– Minun suus , spaasan korvah , mittuine korbi täz oli , moine i roikkah ! Kodi korvekse muutaldah , a sinä joukse igä kai koirannu .
Häi koirakse muuttuu .
– Žučka-sobačka , pokaži mne dorošku !
I lähtöö koiru ielepäi juoksemaho brihaččuine juoksemah ääreh .Tuloo hieruh .Pyrrih taloih yökse .
– Laskemmo jo , magaa .
Ildastu syömäh ruvetah , ga koiru uksen tagaa haukahteleh .
– Anna , poigaini , koirale illaspalaine .
– En , – sanoo , – koiral nygöi anna , a huondeksel annan päčin lämmites tulihiildy .
– Kus , poigaine , koiru tulihiildy syö ?
– Olettego työ kuullut , kuz oma maamo lapsen söi ?
– On , – sanoo , – kaksi päivää vai astut , dai piäzet hieruh .
Lähtöö huondeksel matkah i koiru viettämäh .Tuloo toizeh hieruh .Yökse puuttuu . Pyrrih yökse .
– Magaa jo , laskemmo .
Illal ruvetah illastu syömäh , ga koiru haukahteleh .
– Anna , poigaine , koiral illaspalaine .
– En anna nygöi , huondeksel annan tulihiildy .
– Kuzbo koiru tulihiildy syö ?
– A kuzbo oma maamo omaa lastu syö ?
– Päivän astut , sit sihi hieruh pääzet .
Kolmanden päivän nouzoo i lähtöö astumah ielleh i pääzöö sih hieruh , kuz on lapsen syöjy mučoi .Pyrrihez yökse .Ruvetah illastu syömäh , ga koiru haukahtelou .
– Anna , poigaine , koiral illaspalaine .
– Annan koiral huondeksel tulihiildy .
– Eihäi , gor’a , tulihiildy koiru syö .
– Eihäi oma maamo lastu syö .
– On , sе meijän kyläz on .
– A kuibo minä händy nähtä saan ?
– Nähtä saat : mene vai kirikköh , huraal käil ainoz molih mustissah .
Häi menöö kirikköh – molii naine itkun ker polvilleh mustis sovis .
– Mindähbo sinä , t’outoi , molittoz nengalei itkun ker ?
– Ole poigu-rukku vaikkaine , minul on suuri räähky .
– A mibo moine on ?
– Lapsen minä sain da söin .
– Et , maamo , sinä syönyt lastu , sinun lapsi – täz olen ! Heitä molinduhez dai itkendy ! Olihäi teil ennen kazakku .Sinä gu lapsen sait , häi minun otti , igenet hieroi vereh dai minun otti .
Mennäh leskiakkah :
– Oligo nenga i nenga kazvatettavu ?
– Oli .
Lapsen maamah kodih ottaa , pääzöö molimassah ääre , a kazakan blahoslovii koirakse kogo ijäkse .
Akku lapsen söi
Livvi
Vidlitsa
–
–
–
–
–
–
–
–
–
–
–
Мать ребенка съела
Russian
–
–
–
–
–
–
–
–
–
–
–