Texts
Return to list | edit | delete | Create a new | history | Statistics | ? Help
Šinipeigalon starina
Šinipeigalon starina
Karelian Proper
Padany
Оli ennen
ukko da akka .Heilä on tytär .Akalla da tyttärellä on šinine peigalo .Akka läziydyy dai rubieu kuolomah , ukollah sanou :
– Jesli kun ruvennet miun kuolenduo naimah , niin muista elä nai , kun šinipeigaloizista .
Akka kuoli , dai ukko lähtöy šinipeigaluo eččimäh .Kaikkialla kävelöy , kai paikkazet eččiy , no löydiä ni mistä ei voi .Tuli kodih dai sanou tyttärelläh :
– En ni mistä šinipeigaluo löydänyn , siun nyt pidäy miula miehellä tulla .
Tyttö itköy , sanou :
– Äšen siula tulen , kun päivänmoizen šulkun tuonet .
Läksi tuatto eččimäh .Eččiy , eččiy kai linnat i löyži yhestä päivänmoizen šulkun .Tuli kodih .
– Nyt , tyttäreni , jo löyžin šulkun , tule miula akakši .
Tytär itköy :
– Äšen siulas tulen , kun voinet kuudamonmoizen šulkun tuuva .
Tuas tuatto läksi eččimäh .Ečči , ečči kai paikat i löyži šemmoizen šulkun .Tuli kodih dai sanou :
– Nyt , tyttäreni , siuda rubien naimah .
– Oi , tata , en tule vielä .
Miula kuni et löydäne šemmoista šulkkuo , mimmone on tähti taivahalla .
Tuas tuatto kai paikat ečči dai löyži .Tuli kodih , sanou tyttärellä :
– Nyt siun pidäy tulla miula – ei ni mi auta .
Läksi tyttö jauhomah , itköy da jauhou , itköy da jauhou .Tuli hiiri dai sanou :
– Jauho , jauho , neidizeni , tuatollaš männäkšeš , ičelläš svuad’bakši .
Mänöy hiän siidä leškiakkazella sanomah :
– A-voi-voi , kun pidäy tuatolla miehellä männä .Etgö tiijä n’euvuo , millä mie piäzizin ?
– Tiijän , – sanou leškiakka , – ota piitukku , harjatukku da šulkkupaikka .
Kun kylyššä jaksauvut , sylle kartan piäh , sylle päčin piällä i sylle lauteilla .
Tulou kodih , lämmitti kylyn .Mäni kylyh dai jakšauduossah sylgi kartan piäh , päčillä da lauteilla .Tuatto mäni oven tuakše i huhuou :
– Jogo jouvut ?
Ei tyttö ni midä virka .Avai oven , ka on kun vuattiet , a tyttö on alašti puannun .Hiän hyppäzi tytöllä jälgeh :
– Jo huora , kurva , miun jätti !
Jo tuatto on aivan tabuamašša , silloin tyttö lykkiäy harjatukun , i sih roiteh šemmoine meččä , što ni millä ei šua piäššä .
– A-voi-voi , en ottanun kilpakirvestä engä halpahakkurie .
Läksi kodih hakkurie käymäh .Hakkazi mečän , a tyttö sillä aigua juokšou jo pitän matkua ielleh .Tuatto jo leikkai mečän , dai tuas juokšou jo ihan jälleššä .Tyttö tuas lykkiäy piit , i rodih piivuara .Tuas tuatto nakkuau , hakkuau dai piäžöy jälgeh .Tuas on ihan kännašša , lykkäi tyttö šulkkupaikan .Rodih heijen välih tuline koški .Tuatto toizelda rannalda :
– Tule , kaksi sanua sanon , nyt mie silma en voi enyä tavata .Vot siula matin kalkut kaglah , – i lykkäzi hänellä ne kaglah .
Läksi tyttö matkuamah ielläh , tuli havon luo , sanou :
– Vuota siä , kun tuošta piäličči harppuan .
I ne hänellä kaglašša sanotah : "Vuota siä , kun tuošta piäličči harppuan ".
Mänöy hiän tuas ielläh .Tuli vastah onži kando :
– Vuotaš kun noužen tuoh kandoh .
Dai ne hänellä kaglašša matitellah : "Vuota kun noužen tuoh kandoh ".
Nouzi hiän kandoh i ei ruohi ni kunne liikkuo , kun on ihan alašti .
Sillä aigua čuarin poiga on mečällä , koira rubieu ylen äijäl’di haukkumah ondeh kandoh .Tuli čuarin poiga kodih i sanou tuatollah da muamollah :
– Mi ollou onnešša kannošša , kun koira ylen haukkuu .
– Ka pidäy kaččuo , midä haukkuu .
Tuli kaččo čuarin poiga , mäni kọdih , sanou :
– Kannošša on ylen kaunis neičyt : ni mualla moista , ni vezillä verdaista .Mie hänestä nain .
Otti hiän neiččyön kodih toissapiänä , a tyttö ni midä ei paissa ruohi .Eletäh-ollah jo kolme vuotta .Kun ei ni kenen kera pagize , pannah händä hiržistä perttie pežemäh – ei virka .Pandih märgiä kargua jauhomah – ei ni midä virka .Jo vaččaudu dai šai ylen kaunehen poijan .Poiga polvilla leikattih , no ni midä ei virka .Čuarin poiga händä l’uubiu , ka ei voi ni kuin eliä hänen kera , kun ei pagize .Rubieu čuarin poiga naimah toizešta .Tytöllä paha mieli .Mäni leškiakkazeh , sanou akalla :
– Kuule , kukki leškiakkane , etgo voi n’euvuo , kuin mie näistä piäzizin ?
Hiän i sanou tytöllä :
– Ota da mäne kodihes , keitä mahon lehmän maidoh linda , šiidä sano : "Kuot’elgua lindua ".Ne kun männäh maistelomah , dai luzikalla painalluta ielleh .Hyö sinne i paletah .
Mäni hiän kodih , keitti linnan , sanou :
– Maisselgua šuolua .
Ne kun mändih maistelomah , dai hiän luzikalla ielläh painallutti .Sanou :
– Oligo hyvä ?
Ka ei enyä i matiteldu .Hiän ylen äijäldi ihaštu .
Tuli svuad’ba , a hiän on prisluugana .Kisseiperednikan helmalla stolalla voipadua kandau .Uuzi moržien i sanou stolan tagua :
– Mitty prostoi on miän korolin akka , kun padua kisseiperedniekalla kandau .
Vanha akka i sanou :
– Miula hiržipertti pežetettih , märgiä kagrua jauhotettih , poiga polvilla leikattih – ni midä en virkkan , a siä jo enžistolašša pagizet .
Poiga kun kuuli iänen , hänen luo hyppäzi ihaštukšissah .Da hänen ottau akakšeh , i ruvetah elämäh hyö endizelläh da vielä paremmin .
Šinipeigalon starina
Karelian Proper
Padany
–
–
–
–
–
–
–
–
–
–
–
–
–
–
–
–
–
–
–
–
–
Сказка о Синепалой
Russian
–
–
–
–
–
–
–
–
–
–
–
–
–
–
–
–
–
–
–
–
–