Texts
Return to list | edit | delete | Create a new | history | Statistics | ? Help
Repo tа kontie
Repo tа kontie
Karelian Proper
Voknavolok
Oli
ennen ukko ta akka .Ukko pani verkkuo ta kalanpyyvyštä järveh ta läksi šiitä kaččomah verkkojah .Repo näki , jotta ukko šai äijän šiikua , ta hänellä hyvin himoittais kalua .Tai kekši keinon , ta rupei tiellä muate .
Ukko ajau tietä myöte kalakuorman kera ta näköy kuollehen revon tiellä .Hiän revon ottau , luou rejen piällä ta iče ajau ielläh .A repo ukon šelän takana i šyyti kalat tiellä ta viimekše iče hyppäi pois reještä .
No ukko ajau hyvilläh kotihis .Šanou akallah , jotta "tulehan nyt kaččomah , kun šain äijän kalua ta vielä revon ".
Akka mänöy – ka reki tyhjä : eikä kalua , eikä repuo .Ukko päivittelöy , jotta "oho moššennikka , min kekši "!
Repo šai kalat ta kanto kaikki meččäh , yhteh tukkuh .Kontie tulou , kyšyy :
– Mistä näin äîjän šait kalua ?
– Kа kun mie , kuomasen , mänin pappilan avannolla , ta paķkani kun oli , ta issuin yön häntä avannošša , niin näin äijän noššin kalua hännälläni .
Mäne vain šieki , nin šuat !
Kontie mäni , ta istuu häntä avannošša .Alkau kylmyä . Ka hiän liikahuttelou häntyä , kuulou : jo on tarttun kaloja , kun on jykie , vain vielä ỉstuu .
Pappilan piijat tullah huomenekšella vejellä ta nähäh kontie .Hyö korennoillah Iyyväh , lyyväh , a kontie ei piäše pakoh , kun on hännän jiätän kiini .Šiitä kumminki häntä katkesi , ta kontie piäsi pakoh .Šiitä šuate jäi kontie lyhythännäkše .
Repo tа kontie
Karelian Proper
Voknavolok
–
Лиса и медведь
Russian
–