Тексты
Вернуться к списку | редактировать | удалить | Создать новый | История изменений | Статистика | ? Помощь
Balakirev Nikolai. Kolhozan brigadirat
Balakirev Nikolai
Kolhozan brigadirat
карельский: собственно карельское наречие
Новописьменный тверской
Brigadira
kolhozašša , kukki lugija , on i tuatto i muamo kaikella brigadan rahvahalla .A brigadašša taluo vähiä ei kakšikymmendä , a ruadajua keräydyy ei vähembi nelläkymmendä , konža voinua eu , a voinan aigah , eu midä i paissa , – vähembi , nu mieštä kolmekymmendä , a lapšinke i enämbi .
Hiän äijie huomnekšella jalgeuttau , kaikilla ruavot päiväkši andau , mittuau i lugou äijän go šie kynnit , äijän go aštoičit , äijän go kylvit , moni go telegiä tuahta noššit , moni go vejit peldoh , äijän go gektarua niitošta niitit , kuivait heiniä . A moni go telegiä heiniä puun’ah panit , äijän go ruista da ozrua , da kagrua leikkait , äijän go sotkua deriit pelvašta , moni go telegiä pelvašta guomnoh vejit , moni go kuboččuo pelvašta kolotiit , äijän go telegiä kuboččuo niitokšella vejit , da šielä levitit , da tuaš noššit , da rejellä l’nozavodah vejit , libo omašša riiheššä trestan kuivait , loukutit , a vivoit , nin moni go kiluo viidi työdä .I nämä ruavot lietäh go i puolet kaikista kolhozan ruadoloista .
A vielä brigadiralla pidäy mahtua rahvahanke paissa : kummas’t’a voit paukahtua , a kummas’t’a vain palvolla otat .
Suamo jygiet brigadiran vuuvet oldih voina vuuvet , konža brigadirat liettih yhet naizet .Miän kolhozašša oli kolme brigadua .Stuanulla kakši : № 1 – brigadira Jel’a , № 2 – Iro , da Udvuornašša brigada № 3 i šielä naine – Katti .Ka i vojuidih naizet .Šanomma , aivoin huomnekšella työndelöy Iro ruavolla : mänöy Vas’s’on ikkunalla , mögähtäy : "Vas’s’o-o "!
Ei niken ikkunah viiji .Iro mänöy pertih .Vas’s’o kiuguan luona čugunoinke telmäy .Iro Vas’s’olla :
– Missä šiun Kol’a ?Maguau min go ?Hebozih pidäy työndiä .
- Vašta hyppeli tanhuoh kužella . Ei go kunne peittyn ?
Iro šydi kiän kravatin alla , kädeh popadi Kol’an korva .Vedäy korvašta Kol’ua , kumbazella väliän jo kolmetoista vuotta liey .Kol’a ravajau :
– Kivistäy !– i viidiy kravatin alda .
Iro hänellä :
– Varane , tämpiänä äijä heiniä liey vediä : šiä hyvä .Mäne , vara , aja hebozet viigonašta kyläh .
Kol’a bul’l’alleh , nyyčkäy :
– Ka šyöllän da i lähen .
– Kuin muamo š kuivuau heinät , šie val’l’aššat Juškan i heinät vejät Pimenovan puun’ah , roija telegiä puun’ašša šiula rubieu auttamah Ol’o -čikko . A šie , – kiändy Iro Vas’s’oh päin , – ota oma š Nasti i kuin kašša proidiu , mängiä Joventavuššalla niitošta kuivuamah .
– Hyvä , – hingalon luona otvietti Vas’s’o .
Šinä že piänä Kol’a , kuni kakši virstua ajo Joventavuššalda kyläh šua heinä rejen piällä , složi virryön (täh dielah hiän oli mastakka ):
Iro -čikko brigadira
Ikkunalla kagahuu :
Vas’s’on Kol’a , mäne ruavolla ,
Ei nin kučun GPU :n .
A pyhänpiänä illalla Opros’an Kost’a brimbetti balalaikalla i laulo Kol’an častuškua .
Konža brigadira ildapuoleh kaikki omat ruavot pellošša da kyläššä spruaviu i tulou kodih , hänellä pidäy vielä vedomostih kirjuttua ken hänen brigadašša äijän go i midä ruado , a vielä jogo nedelie ruavot trudovoiloih knižkoih pidi kirjuttua i kellä äijän go trudodn’ua viidi .
