Тексты
Вернуться к списку | редактировать | удалить | Создать новый | История изменений | Статистика | ? Помощь
Jelena Filina. Äipäiv
Jelena Filina
Äipäiv
вепсский
Младописьменный вепсский
Tünän
sobatan mujutan munid .Rindal Kuz’mič ištub .Hän kacub , midä minä tegen i zavodib johtutada vanhad .
Hänen küläs munitadihe munid Suren sobatan , kanman Äipäiväd .Lugetihe , ku mujutada munid Strašnijan pätničan , ka praznikan simvol teravas traviše i ei kaičeškande kanzad pahaspäi .Akad sanuiba : "Mäneškanzi haju Äipäivän munaspäi – varasta bedad pertiš ".
Minun uk kacub tarkašti nügüdläižid mujuainehid i johtutab :
– Olen sündunu vodel 1938.Elim mö gol’l’as , lujas gol’l’as .Söim sidä , midä Jumal da londuz andoiba .Maidol , voil , munil , kartohkal maksim nalogoid , a ičeleze jäiba vaiše muruid .Kaiken tal’ven mamoi kerazi munid .Kaik pertiš teziba , kus oli nece peitsija .Oleskeli , ištud näl’ghine , vacan krutib , meletad : "Oliži hüvä munan söda !"Ka ei , ei sand .Munad Äipäiväks – pühä azj !Kac , kanman Äipäiväd aigvoččed čapoiba pajud vai raidkor’t da päčil kuivatiba .A jäl’ges necenke kuivatud heinänke munid keitiba .Muniden muju oli muzav , mugoine-že , konz keitäd munid lukkorenke , vaiše völ čomemb .Munid mujutadihe kaikuččes pertiš erazvuiččikš , ken kut mahtoi .A meiden periš paksumba pajud ottihe necen azjan täht .Äipäivän homendesel mamoi tervehtoi meid viž last , risti i andoi mujutadud munan kaikuččele .Joga päivän mö kävelim muna kädes külädme .Kandoim sen muga , kuti nece om kalliž kivi .
Parahiman azjan lapsil oli turutada Äipäivän muna Pagoda-mägel .Kerazimoiš mö kaik ühtes i turutim üksjaižen munan mägelpäi .Tarkašti turutim , sikš ku tezim – ei ole enamba .Meiden tat oli kommunistan .Hän kel’di mamale valatada meid .Erasile lapsili mugoižen lahjan andoiba völ ristimamoi da ristitatoi , a meil oli üks’ muna ,sikš kaičim sidä .I mugoine sur’ ihastuz oli neciš ilospäi , tahasai muštan .
Ehtal , konz ištuim stolan taga jumalaižen al , kaikutte meišpäi söi ičeze munan .I se oli meiden täht miččen-se erilaižen , čudokahan , kaikid magukahamban .
Mujutan munid ičhižile da sebranikoile .Mujutan i kuvitelen prihašt munanke kädes i pakičen : "Prosti , meid , Jumal !Prosti meid ažlakudes , kitmatomudes , siš , miše mö em voigoi tedištada todut .Prosti i pästa meiden südäimihe ihastust Sinun eläbzoitusespäi ,miše eläda hüviš meliš i ei kadotada hüväd mel’t päividen kirus ,kut meiden tatad mahtoiba ".
Äipäiv
вепсский
Младописьменный вепсский
–
Елена Филина
Пасха
русский
–