Texts
Return to list | edit | delete | Create a new | history | Statistics | ? Help
Elettih oldih mužikke i akke
Elettih oldih mužikke i akke
Ludian
Southern Ludian (Svjatozero)
Elettih
oldih mužikke i akke .Akke ukole sanow :
– Mäniižit tänäpäi nagrište kyndamäh .
Mužikke sanow :
– Voib lähtäi .
Mänöw nagrišpalole .Val’l’astaw hebon adrah .A heboh tarttuw puarmat , čakkat .Mužikke išköw puarmuoit i čakuoit , i kieran išköw , seiččei puarmat pakkuw i kuussadat čakkat .Mužikke sanow :
– Nygy minä olen bohatteri .Kieran viipaindal , – sanow , – tapuoin kuussadat saldattat i seiččei bohatterit .Nygy minä en rubei nagrište kyndämäh , lähten parembi vojuimah kons ku nečen vastah väget suittui .
Tulow mužikke kodih , eigo syö , eigo d’uo .Ainos duwmaiw voinat .Akale sanow :
– Anda sinä minule pala paltinat .
I ottaw mužikke paltinan i hiilel kir’d’uttaw : "Minä Fanafan Fanovič yhtel viipaindal tapuoin seiččei bohatterit i kuussadat saldattat ".Nowzow hebole selgäh i tupičan panow vyön alle i lähtöw saarilloh ajamah .Ajaw dorogat myöte , tulow kaksi bohatterit vastah .Kačotah hänen ryndähih , što häin yhtel viipaindal tapuoi seiččei bohatterit i kuussadat saldattat .Loiton sua kirguw :
– Älägät ajagat lähikse , ettego näge : mua ei kanda , što d’algat muas ribištah .
A ičel hebon hubutte d’algat muas ribištih .Toižet pölgästyttih , hebot kiättih i lähtedih edel ajamah .Ajettih kolmei , sigä vastavuw bohatteri i sille kirgutah toižet bohatterit :
– Kiändä huolita hebo iäre , eikä kaikin myö mänemme !
А sе vastaži :
– Mikse ?
– Edgo näge , ken ajaw dälgeh ? Mua ei kanda .
Hebot ajetah kaikin nel’l’ saarilluo .Sidä Fanafan Fanoviččaa saari kuččuw lično kävymäh .Häin mänöw saarilluo i sanow :
– Midä kučuit , milostivoi gosudar’ ?
– Vot kučuin minä sinut sidä perin . Ningomaižel peldol rodiihe meile voine i rubedaw siit čuras piäin tulemah bohatteri i meiden puoles pidäw olda bohatteri .Kudai čura voittanow , ob’azatel’no pidäw tuoda piä saarille .
Häin tulow pihale i saari dälgeh .I diäviw kaikile bohatteriloile :
– Vot ninga i ninga , teile pidäw mändä tänäpäi peldole kudamal tahto .I jesli voinow voittai , piä tuoda minule .
Fanafan Fanovič raspor’adiiheze i työndäw kaikis tyhjymmän bohatterin .Se mänöw peldole i voittaw sigäläižen bohatterin i piän leikkadaw i tuow sen saarile .I mugaže toižet kaksi bohatterit toižiden päividen voitettih i piät tuodih saarile .D’o dielo kasniiheze Fanafan Fanoviččah .Lopun päivän d’o pidi mändä hänele .Ajaw häin peldole .Toižiile bohatteriloile oli sabl’at , a hänel kirves tupičče .
Ajaw peldole , kacčow – sigä piäi tulov bohatteri , daže strašno on kaččoda .Häin ottaw – muul ni mil ei ole silmit kattada , ottaw kaftanan polal silmät kattaw , što avuoin silmin on strašno mändä .Sigäläine bohatteri kaččow i sanow :
– Kačo väget suittaw , pidäw hot’ minule silmät kattai , eikä avuoin silmin on strašno kuolta .
Otti i rubeži paikal silmit sidomah , sil aigat nagrehen kyndäi mužikke mäni da piän leikkaži sil bohatteril .Piät opii ottai keral , no ei voinut nostai .Ei ottanut vägi .Ajoi saarilloh , häin prižmiw :
– Mikse et tuonu piät ?
A häin vastaži :
– Saari , ei maksa tyhjät maraita käzit .
Siit saari työnsi ravedimman bohatterin piät tuomah .Siit bohatteri mäni i piän tuoi .Siit saari anduoi heile suuren nagradan , anduoi .Siit otti i häin d’aguo , puolet otti piäl piäin , a toižet puolet d’aguoi n’el’läh vuittih .A siid hyö erottih ken kunnegi .Saari nagrehen kyndäjäle azui suwren kivižen kodin , kuni häin sigä ajeli .
Konze kodih tuli , ka akke i itköw pordahiden piäs :
– Kävelit , a nagriš diäi kyndämättä .Kačo , nygöi meiden kodi riičittih , azuttih uwzi kodi .Mäne nygöi elämäh , neče kai sinun kävelys azui .
Sih sanah tuli volosnoi staršin :
– Fanafan Fanovič , tämä kodi sinun .
A nygöi sе mužikke , nagrehen kyndäi , eläw siit kodis .
Elettih oldih mužikke i akke
Ludian
Southern Ludian (Svjatozero)
–
–
–
–
–
–
–
–
–
–
–
–
–
–
[Фома Беренников]
Russian
–
–
–
–
–
–
–
–
–
–
–
–
–
–