Texts
Return to list | edit | delete | Create a new | history | Statistics | ? Help
Oli ennein ukko da akka
Oli ennein ukko da akka
Karelian Proper
Tunguda
Oli
ennein ukko da akka .Suadih hyö poiga .Ukko kuolou , akka jiäy poijan kera elämäh .Kažvatti poijan da työndi töih gorodah .Poiga työššä oli kolme vuotta : šai yhet vuattiet piällä , a rahua šai vain yhen kuldazen viizirubl’azen , muuda ei .Tulleššah hiän toi tyhjiä kančervobantkoja värčillizen .Romahutti ne karžinan pohjalla , kuin rahašäkin .
A hänellä himottau toizešta talošta naija rikaš tyttö .Työndäy muamoh talošta käymäh puolipuudahista : "Šano , jotta poiga tuli gorodašta , en tiijä midä merkkuau ".Akka toi žen aštien , a poiga šolahti žen kera karžinah , kaivo šinne hauvan .A toizen talon ukko tuli kuundelomah peitočči , jotta midä hiän mittuau .Kuundelou – niin kuin rahat helättäis .A poiga karžinašša purkkija haudah lykkiy ."Äijä on d’engua kehnolla , kolme vuotta oli šielä ", – duumiu ukko kuunnelleššah .
Poiga nouzi karžinašta , ando mittuanda-aštien muamollah da kiinnitti žen pohjah ainuon viizirubl’azen .
– Vie že aštie , šano äijä passibuo , muuda ni midä elä virka , – šanou poiga muamollah .
Ukko šanou akallah , kun poijan muamo oli lähten :
– Mäne , kačo aštiešta , midä hiän on merkinnyt .
Akka mänöy , kaččou , ga mitan pohjašša viizirubl’ahine :
– Ga d’engua on merkannut .Pohjah on puuttun viizirubl’ahine .
– Šilloin pidäy tytär šuattua hänellä miehellä , – šanou ukko , – kun noin äijän toi d’engua . Kučumma huomena tänne .
Huomenekšella akka mänöy kuččumah .Šanou : "Terveh teilä "!A poiga oli männyt meččäh koiran kera .Šanou poijan muamolla :
– Kun Van’ka tulou mečäštä , ni tulgah paikalla meilä käymäh .
Kun Van’ka tuli mečäštä , šanou muamo :
– Van’ka , šilma kučuttih toizeh talon paikalla , kun tulet .
Van’ka otti da šuoriudu hyvih vuatteih .Mäni šinne , ga šielä samovuara keitetty , Van’ka šyömäh issutettih .Istuuvuttih juomah , paistih šidä-tädä , a tuatto i šanou :
– Etgö šie miun tytärdä ottais miehellä ?
Van’ka šanou :
– Ei hiän vet’ miula lähe , kun mie olen paha da vielä leškiakan poiga .
– Lähtöy , koz’z’o šie vain händä .
Juodih , šyödih dai lähettih bes’s’odah tytön kera .Poiga šanou tytöllä :
– Etgö šie tule miula miehellä ?
Tyttö šanou :
– Tule huomena , nin tulen .
Huomena illalla poiga i tuli .Tuaš händä juotettih da šyötettih .Tuaš tuatto tyttyö tariččou .Vuidittih bes’s’odah .Poiga šanou tytöllä :
– Mäne šie tuattoš luo , andakkah miula kakšišadua rubl’ua d’engua häiksi .Miula kun on d’engat pandu haudah , ni en kehtais ruveta kaivamah .Vielä sussiedat viijäh .
Tyttö mäni , kyžyy .Tuatto šanou :
– Annamma , miksi emmä andais .Kyllä hiän toičči makšau .
Ando d’engat , da laški talohoš häidä pidämäh .
– Šiidä kun d’engat otan hauvvašta ni šiidä oššan šuuren kojin , – šanou poiga .
Hiät piettih da mändih kodih elämäh .Poiga lähtöy meččäh , muamo-akka tyttären luo toizeh kyläh , a moržien jiäy yksinäh kodih .Tulou pappi moržiemen luo , šanou :
– Etgö šie milma ota druugukši ?
– En ota . Annahan mie enžin kyžyn Van’kalda , kun kodih tulou .
– Elä šano hänellä , vet’ miun dai šiun tappau , – šanou pappi da lähtöy pois .
Kun vain pappi kergii lähtie , šilloin tulou diekka :
– Oi , – šanou , – N’ura , kun mie šilma äijäldi šuvaičen !Ota milma druugukši .
– En voi ottua . Anna Van’kalda kyžyn , kun mečäštä tulou .
– Elä šano , miun dai šiun tappau , – šanou diekka da kiirehäizeh lähtöy .
Tulou Van’ka , da hänellä i šanou N’ura :
– Vot , miula kakši druuguo kävi pyrgimäh .
Van’ka šanou :
– Šie kuču enžin yhtä , käšše tuuva šada rubl’ua rahua , šäkki vehnäjauhuo da muuda .Šiidä toista .
Toizena piänä tuli pappi .Kyžyy :
– Šanoitgo ?
– Engo hot’ ! Kuule vain , tuo šie šada rubl’ua rahua , rengi voida , šäkki vehnäjauhuo , šokerie .
Da pappi läksi käymäh .Mäni da toi teräväizeh .Ruvetah perttie lämmittämäh , olad’d’ua paistamah .Moržien šanou :
– Van’ka tulou kahen tunnin piäštä .
