Тексты
Вернуться к списку | редактировать | удалить | Создать новый | История изменений | Статистика | ? Помощь
Pelvašruavot
Pelvašruavot
карельский: собственно карельское наречие
Толмачевский
Pelvašruavot ollah
jygiet .
Pelvaš šuaččow äijä ruadua da hyviin , äššen i hyvä pelvaš kažvaw .
A hyväštä pelvahašta i hyviä t’yöd’ä , kuin kaikki čislalleh mänöw , ei lumen alla jiähä .
A pelvahanke ruaduo ymbär’i vuoži .
T’yön šygyžyl’l’ä al’i že i enžitalvella varuššat , a vuatteinke keviäh šuat muokkuačet .
Ruavot zavod’iečetah viel’ä keviätkynnännäštä šuat .
Polossan kynnet’äh , kuin mua vähäzel’d’i kuivahtaw da vähäzel’d’i muwrehtuw .
Yl’en tuorešta ei voi pelvahalla kyn’d’iä , kal’čistuw .
Kagra , že ei varaja , a pelvaš varajaw .
Kyn’d’ähyöh mua šeizow kodvazen , štobi ahavoiččiis’ da mur’iembi l’ien’iis’ .
Konža kuivahtaw mua , pid’äw aštoija .
Kuin peskumua , n’in n’ičevo , a šavimua on paha yl’en kuivana aštoija .
Meil’ä Lomupeldo ol’i pesku , a Ondrikovapeldo čistoi šavi .
Polossalla kuin tulet aštoimah , n’in ed’izeh pid’äw ris’t’iel’l’ä .
Že on yl’en jygie .
Kuin hebozet on upr’uamoit , n’in kiät rubiemašša ynnäh riwhtuaw , vohottamah ruvetah .
Ris’t’iel’l’ä – pid’äw ris’s’ikkeh ajella , žei ris’t’iel’en’d’ä .
Polossan n’okašša val’l’aššat hebozet aštovoih , rubiet ajelomah .
Kuin ew yl’en rownoi kyn’d’ö , n’in ed’izeh viel’ä šorrattelet .
Yht’eh piih aštoičet , kohaldi ajelet , a šiid’ä vašta rubiet ris’t’iel’ömäh .
A šorratella pid’äw šiks’i , štobi turvešta ei järel’l’äh kumata , štobi šängi jäis’ muah päit’ , a ei kumawduis’ piäl’l’ä päit’ yl’äh kokottamah .
Šorratelduoh zavod’it polossan n’okašta , hot’ kumbazešta mežašta , da ajat toizeh mežah , a šiid’ä mežašta tuaš enžimäzeh , t’äh mežah , a t’äštä tuaš toizeh mežah , i šen’iin toizeh n’okkah šuat .
Aštovoin jäl’gi l’iew kid’žoraz’iin .
N’okašša hebozet kiännät .
N’yt rubiet ajamah poikki enžikerran ajandajäl’gil’öih .
Šiwla aštovan jäl’gi l’iew šen’iin kuin čieppin’e .
Tuaš n’okašša kiännät i l’ähet toista jäl’gie vaš .
Kuin l’еvie polosta on , n’in viel’ä i kolmannen kerran ajat .
Šorrat kaikki kierozet , mit on jiännyöt , mih aštova ei fat’t’in .
Heboz’ie vanutat randa rannašta , kiät ruvetah lomimah , dai hebozet gor’ewvutah vatkuas’s’a .
Ris’t’iel’d’yöh tuaš rubiet ajelomah kohaldi .
Zavod’it yheštä mežašta da toizeh šuat , štobi kieruo ei jäis’ .
Kun hyvä , pehmie mua on , n’in kahteh piih ajelet , dai tulow , voit že kyl’viä .
A kun kovembi on , n’in i kolmeh i n’el’l’äh piih ajelet .
Aštoiduoh kaikki juwruot piäl’l’ä nowššah .
Aštova n’e kaikki keriäw , vain harvazeh aštovoida noštele , kuin äijä keräwdyw .
Tukkuzeh n’e juwruot kaikki mežah panet , šiel’ä hapatah .
Aštoiduoh mua l’iew pehmie , puhaš .
Aštova mänöw , kuin vet’t’ä myöt’ , piil’öis’t’ä mua , kuin vez’i virduaw , ših kyl’vät s’iemenen .