Brigadiroilla kirjuttuas’s’a aigah i häkky piädyy : karielakši tiijät kuin ruado šanuočou , a hormakši ...hiiz’ händä tiedäy .Toko ei jaloh hyvin kirjutettih brigadirat mužikat .
Loppu voinalla kylih rigenemmä ruvettih tulomah mužikat -invalidat .Myttyöllä ruavolla invalidan šeizatat ?Jesli eu jalgua – sčotovodakši ali kladovščikakši , a jesli hyvät jallat , a yhtä kättä eu – brigadirakši .
Ka verkazeldi i ruvettih mužikat muuttamah brigadiroida -naizie .Treteissä brigadašša Katti -čikon muutti Miša -velli .Jo i voina loppieči , a Miša -velli , kumbazella važamie kättä , voit šanuo , eulun , vielä znai brigadiruičči .Udvuornašša yhteh puun’ah luajittih stankan – pärettä kiskuo katokših varoin .
Voina loppieči , nin kylissä šuuri stroika mäni .Nu ka .Työndi Miša -velli kakši mužikkua kiskomah pärettä stankalla .Ne kissottih šylen pärettä .
A kuin hiän ruado hormakši vedomostih kirjuttua ?Дранка дранки на дранкостанке – niin go ?Niin vet’ sčotovodilla nagruo liey täyvet kuadiet ?A-a !Kirjutan puolekkah !– rohkuači Miša -velli i kirjutti : Киска дранки на пярестанке . Vedomostit vei pravlen’jah .Tois’piänä jo kaikki kylä iluoči brigadiran kirjutandua .
Vähiä ei tämän že muone häkky oli toizenke brigadiranke – Fed’anke ,šillä tože yksi käzi oli kavotettu frontalla .Fed’a oli äijä nuorembi Miša -vellie i enämmän kluassua školašša proidi , čem Miša -velli .Kuin ollou keviäpuoleh kolhozan preda šanou Fed’alla :
– F’odor Vasil’vič , rajona käšköy ei vain tuahta peldoloilla vediä , a vielä i tuhkua pirottua , štobi urožai nouzis’ .
– A munašta go mie otan tuhkua ? – Fed’a predalla vaštah .
– Ka tädä mie en tiijä , mistä šie tuhkua löyvät , vain tiijän , midä načal’stva käšköy , šidä pidäy luadie .
Fed’a vielä muatilla kiäräldi i läksi "приказ выполнять ".Pihalla pyydi Van’an :
– Ota värči i mäne taloloida myöt’ tuhkua keriämäh .Tuhkat puissat guomnoh lattiella .
Van’a :
– Mih varoin ne tuhkat ?
– Urožaida noštamah rubiemma , – šano šiändyn brigadira i läksi hakkuamah šinne , kunne hänellä pidi .
Tois’piänä murginan jälgeh Van’a tyhjänke värčinke tuli Fed’ah kodih .Fed’a hänellä :
– Nu ...keräit ?
– En , niken ei andan . Yhet šanotah : "Eu , kaikki poroh mändih ", toizet : "Omalla juablokka mualla pirottima ".
– Hyvä , mäne kodih .
Van’a ei kiirähä uidie :
– A ruadamua , midä miula liey , trudodn’an panet go ?
Brigadira hänellä :
– Mytyš šiun ruado ?Kyliä myöt’ gul’aičit beztolku .
– Gul’aičin , en gul’ainun , a aiga mäni , oizin hot’ toista ruaduo ruadan .
– Ladno , mäne , panen šiula četvertin trudodn’ua .
– Vähä , da min šiunke ruat . – Van’a uidi .
Van’a uidi , a Fed’alla nikuin piäh ei tule , kuin vedomostih Van’an ruado kirjuttua .Pyöritäh šanat piälakašša , a kuin hiät bumuagalla panna ei malta ."A -a ! Kirjutan näin "! I kirjutti : "Хождение по деревне с пустым мешком – ¼ трудодня ".
Kolhozan brigadirat
карельский: собственно карельское наречие
Новописьменный тверской
–
–
–
–
–
–
–
–
–
–
Балакирев Николай Михайлович
Колхозные бригадиры
русский
-
-
-
-
-
-
-
-
-