Texts
Return to list | edit | delete | Create a new | history | Statistics | ? Help
Pappi da suari
Pappi da suari
Livvi
Kotkozero
Sie
enne eläw huwtoral mužikku .Viizitoštu kilometria on hieruh , pogostu hieruh .Mužikal rodiew lapsi .Häi kerdua kaksi-kolme kävyw papilluo , sanow :
– Risti , vellin , minul lapsi !
Mužikal hebuo ičelleh olluh ei , a jallai pappi ei lähtenyh .Sid tulow sen mužikan luo suari .Suari käveli muadu myöte .Tulow pertih , tervehyön azuw , kätty kaikil andaw dai sille brihačul andaw . I kyzyw , mi on brihačul nimi .Brihačul on jo kolme vuottu .Mužikku vastuaw :
– Ewle vie ristitty lapsi !
Suari hänel kyzyw :
– Midäbo perii on sinul ristimätä neče lapsi ?
Mužikku otvietti hänel :
– Kolme kerdua papilluo kävyin jallai , a hebuo ei olluh . Pappi ei ni tulluh .
Suari ottaw kirjuttaw lappuzen :
– I mene nygöi tämän lappuzen kel papilluo : tulow vai ei tule .
Iče ei sano , ongo suari vai ewle .Mužikku sinne meni , lappuzen andoi papil .I pappi tulow , astuw ristimäh lastu ; mužikan kel astuw jällekkäi .Tullah kodih mužikan , sit suari papil kyzyw :
– Midäbo perii on mužikal lapsi ristimätä , kerran mužikku pidäw kolme-nelli kerdua viestii ?
Pappi hänel otviettii :
– Mibo sinul on dieluo ?
Iče ei tiije , ongo suari – a suari on pahois sovis .Suari hänel ni midä ei vastannuh , ottaw lykkiäw piälyssovat piäl , iče sanow :
– Kačo , mi minul on dieluo !
Hyö otetah sid lapsi ristitäh . Pappi lapsen ristii i suari rubiew ristižäkse .Sid suari lähtöw iäre i sanow lähtijes :
– Vuvven peräs tule čotal !
Papil sid rodih ylen paha mieles . (Iče astues duumaiččow ). Tulow kodih pappi .Tulow hänellyö diekkun istumah i kyzyw :
– Nu , kak delo , pop Jeremei ?
Häi otvietti hänel :
– Dieluo – ni pagize älä , vuvvekse srokku annettih : suaril puutui ylen paha sana – matti – sanuo . Duumaičin , on prostoi mužikku , a puutui suari .
Diekkun Fedot hänel sanow :
– Piästämmö sinun nečis bedas .Jesli syöttänet vuvven minun perehty i minuw , midä vai triebuinneh syvvä sinus .
Pappi hänelgi otviettii :
– Syötän , vellin , vai piästä !
Häi syöttäw-juottaw vuvven kaiken perehty . Vuvven peräs lähtöw diekkun Fedot suarilluo .Menöwhäi , suarilluo piäzöw .
– Vot , mih kučuit , euari ? Minä nygöi tulingi .
Suari sanow :
– Vot tulit , nygöi minä annan kolme zaduaččua . Voinnet otviettie , äski piäzet hengih , eiga piä poikki !Vot nygöi , – sanow , – enzimäine zaduačču on nengoine , voinnet arvata : Mi on taivahas tiähtie ?
Häi otviettii :
– Sen , kačo , tiijen , mi on tiähtie taivahas , – sanow , – on kaheksa miljardua kaheksa sadua miljoonua seiččie tuhattu kaheksan kymmen seiččie sadua suuren tiähten kel !
Suari otviettii :
– Tiijedgo hyvin ?
Häi sanow :
– Opi vai kajožal siäl iče lugie , ga sid sanot , kielastin vai en .
Suari duumaiččemah rubei :
– Äijän , padin , - sanoi , - naverno voibi olla tozi .Nu nygöi tämän arbait , arbua nygöi toine zaduačču !
– Mibo toine on ?
– Vot äijängo minä maksan ?
– Sinä , – sanow , – maksat kaksikymmen yheksä rubl’ua , jengahizin jesli myvvä !
Suari hänel otviettii :
– Čort voz’mi , midäbo minä ylen vähän maksan ?!
Häi otviettii :
– Sinä olet mualline jumal .Jumal on myödy kolmeskymmenes rubl’as , a sinä olet rubl’ua huogehembi !
Suari duumaiččemah rubei i sanoi :
– Tozi on , olen jumalua rubl’ua huogehembi .Nu vot , kaksi arbait . Nygöi kolmas arbua !
– Mibo on kolmas ?
– Midäbo minä duumaičen täl minuutal ? Arbua täl minuutal se !
Suari sil aigua duumaičči : "Oh kehveli , pappi kai gu nämä dielot tiezi ".
– Nu vot , midäbo nygöi duumaičiin ?
– Vot , – sanow , – sinä duumaičit : täs pagizet pop Jeremein kel , a on täs diekkun Fedot !
Suari ottaw täpähyttäw piädy :
– Moločču , nečengi arbait !
I hänel vie andaw na čai kaksikymmen viiži rubl’ua d’engua i työndäw kuučerin kodissah vedämäh .Kodih työndi : kodipereh ihastui i iče pappi ihastui !
Pappi da suari
Livvi
Kotkozero
–
–
–
–
–
–
–
–
–
–
–
–
–
–
–
–
–
–
–
–
–
–
Поп и царь
Russian
–
–
–
–
–
–
–
–
–
–
–
–
–
–
–
–
–
–
–
–
–
–