Kyl’vetäh mužikat .
Naizet aštoijah .
Kyl’vähyöh viel’ä kahteh piihyöh ajelet , kažvakkah .
Kuin šel’giet s’iemenet ollah , n’in n’äin ruadahuoh pelvaš l’iew šel’gie , soru ei kažva .
S’iemen’d’ä kyl’vet’äh , kuin kel’l’ä pid’äw parembua t’yödä , n’in tuagiembuazeh , a kuin en’ämbi voida , n’in harvembuazeh .
Tuagie pelvaš on kuijukkahembi , kuidu l’iew pehmiembi .
Harvemmašta – s’iemen’d’ä da čyl’kyö , že on čyl’kykkähembi , ryppiembi , a kuidu ei muon’e l’iene .
Kewhä mua , n’in i harvašta pelvahašta kuidu l’iew hyvä , vain vähembi , a vägöväh muah pid’äw äijäl’d’i tuagieh kyl’viä , kakši muon’e .
Da že on viigodnoimbi .
Pelvaš vyöh šuat , d’er’it , n’in kuhl’ahan’e kuhl’ahazen piäl’l’ä .
T’yöd’ä l’iew äijä , hyviä .
A t’yö meil’ä on nagol’i hinnašša .
Da t’yöštä vain vet i d’engat .
Muwvualda mis’t’ä otat ?
Vakas’t’a luad’iw talvella , da äijängo vakkazelda otat ?
Kaikki jarmankat ajelet , a konža kuin tuwvah mon’i regie , kerdah hinda langiew , oštajua vähä , puolet uwveštah kod’ih tuot .
A t’yöštä vuwvekši d’engat .
Toko i kolmehkymmeneh möimmä .
Vevot makšat , vellat juat dai ičel’l’ä vähän’e jiäw .
Pruaz’n’iekoiks’i pid’ii suaharuo , i šuwrimoida , i vehnäs’t’ä vähän’e .
Ol’i roshodua .
Konža pelvahan kyl’vät , huol’i kaglašta šygyz’yh šuat .
Hyvä kežä , n’in kažvaw .
Konža Spuasun ymbär’i (28.VIII ) konža Bohročoiks’i (21.IX ) pelvahan d’er’it , konža i Jäkimäh (10.X ) jiäw .
A d’er’ie pid’äw konža šulga zavod’iw langeta .
Kuhl’ahazet šeizatat kuivamah .
Konža kuhl’ahazet hyviin kuivetah , tuot hiät guominoh .
Srazu zavod’it i riibie .
A riivit’äh kaikkeh luaduh .
Ken i briwžalla puiččow .
Kebiembi on kiveh riehkie l’ibo kolotuškalla , pual’ikalla pergua .
Pual’ikalla i lapšet kolot’itah , a iče myö kiveh riehimmä .
Pellošta kuin vejät pelvahat , kuhl’ahazet , n’in panet n’ärt’ih guominoh , peräh .
Guominopuolella , katokšen alla , štobi ei kaštais’ .
Hiän i tumanua varajaw , siroi pahemmiin riibiečöw , jygiemmä .
Pihalla riivit’yöt lad’juat , a riibimät’t’ä pelvahat guominošša ollah .
Ka šeizatat kozlan lattiella , kozlah nuaglalla kiin’it’ät riivinlawvan .
Kel’l’ä kuin on rawdan’e riivinlawda , n’in rawdazen , a kuin kel’l’ä puwhin’e , n’in puwhizen .
Ew kaikilla rawdazet riivinlawvat , ollah i puwhizet .
A rawdazešša on puwhin’e vain lawda , a piit ollah rawdazet , tavotuot , n’e kuin nuaglat l’äbi lawvašta kolot’ittu .
Hiän tulow kaččomua kuin šuga .
Kozlalla ših , riivinlawvoin luoh , panet kivet , rownoit pl’iituškat da viel’ä kolotuškazet varuššat rewnah i rubiet riibimäh .
A riivit n’iin : tuot n’ärt’is’t’ä tukun pelvašta , kuhl’ahašt’a kolme-nel’l’ä , panet lattiella ičel’l’ä rewnah .
Šeizawvut kozlan taguah pl’iitan da riivinlawvan kohtah , otat pivon i napr’it kiveh riehkie .
