Texts
Return to list | edit | delete | Create a new | history | Statistics | ? Help
Viižaš tyttö
Viižaš tyttö
Karelian Proper
Tunguda
Oli
ennen pappi , papilla oli kolme tytärdä .Hiän tyttärie ei laže gul’aimah .Šuattau hiät kahen meren tuakši .Luadiu kel’l’azet kolmella tyttärellä , panou šinne hiät , ikkunašta noštau .Yksi on vanhin , toini nuorin , kolmaš keškimmäini .Nuorin on ylen kaunis , ei šua šuarnoissa šanuo , viržissä vedyä .Joga ikkunan alla tuatto pani saduzet dai linduzet laulamah .
Šiidä čuarin poiga tiijuštau , što kolme tyttyö on hyvyä .Hiän šuorieu kualikan vuatteih , šuorieu , a alla panou ylen hyvät vuattiet da čuassut da kai , ottau koroban käzivardeh i lähtöy buitto kyžymäh .Mänöy šinne kahen meren tuakši .(Hiän oli ylen čoma , mäni nasmehaimačče čuarin tyttäristä ymbäri ). Šiidä tuli ikkunan alla .Enžin mänöy vanhemman tyttären luo kyžymäh :
– Eigole , tyttön , ozrazie jyväzie ?
Dai tyttö tuou ozran jyväzie stauččazen i rubieu ikkunašta andamah .Tyttö kun rubieu ozrie kuadamah värččih kyžyjällä , ga hiän värčin šuun umbeh plakkuau : jyvät kaikki muaha i männäh .Hiän ildah šuate jyväzie keryäy , štobi yökši piäššä tytön luo .Keryäy ozrie yksin jyväzin .Tuli ilda .Hiän pyrgiy yökši :
– Laže , tyttön , yökši .
– Kuin mie šiun lažen ?
– Anna ut’eral’nikka , mie riputtauvun , a šie viät .
Tyttö ut’eral’nikan ando , hiän riputtaudu i krabahti nouzi .Tuli da kiugualla nouzi , kaikki pahat vuattiet piäldä heitti : roih šuarnoissa šanuo , viržissä vedyä , kai pomuadalla tulou .Dai tytön muanitti , tyttö še i maraudu .Hiän tytön kun nagro , da česnoi tyttö oli , ga linduni sadušta hävii , dai jo lindu ei laula ; dai sadu kuivi .
Tyttölöillä oldih ženihät , ga tämä ručaiččih , što hiän nagrau .Tuattoh tulou , ga jo sadu kuivan dai linduni yksi hävinnyn .Hiän jo l dogadiu , što tämä tyttö männyn on , a toizilla linduzet lauletah dai sadut kukitah .
Tulou tuaš ilda , tuaš kualikka tulou toizen – keškimmäizen tytön luo .Tuaš šamoin pidäy värččie , jyvät tuaš muaha mändih , i ildah šuate jyväzie keryälöy i tuaš illalla pyrgiy yökši .Tyttö andau ut’eral’nikan dai noštau kel’l’ah .Čuarin poiga tuaš jakšauduu , pahan nutun piäldä heittäy , tuli kaunis , kun ei šua malttua šanuo , a tyttö ei tiijä midä i ruadua – ikkunašta et hyppyä .Tuaš poiga tytön i nagro , läksi pois kodih kahen meren tuakši .I niin hiän nagro kakši tyttyö .
Čuarin poiga tuli kolmannešta naimah .Enžin tahto kolmannen tytön nagrua dai tuli hänen luo kuin toizien luo dai piäzi kel’l’ah , jakšaudu .Tyttö pöläšty , kaččou – ei ole aziet hyvät , dai čokkuau nožniččemet , lykkyäy pihalla dai käšköy poigua :
– Mäne nošša nožniččemet , äšen laššen yökši .
Poiga mäni , a hiän šillä aigua staunin ločkai umbeh , hiän jäi ikkunan alla .Pyrgiy poiga jälelläh kel’l’ah .
– En lašše , – šanou tyttö , – sizaret nagroit , milma et nagra .
Poiga kyžyy tytöldä :
– Laže jälelläh .
Tyttö ei lašken , i poiga läksi mänömäh kodih .Dorogalla kai jalat kylmätti , varbahat kylmätti .
Nuorembi čikko vei čuarin pojalla čikkoloijen poijat : yhen pani käzivarrella , toizen toizella käzivarrella .Sadu rubei ikkunan alla kukkimah i linduni laulamah .
Pojat ruvettih itkömäh .Čuarin poiga pöläšty , ei tiijä , midä i ruadua .Šanou tuatollah azien .Še tyttö sadun tallo , linnun tappo .Čuarin poiga duumaiččou : "Pidäy naija še nuorembi tyttö ", – i tulou kozzomah .
Tyttö šanou :
– Tulen miehellä , vain prostinet endizet dielot , midä mie siula luajin pahua : lapset toin , sadun tallain , linduzen tapoin i jalat siulda kylmätin .
Poiga šanou :
– Prostin , tule .
Briha ottau , tyttö mänöy , hiät pietäh .Tullah šulhazen kodih dai pannah heidä muata .Muata kun ruvetah , ga čuarin poiga i šanou :
– Nygyön mie kai muissan i kai malgivot makšan , mie šiulda piän leikkuan .
Poiga läksi suabl’ua käymäh , a tyttö hyppäi koikalda , näppäi mezibočkan i pani krovatilla , katto , kun rissittyhengen maguamah .Poiga tulou da kun suabl’alla ähkyäy kakši kerdua , dai bočka puhkei , mejet lähettih vuodamah .Hiän ni pöläšty :
– A-voi-voi , kun mara avaudu , kai paškat vuuvetah krovatilla !Kun vielä šie tukkuuduizit , ka enämbi en märällä šormella kožettais .
Tyttö šanou :
– Šuulaš-kielaš , kun et kožettane , ni ihan šamašša tukkuuvun , kai dielot paretah .
– No en kože , vain šie tukkuuvu .
Naini nouzi krovatin alda , kai keräzi mejet , bočkan paikkazi i pani paikoillah .Poiga ihaštu .Heilä oli äijä kuldua .Kullat oli pandu šadavuodizen akan alla kätkyöh , akkua šidä tuuvitettih da maijolla šyötettih šarvešta .Se oli čuarin baabuška .I niin hyö ruvettih elämäh .Pojat kažvettih šuurekši , muamoloijen luo käydih gostih .
Elettih erčykši , parettih parčukši , kovettih kolačukši .
Viižaš tyttö
Karelian Proper
Tunguda
–
–
–
–
–
–
–
–
–
Хитрая девушка
Russian
–
–
–
–
–
–
–
–
–