Тексты
Вернуться к списку | редактировать | удалить | Создать новый | История изменений | Статистика | ? Помощь
Kut minä kalatan
Kut minä kalatan
вепсский
Средневепсский западный
Kevädou
minä zavodin’ kalatada aigoiš .
Tol’ko jä tühduškandeb , minä panen merežad .Merežat panen karoid’me , kus kezou kazvab hiin’ libo mustad rogod .
Ez’mäi panen süvembale – ocverkoile , pešn’ou tegen riiguižed , märičen kaluižou süvüsen , zavodin’ pešn’ita ocverkole riigun sit’ tahospai , kus jä om kül’mnü pohjhassai .
Pešn’oiččen laidalepai ocverkon piččen riigun .
Panen ocverkon i laidpolhe panen merežan .Kala ujeleb jän mödhe , randha iivoi ujuda , jä kül’mnü pohjhassai , vasttab ocverkon , eciškandeb hodan i ocverkodme mäneb mer’ežaha .
Kons sulaškandeb rand , randembaižhe polhe panen merežan .
Lämmäs houg’ mäneškandeb randha hiiništoho i putub randembaižhe merežaha .
Öl enamban putub laidembaižhe merežaha , a päipaštoil’ päivil’ enamban randembaižhe merežaha .
Sügüzou hiiništoho penzhile kes’khe kaivan kanavaižed .
Kevädou , konz kudoškandeb houg’ , nenihe kanavaižihe panen merežad .
Lämmil’ päivil’ i üil’ kudon aigan nenihe merežoihe putub diki äi hougid’ .
Jäl’ghe hougid’ kudob ahne .
Ahnen sas’kenden merdoil’ .
Kudob ahne süvil’ nemil’ libo lodoniškoil’ .
Ümbri merdas panen kavaged .
Necikš aigaks avaidase jo jarv .
Krome merdoit pidän laskeverkod .Laskeverkoihe puttas hougid’ , ahnid' i särgid’ .
Kevädou verkod pidän randoil’ .
Krome necidä , tol’ko sulab ja järves , pidän ragoiš kuukud .
Kuukuihe otab houg’ i made .
Hougile siman pästle en pohjhassai , a madehile kuukud pästan pohjha .
Ühtnägoi počti ahnenke zavodib kudoda sär’g’ .
Sär’g’ kudop suril’ kogoil’ .
L’uuta särgin’ kudon voib tünöu ehtou – kudon sijou sär’g’ vändab .
Merdad särgile pidän kes’k’vet .
Merdoihe ühtes sär’gideke puttas hougid’ i madehid .
Ez’mäi kudob järed sär’g’ .
Järedan sär’g’in’ saskenden harvoihe verkoihe .Jesli putud čomale kudole , harvoihe verkoihe sär’g’id’ putub vouktaks .
Končišoi kudod , minä panen prodol’nikan .
Kuni vilu vezi , prodol’nikan pidän madalou sijou .
Kuukuižet prodol’nikha panen harvas , viš vaksad toine toižespai .
Kuukuihe panen eläbäd sär’gižed .
Särgižed saskenden paksuu verkou kalegou .
Verkospai sär’gižed panen vädrha vedenke .
Prodol’nikan kaclen kaks’ kerdad päiväs – ehtou i homencou , i kaikuččou kerdou smenin’ veresed särgižed .
Prodol’nikha ottas madehed , hougid’ i ahned .
Prodol’nik otab ii äjäd aigad .
Ühtnägoi minä kalatan splavnikoil’ , kuukuižil’ i verkoil’ .
Homencou nuuzen aigoiš , edou päivänuuzmad časud kaht .
Kerdale kalatades otan paksun verkon , splavnijoid’ kuukuižid’ i uštken .
Ez’mäižikš minä san sär’gižid štukad viškime libo kus’kime , panen hiid’ vädrha vedenke .
Sid’ pästan splavnijad kuukuižed tul’l’ašt’me .
Kaikuččehe kuukuižehe panen eläbän sär’gižen .
Sid’ pästan uštken i ajan prodol’nikad kacmaha .
Poputi ajades san hougin’ , erašti kaks’ .
Kacun prodol’n’'ikan , smenin’ sär’gižed .