Kuin ei kaikki čyl’kyt l’äht’iet’ä , n’in ožual’et kolotuškalla , a šid’ä har’juallat riivinlawdah .
Pivon’e jiäw puhtahan’e , n’i yht’ä čyl’kys’t’ä ei jiä .
Šežen pivon randah .
Toizen otat i žen riivit .
Da šen’iin kaikki .
Kiät t’ämä ruado riwhtow .
A konža towvon l’eikkuamin’e ew loppiettu , n’in yöl’öil’l’ä riivit , a päiväl’l’ä l’eikkuat .
Riivinlawdah mi kuiduo jiäw , n’in n’e ollah murdiezet .
Murdeiz’ista vain kuavetta .
Kozlan alda čyl’kyt pid’äw puija , šiid’ä viššata .
Viškattuoh n’e šieglotah verejäl’l’ä ieššä , kumbazen verejäh konža tuwlow .
Šieglohuoh vakkah , da šalkuh , da peldaittah .
Čyl’kyt puwn’ah lattiella l’ibo mos’t’inoih , a riivit’yöt pelvahat šivot kuboččuloih olgišid’eil’l’ä da lovalla , orašpeldoh da Progonah .
Lovalla pelvahat l’evit’ät hoikkazeh .
Pivoloista šid’iet panet eris’ , yht’eh murdeiz’inke .
N’e tože kuabiekši .
N’yt pelvaš lovalla , kačo , ei tuwlella noštais’ .
Lajolla pelvaš on n’ed’el’ie kolme al’i n’el’l’ä i viikomman , kuin kaštiet da vihmazet .
Šid’ä rubiet kaččomah , kuin kergiew .
Kuin päiväl’l’ä kuiva pelvaš jo rubiew katkiemah i kuidu eruow , n’in otat kuottelukšen .
Kuottelukšen kiwgualla kuivuat , lowkutat i kačot –ongo jo valmis’ pelvaš .
Kuin hyviin päis’är eruow i t’yö on pehmie , n’in pelvaš jo valmis’ noštua .
Vain kerdah ei šua ugod’ie , mon’i kerdua otat kuottelušta , varajat ei rikkuo .
Kun jo on ynnäh valmis’ , n’in l’ähet noštamah .
Hyvät šiät kuin ollah , n’in väl’iän noššat , da srazu i riiheh .
A kuin vihmoih popad’it , n’in muokkuaw .
L’iigua lovalla pid’iä ei voi , lahowduw , t’yö l’iew laho , kuabieh äijä mänöw , dai hinda pienembi , vähemmän annetah .
A ynnäh märgiä vet riihen et aha , hawduočow .
Lovalda noštelet n’uappuz’illa , kaikki n’uaputtelet i vuotat , konža puhaldaw .
Hot’ rubiemakši vihma väl’it’äl’d’äw , kuivahetah , n’in kaikin šidomah .
Kuboččuloilla šivot da riiheh , kuin on jowdavua riiht’ä .
A kun jowdavua riiht’ä ei ole , n’in n’ärt’ih panet .
Mon’iin riihil’öin harvah kel’l’ä on , n’in lowkutetah väl’iän , ei viikokši piz’äwvyt’ä n’ärt’ih .
N’ärt’is’s’ä vet ei voi viikkuo pid’iä , pelvaš rikkuočow , palavoiduw , lahonow .
Riihen kuin ahat , tuorehet pelvahat väl’l’embiäzeh , da kuivuat , n’in rubiet lowkuttamah .
Iel’l’ä kuin lowkkuloilla lowkuttima , n’in viikko pid’i lowkkuttua , šid’ä viel’ä l’ipšuta l’ipšuloilla , a n’yt mašinkalla väl’iän riihen lowkutetah , da kohti vid’iemeh – ei pie l’ipšuta .
N’yt joi l’ipšut on kadonnuot , ew n’i kel’l’ä l’ipšuo .
Dai lowkut kel’l’ä vain kuottelukšie lowkuttuas’s’a .
Mašinkalla lowkutetah n’el’l’än keššä , a viiješ – brihaččun’e ein’in t’yt’t’ön’e – kobraz’ie andelow .
Kahen lowkutetah , ručkista mašinkua pyörit’et’äh , a kahen šeizotah : yks’i pivoloida panow , a toin’e ottaw , kohennellah pivuo .
