Тексты
Вернуться к списку | редактировать | удалить | Создать новый | История изменений | Статистика | ? Помощь
Usko
Usko
карельский: ливвиковское наречие
Новописьменный ливвиковский
1 Uskon
vuoh roih tovekse se hyvä , kudamah nad՚eijahes , uskon vuoh nähtäh se , midä ei sua nähtä .
2 Jumal oli mieldynyh ammui elänyzih tuattoloih heijän uskon täh .
3 Uskon vuoh myö ellendämmö , gu muailmat on luajittu Jumalan sanal , i se , mi on nägevis , on roinnuh nägymättömäs .
4 Uskon vuoh Aavelin tuodu žertvu oli Jumalale kallehembi gu Kainan tuodu . Sendäh gu Aaveli uskoi , Jumal ozutti händy oigiekse , gu otti hänen lahjat ; uskon kauti Aaveli pagizou vie kuoltuugi .
5 Uskon vuoh Hanokkua otettih mualpäi surman nägemättäh . Händy ei löytty , Jumal otti händy .Häi , näit , jo enne otandua oli elänyh Jumalan mieldy myö – nenga häneh näh sanotah Pyhis Kirjutuksis .
6 A uskottah ei sua olla Jumalale mieldy myö . Sil , kudai tulou Jumalan edeh , pidäy uskuo : Jumal on olemas , i Häi maksau hyväl niilöile , ket Händy ečitäh .
7 Uskon vuoh Noi heityi Jumalan tahtoh , konzu häi sai viestin moizes , midä vie ei olluh nägevis . Häi luadii umbilautan , i muga piäzi surmas kai hänen pereh . Hänen usko azui muailmale suvvon da andoi hänele ičelleh sen , min suajah uskojat – häi piäzi oigiekse Jumalan ies .
8 Usko käski Avraamale kuulta Jumalan kučundu da lähtie sih muah , kudaman Jumal uskaldi andua hänele . Häi lähti matkah , tiedämättäh kunne menöy .
9 Sendäh gu häi uskoi , häi tulolazennu azetui elämäh uskaldettuh muah da eli sie stuanulois . Muga elettih Isakku da Juakoigi , kudamat sežo suadih se uskalmo . 10 Avraam vuotti linnua , kudamal on luja alustu da kudaman Jumal iče duumaičči dai luadii .
11 Hänen akku Sarra sežo uskon väin vuoh sai lapsen , hos oli lapsensuamatoi dai lapsensuanduigägi oli jo jällel , no häi pidi uskottavannu sen sanua , kudai uskaldi .
12 Sikse yhtes , miehen väin kaimannuos , rodih muga äijy rahvastu , mi on tiähtie taivahal i mi lugemattoman äijy on čuuruu meren rannal .
13 Hyö kaikin kuoltih uskonke sih , midä oli heile uskaldettu , hos hyö ei suadu sidä . Hyö vai loittonsah nähtih se , oldih hyväs mieles da sanottih iččie vierahikse da tulolazikse mual . 14 Ket nenga sanotah , hyö sil ozutetah , gu ečitäh omua muadu .
15 Gu heijän mielis ollus mua , kudamaspäi hyö tuldih , hyö voidanus mennä sinne järilleh . 16 No hyö ečitäh parembua kohtua , taivahallistu , sendäh Jumal ei huijustai heidy , a andau sanuo iččie heijän Jumalakse . Häi jo linnangi heile varusti .
17 Uskon vuoh Avraam , konzu Jumal opii hänen mielii , toi žertvakse Isakan . Avraam oli valmis andamah aino poijan žertvakse , häi , kudai oli suannuh uskalmot 18 da kudamale oli sanottu : "Isakas jatkuu sinun rodulangu ".
19 Häi smietii , Jumal voibi nostattua kuollieloisgi , i muga häi sai järilleh oman poijan . Se buitegu nouzi kuollielois .
20 Uskon vuoh , mieles pidäjen tuliedu aigua , Isakku blahoslovii omii poigii Juakoidu da Isuavua .
21 Uskon vuoh Juakoi kuoltes blahoslovii Josifan mollembii poigii da moliihes savakon piäh kumarduhuu .
22 Uskon vuoh Josif kuolendua vaste otti paginoih sen , gu Izrail՚an rahvas lähtöy iäre Jegiptaspäi , da n՚evvoi , midä jälles ruadua hänen luuloinke .
23 Usko käski Moisein vahnembile kolme kuudu peitellä poigua , gu hyö nähtih , mittuine kumman čoma on lapsi , eigo varattu faraonan käskyy .
24 Moisei uskoi , i sendäh suurekse kazvahuu ei tahtonuh olla faraonan tyttären poijannu . 25 Häi parembi valličči gor՚at yhtes Jumalan rahvahanke , migu riähkän vuoh suavut lyhytaigazet ilot . 26 Häi pidi Hristosan täh tirpettyy huigiedu kallehembannu migu kai Jegiptan bohattuot , gu nägi ies tulijan palkan .
27 Uskon täh häi lähti Jegiptaspäi eigo varannuh suarin vihua . Häi buitegu nägi Nägymättömän i sendäh oli lujannu .
28 Uskon täh Moisei enne lähtendiä käski Izrail՚an rahvahale pidiä Äijiäpäiviä da voijella uksenpielizet verel , gu anheli , kudai tuli tappamah jegiptalazien enzipoigii , ei koskis izrail՚alazien lapsii .
29 Uskon väil izrail՚alazet astuttih Ruskiesmeres poikki gu kuivua muadu myöte , no ku jegiptalazet opittih ruadua muga , hyö kaikin upottih .
30 Uskon väil kuavuttih Jerihonan linnan kiviseinät , konzu niilöis ymbäri oli astuttu seiččemenny päivänny .
31 Uskon vuoh karguaju naine , Ruavu , hyvin vastai tiijustelijoi , i sendäh ei kuolluh yhtes sanankuulemattomienke .
32 Midä täh vie ližiäzin ? Minul ei täydys aigua sanella Gideonas , Varakas , Samsonas da Ijeffas , Davidas , Samuilas da toizis Jumalan iänenkandajis , 33 kudamat uskon väil voitettih valdukundii , piettih oigevuttu väis da suadih uskaldettu .Hyö salvattih leijonoin kijat , 34 sammutettih tulen vägi da vältyttih miekan teräs .Hyö oldih väittömät , no roittih vägevikse , oldih lujat toras , hyö ajettih iäre vihaniekoin torajoukot , 35 naizet suadih omii kuolluzii elävinny järilleh .A erähii muokattih kuolendah suate , hyö ei otettu heile tarittuu vällälepiäzendiä , gu piästä parembah kuollieloisnouzendah .36 Toizet suadih kiruondat dai rozgat , da vie čiepit da tyrmät . 37 Heidy kivitettih kuolendah suate , pilattih kahtekse , tapettih miekal . Hyö käveltih lambahan da kozan nahkois , tirpettih hädiä , heidy ahtistettih da muokattih .38 Hyö oldih liijan hyvät tälle muailmale , sikse heil pidi kävellä mägilöis da elämättömäs muas , eliä kallivokololois da muahavvois .
39 Kaikkih nämih ristikanzoih näh on sanottu hyviä heijän uskon täh , no sidä , mi oli uskaldettu , hyö ei suadu , 40 gu Jumal oli kaččonuh meih niškoi parembua . Sendäh hyö vai yhtes meijänke piästäh sinne , kus täyttyy kai .
Usko
карельский: ливвиковское наречие
Новописьменный ливвиковский