Paisto olad’d’at .Kun vain ruvettih juomah , N’ura šanou da kačahtau kelloh :
– Mäne , pappizen , pois , paikalla tulou Van’ka , molemmat tappau .
Pappi kiirehäizeh lähtöy .Ei kerinnyt ni čaškua čaijuo juuva .Tulou diekka .Dai hiän kandau koistah rahua da kaikkie hyvyyttä .
– Kahen čuassun piäštä Van’ka tulou .
Tuaš , kun vain ruvettih juomah , ga N’ura i šanou :
– Čuassut jo mändih , seičas tulou ukko mečäštä .Tule huomena aivombah .
Diekka pois .Ukko i tuli .N’ura hänellä kaikki näyttelöy , midä šai .
– Huomena vielä luvattih tulla .
Ukko tuaš meččäh lähtöy .Dai pappi tulou :
– Šanoitgo ukollaš ?
– En šanon ni midä .
Ruvettih olad’d’ua paistamah da perttie lämmittämäh .A Van’kalla oli čuralla luajittu siira .A ukko , Van’ka , ei männytkänä meččäh .Rubei buitto humalah .Kun ruvettih čaijuo juomah , hiän sinčoišša möläjämäh .
– Kedä ollou pertissä , kai tapan !
Akka i šanou :
– Kunne sie pappi rukka šuat ?Jakšauvu da pane vuattiet krovatin alla , a iče šeizatu čuučalan reunah .
Tuli izändä , karjuu :
– Akka , ongo kedä druuguo šiula ?
– Ei olei kedä .
Van’ka kaikki kaččelou da buitto ei ni huomua pappie .Lähtöy da mänöy podvalkalla .Tulou diekka .A pappi šeizou da varajau .A N’ura diekan kera juomah .Šanou :
– Nyt kun juomma da šyömmä , nin muata i rubiemma .
Tuaš Van’ka sinčošša möleydy .Diekka hädäydy :
– Ga minne mie nyt ?
– Jakšauvu , pane vuattiet krovatin alla , da iče mäne čuučalah šeizomah . Ei koše .Čuučaluo hiän šuvaiččou .
Dai mäni diekka šinne .Tuli Van’ka kirvehen kera , kaččelou joga paikan , buitto ei nii midä nähnyt .Van’ka rubieu N’uran kera čaijuo juomah .A kyläldä kuuluu huuvanda :
– Arhirei tuli !Arhirei tuli !Missä on pappi da diekka ?!
A diekka da pappi ei ruohita lekahtua .Ečitäh pappie .Papin akka joga talossa juoksendelou .Tulou Van’kan taloh .Hyö čaijuo juuvah , voirengit stolalla .
– Eigo ole pappie teilä ?
– Ei ole .
– A mistäbä työ voida šaitta ?
– Meilä lehmä kando , nin voida rubei lypšämäh , – šanou Van’ka , a N’uralla šanou :
– Šie mäne teräväh pois pertistä .
Papin akka šanou :
– Myögyä työ miula že lehmä , äijän makšan .
– Emmä lehmyä myö , ga važazen voimma myyvä . Andanet viizikymmendä rubl’ua d’engua .
– Ga buitto en anna .
Da d’engat stolalla heittäy .A Van’ka avuau keški oven , tembuau papin akan krovatilla da rubieu hänen kera muata .Pappi nägöy kaiken , no ni midä ei kergie virkkua .Papin akka hyppyäy da juokšou pois .Kun oli vain ruvettu čaijuo juomah , tulou diekan akka :
– Ettägö diekkua ole nähnyn ?
– Emmä ole .
– Mistä teilä näin äijä voida ?
– Ga miän lehmä lypšäy pal’l’ašta voida .
– Ettägö myö miula ?
– Emmä lehmyä myö , ga važan voimma myyvä .
Akka heittäy viizikymmendä rubl’ua d’engua stolalla .N’ura läksi pois pertistä .Tuaš Van’ka oven avai , šieppai diekan akan krovatilla .Tuaš diekka ni midä ei voi virkkua .Akka hyppäi da läksi juokšomah .Van’ka kirjuttau kirjapalazen da lyöy žen veräjällä : "Täššä talošša luajitah čuučalua ".Arhirei lähtöy iče kylyä myöten pappie da diekkua eččimäh .Kun tulou pihalla , kaččou pihalla , kaččou kirjapalan dai tulou perttih .Šanou :
– Miula himoittais nähä šiun čuučaloja .
– Ga näytämmä .
Van’ka mänöy , voijattau papin da diekan nävöt novella , jotta arhirei ei tundis .Arhirei avai oven da šanou :
– Mie oššan hiät .Ga mintäh heilä häpiet riputah ?Tuo keškimäine ois hyvä .
– Ga mie heildä ne pois leikkuan , – šanou Van’ka da rubieu veistä hivomah . Hivou veičen .
A pappi da diekka pölläššyttih : "Pidäy meilä täštä hoš kuin piäššä ".Dai ikkunašta hypättih da juoššah alačči kodiloih .Papin koissa akka da arhirei pölläššyttih , eigä tahota laškie šiämeh .No lašetah da tunnetah , jotta pappi da diekkahan ne ollah .
– Midäbö työ šinne mänittä ?
A hyö ei virketä i midä .Šanotah , jotta Van’ka heilä niin ruado , muuda ei .Arhireikana ei ruohtin männä čuučeloja käymäh .A Van’ka makšo apellah d’engat – velat – a iče piäzi hyvin elämäh .
Oli ennein ukko da akka
Karelian Proper
Tunguda
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
[Чучела]
Russian
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–
–