Тексты
Вернуться к списку | редактировать | удалить | Создать новый | История изменений | Статистика | ? Помощь
Никитина Ирина. Talvituisku
Никитина Ирина
Talvituisku
карельский: собственно карельское наречие
Новописьменный севернокарельский
Loittosešša pohjoismuašša , missä
halličči vain Talvituisku , kaikki oli valkiešša lumešša .Kylmän muan emäntä lenti omien tonttien piällä ta näytti šiltä , jotta mikänä ei voinun huoleššuttua häntä .
Toičči hänen onnistu tuuvva mistä lienöy omissa kämmenissä pienen kypenen , kumpasen hiän heti peitti mih lienöy omih lumeššettuih lepotiloih .Ne kypenet loissettih kaččomatta pakkaseh ta kylmäh , a Talvituisku šiänty , šentäh kun oli vaikie löytyä niitä ta vielä vaikiempi ymmärtyä , miksi ne ei šammuttu lumen ta jiän kešen .
A pienet kypenet keräyvyttih havupuun vihreillä nieklasilla .Puu kašvo min lienöy ihmehen kautti viluo vaštah .
Konša tuuli hilleni ta alko pakkani aurinkoini päivä , pienet kypenet kirkkahašti välähettih ta vilkutettih kertuon toini toisella omie kummallisie juttuja .
Kerran Talvituisku niise kuuli niitä .Hiän peittäyty taikapuun lähellä ta piätti kuunnella , mistä paistih hänen vankit .
Tuli šelväkši , jotta pienet kypenet oltih toteutumattomina lapšien huavehina .
Yksi kyven šano potruškoilla :
– Miut mänetti pieni tyttö .Hiän huaveili , jotta hiän ois opaštun šoittamah viululla ta hyvin pärjäis šiinä .Ka tauvin jälkeh tytöllä oli vaikie pitälti šeisuo , jotta opaštuo šoittamah ielläh .Poloni lapšukkaini , hiän niin ikävöiččöy ilman musiikkie .
Toini kyven niise muisti omua potruškua , kumpasella šyntymäpäiväkši lahjotettih ihana pieni veššoš – hieno kaunis balettitanššija .Ka ken lienöy vierahista hairivošša rikko hänen lahjan jo enšimmäisenä päivänä .Tyttö iče huaveili , jotta häneštä ois tullun balettitanššija , ka rikotun veššokšen takie hiän niin tuškautu , jotta halu tanššie hävisi .
Talvituisku kuuli vielä yhen kertomukšen .Poika unekši , jotta hiän ois piäššyn mielehisen joukon jiäkiekkopelih .Vanhemmat luvattih hänellä lippu hyväštä opaššukšešta .Prihačču pitälti šeiso jonošša , ošti kallehen lipun ta ilosena juoksi kotih , ka tuulen puuška vejälti häneltä lipun ta poika ei onnistun löytyä šitä .
Talvituisku alko henkähellä ta voivottua :
– Näyttäy šiltä , jotta ne ei olla miun korissukšie , a lapšien pienie kyynälie , kumpaset muututtih šurullisiksi kypeniksi .
Yhtäkkie hänellä himotti nähä niijen lapšien muhie .
Tuisku rupesi pyörimäh eččien tarvittavie lapšie , kuni hänen kačahuš ei šeisattun šurulliseh tyttöh .Niin , še oli juuri še lapšukkaini , kumpani ei jakšan šoittua viululla .Talvihaltiettarella oli tosi helppo lahjottua tytöllä toisen šoittimen .Še ei ollun niin vaikie kuin viulu , ka tyttö šai helpošti opaštuo šoittamah šillä .
Vain nähtyö lapšen onnelliset šilmät Talvituisku lenti ielläh .
Hiän aulisti anto lahjoja lapšilla – šiinä oli ihana puku ta tuflit pienellä balettitanššijalla , luistimet ta čoho jiäkiekkuo tykännyöllä pojalla .
Kylmä tuisku pitälti arvuali , kenen toivomukšie hiän toi kultasissa kypenissä kuni muisti kaikki lapšukkaiset heijän huvittavine toivomukšineh .
Talvihaltietar tiesi , jotta hänen piti kiirehtie , vet hänellä oli vain yksi uuvvenvuuvven yö , jotta toteuttua lapšien toivomukšie .A kaikki , mitä hiän ei kerkie ruatua , pitäy šiirtyä enši vuoteh .
Kun toivomukšet toteuvuttih , kultaset kypenet pohjoisvaltakunnan taikapuušša šammuttih .Ka ne ei hävitty kokonah , a muututtih kaunehiksi valkeiksi lumitähiksi , kumpaset ilosešti loissettih vihrien havun kešen ta toteutumattomien toivomukšien šurulliset kypenet tultih luonnon oikiekši talvikorissukšekši .
Kiänti Irina Zaitseva
Talvituisku
карельский: собственно карельское наречие
Новописьменный севернокарельский
–
–