Viiz’inän’e luguh al’i puolen slojua , puolet pardizet lowkutetah n’ämä , šid’ä muwttuačetah .
N’ämä ruvetah lowkuttamah , a n’e pivuo panomah da ottamah .
Šen’iin kaiken riihen .
Puolen riiht’ä lowkutetah da l’äht’iet’äh šyömäh .
Lowkuttuas’s’a šyöt’etäh hyviin , kuin pruaz’n’iekkana , ruado on jygie .
Kuin zavod’itah lowkuttua riiht’ä , n’in naista tulow t’äwži guomino .
Sus’iedat naizet tullah vidomah .
Ennen i pagizet .
Iče pyrrit’äh vidomah .
A jäl’geh , min ken vido , n’in šie hänel’l’ä žen vivot .
Srazu lowkuttahuoh on parembi viduo , kebiemmäl’d’i päis’är l’äht’öw ,a kuin jäht’yw da tuoreššuldaw , n’in on jygie viduo .
Žen’t’äh tullah palavazeldi vidomah .
Lowkuttuas’s’a t’äwži guomino rahvašta , veššel’ä on ruadua , vain äijäl’d’i pöl’y l’iččuaw .
Vidohuoh t’yöt pert’ih , uglah panet , tukkuh .
Vuotat oštajua .
Mon’igo viiz’inäs’t’ä pid’äw – val’l’ičet har’jattavakši ,har’jattavakši parembaz’ie val’l’ičet , ol’iis’ pit’embi da pehmiembi .
Har’juamah jowvuštuačet jo Pokrovoin (14.X ) jäl’geh .
Har’juat kyl’yššä .
Kuin äijä har’juajua tulow , n’in ew mil’l’ä i hengit’t’iä .
Päiväl’l’ä pagizet – kenen kyl’yššä rubiet har’juamah .
Kyl’yn l’ämmit’ät , što ei ois’ häd’žvä .
Varuššat skammit , t’eppozen .
Illas’t’ahuoh otat har’jan da t’yöd’ä dai l’ähet kyl’yh har’juamah .
Sruas’t’i on kyl’yššä istuo .
Kuin viel’ä en’ämbi har’juajua on , n’in parembi , a kuin vain kahen-kolmen keššä , n’in sruas’t’i .
Da kuin viel’ä paginat tullah pahat al’i kuolluz’ih n’äh , n’in jogo krabahukšutta kipšahtelet .
Viel’ä i brihat šen’e pöl’l’ät’el’l’äh .
Kuin mieštä viiz’i-kuwži on , t’äwži kyl’y , n’in parembi , vain äijäl’d’i pöl’y on .
Har’jat n’e on kaiken muozet .
Ed’izeh rawdahar’jah laššet , harvembuah , šid’ä tuagiembuah rawdahar’jah , a žen jäl’geh šuvašhar’jalla har’juat .
– Ka , mit’t’yn’äzet har’jat ?
Har’jat ollah kaikilla yhen muozet , vain kel’l’ä vanhembi , kel’l’ä uwvembi .
On kel’l’ä tuagiembi al’i harvemban’e .
Mie en t’iijä , kuin luajitah rawdahar’joida .
Kolot’itah nuaglat – dai har’ja .
On hoikkan’e lawdan’e , kumbazella issut , kuin kuožal’issa .
Toizeh n’okkah on kolot’ittu yl’äh šorkan’e , madalan’e , a ših kolot’ittu toin’e lawdan’e .
Ew šuwr’i .
L’äbi on rawdazet nuaglat kolot’ittu , hyö l’äbi lawdazešta viijit’äh puolen šormen korgehuoldi .
Tuagehut’en hyö ollah toin’e toizešta – šormi kebukkazeldi mahtuw .
Ženže muon’e i tuagie harja on , vain on pienembi lawdan’e , kumbazešša ollah nuaglat , dai nuaglat ollah pärenuaglat , ollah tuagiemma , šormi ei mahu .
A šuvašhar’ja on šijan šugahista luajittu .
N’äin , kuin luajitah , dai iče kohennan , kun rikkuočow : varži katkiew al’i halgiew .
Ruvalla pid’äw valua .
