Texts
Return to list | edit | delete | Create a new | history | Statistics | ? Help
S’ert’ukanniemi
S’ert’ukanniemi
Karelian Proper
Kestenga
Šilloin
kulemma aina isäukon kanssa kalaštamašša lahešša , šiinä Kantolahešša .Niin myö kävimä aina siihi mualla .Ta kun apaja on ihan šen mökin viereššä .Niin mie kun kulen rantua , niin šiinä on kakši šalamuo on jiänyn .Šemmoista , niin kuin pirtin šalamuo .Ja kiukuan tila on jo kašvautun varvalla .Mie isäukolla šanon : "Kuka täššä on elän , kun täššä on niin kuin pirtin tila rouno ?".Še šanou : "Niin ammuni aika oli , miekänä en muissa !""No , kuitenki še kennih on elän šiinä ?"
Še šanou : "Mie vain olen kuullun , jotta šiinä eli šemmoni mieš , joka vanhah aikah …Šielä kun 25 vuotta šota-aikua oli , kun otetah šotah .Yksi mieš oli karannun ja tullun šemmoseh paikkah , että häntä ei ken muka šieltä i löyvä .Elautun , luatin kämpän siihi ja siinä eli .Ja kohta huomattih , jotta šielä joku eläjä on .Ja lähtiettih häntä eččimäh .No tottaš oli šemmoni mieš , jotta še oli vähäsen ... vähän tolkun mieš , jotta še jo vahtasi , jotta ei häntä ken noutais šieltä .No siitä kuuluu , jotta on šielä kulkijat .Ja hänellä oli kurikka luajittu koivušta .No koivušša on pahka šemmoni .Šemmoni luajittu , että halkuo millä halata .Kuuntelou – tullah ne vain .Ta kyllä še tämä nyt ei mitkä muut , a hänen eččijät .Ja hiän ei muuta , kun panou ovet kiini , mutta šalpah ei pane .I hiän mänöy oven viereh , hänellä oli kalitora šemmoni pikkaraini , ottau kurikan reunahanša .Kaččou – kolme miešta tulou .Ne on ašeissa , niillä on šapelitko , mitkö ollou .Oliko šilloin šapelie vain mit ollah ne heilä .Šilloin oven kun enšimmäini avai , ukko še šeiso , hiän kurikalla enšimmäiseh !Toiset – pakoh !Ja hiän pihalla vuiti , että vielä niitäki šuaha .Hänen mieleštä ei olis laškie yhtänä takasin , jotta hiän olis ne pannun kaikki šiihi …No nehän kerittih puaja .Ei hiän lähten jälkeh konešno .Niin šiitä vanhin , mi oli joukošša , šano , jotta hiän S’ert’ukkua eččimäh enämpi ei lähe , eikä vankiččomah ".Vot ni šemmosie oli niitä miän šeuvulla , no mie en tiijä , että onko ne tullun tai eikö .Mie kyllä omilla šilmin nävin , siinä oli kakši šalamuo .Tuntuu vielä šiinä , että še on ihan …pirtti vielä veššetty , šeinät vähä näkyy ta kiukua vielä oli šiinä .Še on S’ert’ukan nimellini mieš ollun šiinä paikašša .
S’ert’ukanniemi
Karelian Proper
Kestenga