Prodol’nikha putub konz viž , konz enamban hougid’ .
Sid’ ajan kuukuižidennost .
Necil’ aigou kuukuižehe jo putuiba hougid’ , a kudamoho ii puttund , koliba sär’gižed .
Minä möst kaikihe kuukuihe panen uded sär’gid’ .
Varasta sikš , kuni kokaidab .Minä ajelen uštkou kuukuil’ kes’kes .
Kudamoho kuukuižehe kokaidab , minä nägen i otan maiman i panen möst veresen sär’gižen .
Muga homencos prodol’nikha , kuukuižehe i uštkehe san štukad vištoškime–kaks’kime hougid’ .
Päiväu hengähtan , a ehtkoužou časud nel’l’ möst ajan .
Prodol’nik ladiše muga : jes’li madalale , ez’mäi kevädou püštase pit’k rag – metrad siičeme .
Neche ragaižehe sidon noraižen i pästan necidä norašt’ metrad sada viškime .
Toižhe agjha püštan möst ragan i sidon toižen agjan prodol’nikad , mišto prodol’nik ii uptaiž pohjha .Päliči kaikuččes viškimes metras panen pullon .
Pullon panen noraižele metrad kaks’ .
Kaik prodol’niknor vedou pälpäi uptab kaks’ metrad .
Neche prodol’nikha sidon päliči vides metras simaižed .
Simaižed pidusel nel’l’ metrad .
Kaikuččehe simaižehe sidon hangoižen , polen simad kogodan hangoižele .
Kaikuččehe simaižen agjha sidon kuukuižen sär’giženke .
Kaikuččes kuukuižes lapoštez , i poles simas lapoštan .Tarbiž muga lat’t’a , mišto sär’gižen kuukuine oleiž pol’ metrad pohjaspai .
Kons kokaidab houg’ , simaine lapoštesespai päzub , i houg’ ii muja , čto putui .
Sär’gižen kuukuiženke laindab kiškha .
Jes’li čomas sada , prodol’nik ehtou i homencou tarb’iž smen’dä enččed sär’gižed i panda eläbäd .
Kevädou om hüvä piduz .
Konz lämšuškandeb , ümbri ijuniš , prodol’nik tarbiž perevettä süväle , madalou hiitäb otandan .
Süväle prodol’nik panese kivesile .
Agjoihe ragan sijas norale pästase kivi i ülähäks noran agjha panese sur’ pu .
Kes’kmäižihe pulloihe noraine panese siloi metrad nel’l’ .
Süvou prodol’nikha otab vuu kun aigad .
Sured hougid’ voib sada vaiše laidou .
Jes’li voib pidäda eläbän sär’gižen kuukuižes , ottas čomas sured ahned .
Avgustas prodol’nikha hiitäb otandan .Sügüzou voib pidäda prodol’nikan sent’abrihesai , kuni ii kül’mä järv .
Toižen polen kud okt’abrid’ otab i čomas madeh .
Splavnii kuukuine tegese muga : kaluižehe pol’t metrad sidose sima metrad siičeme i kaluižennost simaha sidose hangoine lapoštesenke .
Nened kuukuižed odvad kuti piduz , a voib kalatada kaiken kezan , i putub hiihe paremba , mi prodol’nikha .
Pästasoi nened splavnijad kuukuižed aigoiš homencou tul’l’ašt’me .
Homences hii proit’t’as äjän sijad i l’uutas hougin’ l’ibo ahnen .
Hiid’ vöb tul’l’aštme , lainhil’ kačaib i kuukun sär’giženke kaiken kuboiteleb , sikš paremba otab nenihe kuukuižihe .
Kevädou tarbiž kalatada madalou , kuni vilu vezi , metrad kaht süvüst , no simaine kuukus tarbiž pästta metrad viž , mišto sär’gine voiš tehta tobjemban krugan .
Kevädou otab nenihe kuukuižihe hüvin’ ümbri päivänuuzmas i möhäi ehtkoižou .
Kezou simad tar’biš pideta i pästta laidale .
Paremb aig ühesas časuspai polhe päihassai , a ehtou – kuumes časuspai jäl’ghe pol’t päjad .
Kevädou voib jätta nene kuukuižed i öks .