Hiän on ynnäh ruvalla valettu , vain šugahan n’okkazet l’evieššä puolešša ollah valamatta , pist’yöl’l’eh .
Šuvašhar’jalla har’jatešša pivo on važamešša kiäššä , a har’ja oigiešša .
Pivuo piet n’okašta yl’ähänä , a har’jalla har’juat yl’ähäd’ä alah päin .
Šid’ä pivon n’okan muwtat .
Har’jattuoh pivošta jiäw vain hoikkan’e , šel’gie , n’i yhtä päis’t’äryt’t’ä ei ole , kuidu kuiduzeh .
Kymmenen pivos’t’a , šuvašhar’japivuo , kiär’it kiärökši .
Že paraš vuate šuvašhar’jašta .
Har’jatešša ew kuavetta .
Kuabiet ollah viduos’s’a , mi vid’iemen alla jiäw , da murdeiz’ista puistelet .
A har’jatešša jo on paičeš , ruohin , šiänruohin , mi šuvašhar’jah tartun .
Paičekšet , ruohtimet i šiänruohtimet kyl’yššä , har’jatešša , kiär’it kuožel’ipiäl’öiks’i .
Kuin konža kun keräwvyt’äh har’juamah koiremmat naizet da t’yt’öt , kerät’äh kaikilda kuožel’ipiäl’öin , t’yönnet’äh kenen n’i olgah Trohkoh n’iinke kuožel’ipiäl’öinke .
Trohkošša ol’i boraškinpaistaja .
Hiän mittuaw kuožel’ipiät , min makšetah – n’iih andaw boraškie .
Tuow kyl’yh boraškit – piru pirunah meil’ä šiel’ä .
Huomnekšella tulet kod’ih , n’in i šywvä ei tahota .
A mužikat ei t’iet’ä , heil’ä et šano .
Yöl’l’ä kuožel’ipiät viet , yöl’l’ä boraškit tuot da yöl’l’äi šyöt .
Šal’ittih toko naizet da t’yt’öt .
En’ämmän t’yt’öt , t’yt’t’öl’öin viidumkat oldih .
Konža jäl’geh i šyöt boraškie !
Ammun’e on že aiga , n’yt ew n’iin .
Ei har’juandah loppieče pelvahanke ruado .
Kaikki kuožel’ipiät i kiäröt pid’äw kezrät’ä , kuduo , äššen l’iew vuate .
Vuattieh šuat viel’ä äijän aigua da huolda panet .
Vuatetta pid’äw äijä , ložiembua i hienombua pid’äw .
Ruoht’imista kezriät ložiembua langua .
N’iis’t’ä kuvot hur’št’ie , värčie , hattarua , piäl’yštävuatetta .
Hienombazešta kuad’ievuatetta kuvot , šobua , ainošpiet’t’äviä räččiniä , pos’t’el’n’ikkua .
Pos’t’el’n’ikat da ainošpiet’t’ävät vuattiet kuvot rawdahar’jalla har’jatuošta .
Še on parembi ruohinda da paičešta .
A suamoin hienon vuattien kuvot šuvašhar’jalla har’jatuošta t’yöštä , kiäröl’öis’t’ä .
N’yt n’i hevon peržet’t’ä ei maheta ruadua , pros’t’i hospod’i !
T’yt’öt kuin šäl’gievät , hypel’l’äh večeroih .
A iel’l’ä yl’či talven kezräimmä .
Šuwrehpyhäh šuat kezriät , a šid’ä pyhä tul’i – kangahie ažeta .
Ennen vet t’yt’t’ölapšella kymmen’d’ä vuotta ei t’äwd’yn , a jo kezriämäh issuttelet , opaššat .
Ed’izeh šen’iin kuvetta kezriäw , a šid’ä opaštuw dai loimekši rubiew .
Opaštumatta n’i ken ei zavod’i kerdah .
Lapšena zavod’it da vanhuoh šuat nagol’i kezriät .
Jo piä tudajaw , a kuožel’ilda et piäže .
N’äpit jämennyöt , n’in hienuo ei šua kezrät’ä , a ložiembua šor’iezeh laššet , n’in vain käz’i huiskaw .
O , naiz’illa on en’ämbi ruaduo da huolda !
Myöhemmä i laškiečet da aivomma i nowžet .
Mužikalla buitto jygiemmät ruavot , a maguaw en’ämmän .
