Texts
Return to list | edit | delete | Create a new | history | Statistics | ? Help
Kuapeli-pohatteri
Kuapeli-pohatteri
Karelian Proper
Voknavolok
Kivijärveštä
Akonlahteh päin kymmenen virššan piäštä on Kuapelinnurmi .Še nurmi on šuanun nimeh Kuapeli-nimiseštä pohatterista .Kuapeli oli lappalaini šata junttari (šotajunttari ?), vain še oli hyvin väkövä .Ta se oli jumalahini .Vielä miun muamoni muisti , kun hyö käytih heinällä šiinä nurmešša , niin löyvettih šieltä oprasoja ta aivan šelvä pirtin ta kiukuan šija .
Kuapelie varattih kylissä .A iče Kuapeli oli mistä lienöy puannun ta šinne meččänurmeh oli luatin ičelläh elinšijan .Niskajärven miehie kun oli huuhan perošša šelkosešša (Niskajärvi on viisitoista virštua Kivijärveštä Šuvijärveh päin ), niin tämä Kuapeli tappo ne kaikki viisitoista mieštä .
Kuapelilla oli naini .Kun tämä Kuapeli tuli kotih , niin oli hätäykšissäh ičeki ta šano naisellah , jotta hiän šemmosen pahan työn luati šielä šelkosešša .Naini šuatto šanan kyläh , jotta kyläššä oltais varuillah , kun mečäššä on šemmoni rosvoniekka .Kuapeli kun keihähän kera hyppi šielä kylyä pitin (tottaš hiän oli šuanun vihie šiitä , jotta naini on šuattan šanan ).Ta luki :
- Šuatto , šaatana , šanan kyläh !Šuatto , šaatana , šanan kyläh !
Niin kyläššä jo arvattih , jotta kun ei huuhan perkajie kuulu , jotta še Kuapeli še on kuapin niitä , vain ei ruohittu aivan pienellä joukolla männä käsiksi .Vuokkiniemeššä piettih tuumua , kuin häntä lähtie tavottamah ta piätettih lähtie buitto heposie eččimäh Kuapelinnurmešta (kun moničči kylän heposet käytihki šielä ).Lähettih yhekšän mieštä heposih Kuapelih .Kyšyttih :
- Eikö ole näkyn tiälä heposie ?
Šanon oli še Kuapeli , jotta ei ole ta iče läksi šuattamah jovešta poikki kylän miehie .Iče istuutu peräh ta pani keihähän ta kirvehen huarojen välih .
Kylän miehet kuattih venehtä .Kun Kuapelilta keihäš ta kirveš veteh upottih , niin hyö šiitä yhekšän miehen šuatih hänet tappua šielä vieššä .Še joki kun ei ollun šuuri , niin iče piäštih pois .
Vorna on ollun kolmaš pohatteri .Vornankylä on Akonlahen kohalla Šuomen rajalla .
Kuapeli-pohatteri
Karelian Proper
Voknavolok
-
-
Kundozerova, Mariya
Богатырь Куапели
Russian
-
-