Vöb hiid randha , kunapai tul’l’aine .
Homencou aigoiš tarbiž hiit’ kogota .
Otab čomas .Kahthe kuukuižehe obhodiše üks’ houg’ , pästit’ kaks’kime štukad , voib sada ühesakümn’e maimad .
Sügüzou nened kuukuižed tarbiž tac’keta madalale nälöid’ vast libo šläpile kes’khe , simad pästtase vaiše metrale .
Čoma piduz – harvad verkod , hiil’ voib kalatada järven avaidusespai kuni ii kül’mä järv .
Kaiked parembad verkod , kudamiš sil’män suruz om kuume – nel’l’ sormed i kudotud nitišpäi nomer sorok ili p’ades’at’ .
Kevädou hiid’ tarbiž pidäda madaloil’ venoil’ randoil’ , kudamil’ tahoil’ kezou kazvab šuug libo must rogo .
Kezou žaruaigou – mürkil’ randoil’ .
Suriš žaruiš kaikit’ paremb laskta laidale .
Laidale tarbiž laskta kuume – nel’l’ verkod ühthe agjha norale pullonke .
Sügüzuu – randoil’ , kus kazdas rogod , i laidale , kus süvüz’ ii enamb nel’l’äd metrad .
Uštkehe järvou otab paremba kevädou , lopuu majuu i ez’mäižou polou ijünid’ kud .
Kevädou tarbiž , mišto ušte käveleiž süvüsel metrad kaks’ .
Kaikid’ paremba siloi otab lodaniškoil’ .
Kezou otab tol’ko süvän uštken , kudam käveleb süvüsou metrad nel’l’ .
Enambou otab ahne , a sikš tarbiž ajelta hil’l’ašti i ušte mäneiž pohjadme .
Otab paremba päivou .
Čomas otab i kaiken avgustan , no ajelta tarbiž laidadme i süvid’ lodoid’me – metrad nel’l’ süvüst .
Houg’ lubib enambau vouktan uštken , a ahne rusttas vaskespai .
Čomad oma uštked , kudamiš üks’ pol’ om vouged , a toine – rusked .
Ongitada kaikid’ paremb kevädou , kons proit’t’as kalan kudod i lämšup sä .
Ongitades čapasoi pitkäd , hoikad i nojedad ongiragad .
Siman kerttas mustoiš katušknitiš .
Pulloks paremb propg butuukaspai , jüguz panese ülembahko onged .
Jügust tariž panda severz’ , mišo uppotaiž polen pullod .
Ongen sima kevädou tariž pidäda ongiragan pitte .
Kaikit’ paremb ongitada nel’l’ou ongou kerdalaz .
Onghe panese šot – paremb vouged .
Kevädel ongele tariž ajada edou päiväšt’ .
Siižutadas järvou , kus kezou kazvaškandeb hiin’ libo rogod .
Onged tarbiž ez’mäi tac’t’a kaikihe polihe , mišo tedištada , kus om kala .Šot onges pidäda tarbiž kogonaine i eläb , vaiše södihe agjaižen libo koli , tarbiž panda uz’ .
Süvüsou ong’ pästase ahnele četvertit’ pohjaspai , särgile kaht četvertid’ .
Mi tobjemb šot onges , pigemba kokaidab sur’ maimaine .
Šot panda muga , mišo ongen bardaižennou oleiž pol’ šotud , lop šot okha vertiše , siloi maim voib tabata šotun vaiše bardaižennou i putub onghe .
Jes’li sil’ tahou kokt’as pened , sirte toižele tahole , kuni ed lüuda järedad kalad .
Čomas otab aigoiš homencou lodoil’ kes’k järved .
Enambou libuškandeb päiväine , siižutade süvemba .
Ala äjou ajele tahos tahole .Kaiken aigan kala ii ota , otab aigaižid’me , hii ajeltas parvehil’ , üks’ lähteb – varasta , pigai tuleb toine .
Šotuagjaižed ongespäi tac’kende tagemba venehespäi , kus oma onged , siloi kala ii lähteškande i panoškandese ümbri ongiš .
Venehes ištu hil’l’ašt’i , ala kolaida , mišo ii pöl’gästoitta kalad .
Sär’g čomas otab pehmdäle liibäle i vuu paremba nižuižele tahthale .