A meil’ä n’i kežäl’l’ä , n’i talvella ew spokojua .
Da talvella viel’ä vähemmän maguat , kuin pereh de pien’et lapšet .
Perehenke ew konža muata .
Kolmannet kukot lawletah , pid’äw jo kiwgua l’ämmit’t’iä .
Varuššat šywvä , žiivatat ruwvitat , juotat , pert’in rabieššat , kodvazekši istuočet kuožal’illa , joi murgina kergiew .
Murginoiduoh tuaš kodvazen kezriät , jo , kačot , pid’äw i ildat’yöt luad’ie .
Illas’t’ahuoh tuaš istuočet kuožel’illa da kukkoloih šuat issut .
Vähäzen n’ukahat , tuaš joi pid’äw nowšša .
Langat kezriät , viwhit , viwhet l’ivotat .
L’ivošša piet mon’i päiviä , sul’čavez’i l’äks’iis’ .
Šid’ä n’e viwhet pežet , kuivuat , šorit .
Šor’ihuoh ker’it ker’inakalda tuwr’ikoilla .
Kumbazeh kangahah pid’äw kruas’ittuo , n’in painat .
Ka painat kruaskah .
Kävel’d’ih kruaskan’iekat .
Hyvä kruaska popad’iw , n’in viwhel’l’а panet yhen pakiettazen .
Konža ewllun kruaskua , n’in kruas’ima i käbyl’l’ä .
Kruas’itah , al’i painetah käbyh , l’epänkettuh , koivunkettuh .
Käbyh kuin viel’ä rawdua panet , n’in l’iew tua mušta kruaska , t’ykemušta .
Že i šarras’t’a hyviin kruas’iw .
Ni mil’l’ä et ota , ei viere .
Viwhet tuwr’ikoilla kuin ker’it , n’in rubiet luomah .
Luondastuavoih luot kangahan , a šid’ä rubiet kolodah kiär’imäh .
Kiär’it kuvondastuavoin kolodah .
Kiär’ies’s’ä pid’äw kaččuo dai kaččuo .
Ennen kiär’in’d’iä otat pirdah , panet laššat , kangahan ottelet ed’izeh šyr’jäštä ymbär’i , šid’ä alahada päit’ laššet stuavoin perekluad’inaz’ista ymbär’i i tuaš vejät šyr’jäštä alačči , šid’ä kolodah .
Yks’i käz’il’l’ä pid’äw kangašta , da hil’l’akkazeh laškow , a toin’e zavod’iw kiär’ie kolodalla .
Kolodalla pid’äw rowno kiär’ie , yhen kiin’d’ehyöh kaikkie myöt’ , ei l’ien’iis’ kuduos’s’a väl’l’ä randa l’ibo keški .
Konža kuin on pahoin kiär’it’t’y kolodalla , n’in kuduos’s’a randa väl’l’enöw , höbl’öt’t’äw .
Ših pid’äw l’iz’iäl’l’ä kuvetta .
Kudien laššet vain keškišolgeh šuat al’i vähemmän , vain randazeh , i tuaš myöššytät .
N’iin rownennat .
Kolodah panet langoin alla puikkoz’ie , mis’s’ä kangaš on väl’l’embi .
Puikkoz’illa kiin’it’ät , n’iil’l’ä ved’äw .
Kuin kolodan kiär’it loppuh šuat , n’in pirran otat , a laššat jät’ät .
Laššat ših i jiähäh .
Ed’izeh otat n’iid’eh , kaikkih , mon’igo on , monellago rubiet kudomah , šid’ä tuaš pirdah : kahekšikkoh , kymmen’ikköh al’i kakšitoistakymmen’ikköh , mid’ä rubiet kudomah .
Kiär’ies’s’ä on toin’e pirda , pahembi .
Šyr’jäh kuin tartutat , n’in voit jo zavod’ie kuduo .
Kudiekši on langat tože tuwr’ikoilla ker’it’t’y .
Tuwr’ikalda kiämit’ät kiämit .
Že kiäminkovašša kiämit’ät .
Kiämit ollah tuohizet , tuohešta luajittu l’ibo kel’l’ä i s’in’izeštä suaharobumuagašta .
Tuohizet ollah paremmat .
Vain aijalleh kehtua luad’ie .