Liib i tahtas kerta pučuižile tukuižile i pane onghe .
Ahne čomas otab sär’gin’ supalaižele .
Supalaine čapase sär’gil’ sel’gäspäi .
A jes’li om sur’ ong’ kerdou , voib čapta händäižen i panda neche ong’he .
Äijou čomas otab ahne sär’gin’ piskule .Čomas otab ahne i ahnemaimale .
Ahnemaimaine tarbiž zaden’d’a onghe čut’ sel’gäižes , mišo hän ii koleiž i voiž ajelta .
Kezou on’gita nälöniškoil’ .
Aigoiš homencou erašti čomas otab šläpil’ kes’kes .
Jesli ongitad nel’l’ou ongou , kaks’ onged pidä šotunke , üks’ sär’gin’ supalaiženke , i ühtou ongou void’ ongitada liibale libo tahthale .
Kezou otab ehtkoižou , edou päilaskmad .
Avgustou ong’he kokib paremba kaikes vodes .
Homencou avgustou aja vuu pimedas , čut’ hämärduškandeb .
Edou päinuuzmad ongita lodou , madalou , metrad süvüst .
Nouzi päiväine , lähte süväle metrad nel’l’ libo viš süvüst , ongiš pidä järed šot , ongita nel’l’ou ongou i varasta .
Süvou harvas otab pen’ maim i harvoin manitab , kokiškandeb ii paksus , a sad enamban .
Lopuu avgustou kul i sentäbril’ ongita päivou , aja ongele jäl’ghe kes’kpäiväd , siižutade süväle kes’klaidad , kus süvüz’ om metrad viž .
Sija valiče nemen n’okun kohtas libo süvän lodon agjas .
Sügüzou simad ong’he tarbiž pidembad – metrad vit’ .
Kokiškandeb harvas , no maimad oma järedad .
Ongitades voib pidäda kuukun .
Kuukhu pane eläb sär’gine , zadeni händast sel’ghä .
Randas ongitad – kuuk tac’kende hiiništoho , a laidou pidä laptas ongišpai , paremb ičeiž taga , kus ištud .
Tul’l’ašt’ kala ii varaida , i järed kala harvoin’ otab tünil’ sijoil’ .
Voib ongitada i kevädou , martou i aprelil’ , konz järvou vuu om jä .
Edoupäi pešn’ou tegese jäha riiguižed , a paremb kaikid’ nene riiguižed tege järvenkaroiden kohtha , nil’ tahoil’ kokib sär’g’ .
Touvuu šotuid’ iisa l’uuta , ongita liibäle , čomas otab torakanoile .
Jes’li ofot ahnoid’ sada , siloi riiguižed jäha tege nemakoile kohtha .
Ongitada tarbiž siloi šotuile .
Otab ahne i liibäle , no harvoin’ .
Krome ongitest , kevädou i sügüzou voib kuukitada .
Mugažo kuukitada voib nel’l’ou ongeragou .
Simad kuukuihe tariž sanktembad – langašt’ kaks’tošt’kime , pullod sured , mišo ii voiž händast uppotada sär’gine .
Uppotest panda ii tarbiž .
Edou kuukitest verkou sa särgižit’ štukad kuumekime i pane vädrha vedenke .
Kevädou siižutade lodorüunale , pane kaikihe kuukuihe eläbäd sär'gižed , pästa vedehe kaikihe polihe veneht .
Kokaiž , uppot’ pullon – ala veda , varasta , kuni hän ii vedaškande laptaha .
Vedab polhepai , vaiše tabazihe sär’gižehe i pidäb sus .
Konz vedagoitab laptaha , siloi hän jo putui .
Ala lenda ongeragas , veda simas , houg’ löumäi оm leta ongeragou , pästad händast , simas vedad – sinun houg’ .
Sügüzou kuukitad nälöniškoil’ hiinil’ kes’kes , a süvou eci kudosed .
Pal’hou sijou süvou houg’ otab harvoin’ .
Voib kuukitada i randaspäi süvil’ randoil’ hiinil’ kes’kes , no ühtou ongeragou .
Kut minä kalatan
вепсский
Средневепсский западный
Как я ловлю рыбу
русский
[