Ših pid’äw kežäl’l’ä huol’i pid’iä , konža tuohi l’äht’öw .
Meil’ä viel’ä oldih buaboloin aigahizet kiämit .
Mi heil’ä tulow !
Vain kiämit’t’iäs’s’ä pid’äw kiämit’t’iä kiär’innäl’l’ä vaštah , štobi kuduos’s’a kiär’in’d’ä ol’iis’ myöd’äh , šilloin kuduos’s’a kiämin n’okat ei riibiečet’ä .Kuin tolkowvoi muamo , n’in pikkuzešta šuat šiwla kaikki n’ewvow , kaikkeh opaštaw .
Kuvotah kaiken muos’t’a vuatetta .
Kahella n’iijel’l’ä kuvot hattaravuatetta , piäl’yššäkši varoin , šobua , kuad’ieda , räččiniä .
Koštovuatetta kuvotah n’el’l’äl’l’ä n’iijel’l’ä : värčie , pos’t’el’n’ikkua .
Hienuo vuatetta n’el’l’äl’l’ä n’iijel’l’ä kuvotah käz’ipaikakši .
Kuvotah i kahekšalla n’iijel’l’ä käz’ipaikkua , skuat’er’ie , ken kuin mahtaw .
Kahekšalla da en’ämmäl’l’ä n’iijel’l’ä ei kaikilla šua kuduo .
Kodan’iekkua kuduos’s’a pid’äw t’iet’ä , kuin šukšiloida talluo .
Yht’eh rukah tallot – yhet kodazet , toizeh rukah – toizet .
Kodan’iekkua kuvotah šomua .
Skuat’er’iloida viel’ä i bumuagalla kuvotah .
Že pid’äw oštua .
Bumuaga vain kudiekši .
Kuin yl’či päivä istuo , n’in ložiembua vuatetta päiväššä šein’ä l’iz’änke voit kebiel’d’i kuduo , a hienuo ei šua .
Yl’en lowhkoi kudoja pid’äw – šein’ä hienuo vuatetta kuduo , kodan’iekkua .
Kezriän’d’ä , kangahin luonda da kuvonda – kaikki šuwr’ipyhä mänöw .
Srašnoih et jät’ä , pert’it peššä , powkuta , rabieštuačie , a šiel’ä joi keviä , peldoruavot tullah .
Vuattiet kuvot – n’e pid’äw vallata .
Valgiet šollet , painamatta , pid’äw tuaš l’ivottua .
L’ivošša piet , sul’čavez’i l’ähtöw , pid’äw zol’ie .
Zol’ihuoh huwhot , da lumella , kuin viel’ä on lunda .
A kuin lumella et kergie , n’in lovalla .
Päiväzel’l’ä da kašteilla hyviin valguaw .
Počki hein’aigoih šuat lovalla piet .
Illalla lapat , a huomnekšella tuaš l’evit’ät .
Šen’iin jogo päiviä kaiken keviän .
Vuattiet vallotah , pehmet’äh .
Värčivuatteida et valgua , a muwt kaikki valguat .
Vajua vuoži pid’äw ruadua , kun’i vuattiet ombelet .
A ommeldavakši žeže langa .
Vain kuin hienuo vuatetta ommella , n’in langa pid’äw kezrät’ä yl’en hieno .
Vet že pid’äw viel’ä kerrata .
Kerratuolla ommellah .
A ložiemban’e kerdua , n’in i n’ieglah et pujota , n’iegla pid’äw kuin aiza , rahvaš ruvetah nagramah .
Ommeldavakši langakši parahan pelvahan jät’ät , kezriät hienozeh , rownozeh , ei ol’iis’ bul’kuo .
Bul’kunke n’ieglah et pane .
– A muwda mid’ä ?
Kaikki šanoin .
Možot mid’äi unahiin , kun jo ammuin emmä kuvo .
N’yt vet kuvotah vain huršt’ie da hattarua , da piäl’yštiä , muw kaikki oššettu .
N’yt vet nuor’illa kod’ikuvottuloih on huigie šuor’iečie .
Pid’äw sat’ina , šulku .
A ennen šulkuo vain harvalla t’yt’öl’l’ä ol’i , da i že kaikekši igiä yks’i plat’ja .
Pelvašruavot
карельский: собственно карельское наречие
Толмачевский
Работы по льну
русский
[