Texts
Return to list | edit | delete | Create a new | history | Statistics | ? Help
Kolme sisäreštä
Kolme sisäreštä
Karelian Proper
Voknavolok
Oli
ennein ukko ta akka .Heilä oli kolme tyttyö .Tytöt pyrittih vieristänä kuuntelomah vierissän akkua .Hyö lähettih kuuntelomah ta otettih lehmän nahka matkahaš .Istuuhuttih lehmän nahkalla , pantih huppu korvihis ta piirrettih veičellä nahkašta ympäri .Lehmän häntä kun oli šuorana ta šitä ei piirretty , niin vierissän akka i tuli ta alko vetyä hännäštä .Tytöt issutah eikä ruohita ottua huppuo piäštäh .Vierissän akka vei hiät pimieh korpeh hyvin loitoš .Šielä tytöt vašta otettih huppu korvistah .Kačotah , jotta "missä nyt olemma , kun on meččä ?Tänne nyt kuolemma "!
Kävelläh tytöt šielä tuon pitkyä , tämän lyhyttä .Ei ole rahvašta , ei taluo .Jo heilä on nälkä , ta vuattiet repieli , jotta kohta ollah alačči .Nouštih hyvin šuurella kivellä ta itetäh .
Alko kuuluo koiran haukku .Hyö – jotta "nyt šieltä tulou imehnisie , vain mitä meistä tulou , kun alačči olemma ".Koira tuli , alko haukkuo heitä šieltä kiven piältä .Čuarin poika oli mečällä , ta hiän tulou kaččomah , mitä koira haukkuu , pyššy on šuorana .Hyö aletah molie čuarin poikua , jotta "ole niin hyvä ta elä ammu meitä , emmä myö ole mitänä otukšie , kun ihmisie olemma ".Hyö aletah kyšyö , jotta "ketpä työ oletta "?Čuarin poika pyrittäy heitä matkahaš , vain hyö ei luvata lähtie niin alaččomana .Čuarin poika jakau piältäh vuatteitah heilä šuojakše ta lähtöy viemäh kotihis .Vei kyläh , ta vei leškiakalla ruokittavakše .Iče hiän lupasi hommata ruuvat ta vuattiet .
Tytöt ollah hyvin kaunehet , nuorin on kaikista kaunehin .Ne tullah niin ilosikse , jotta kaikki hirvie , kun šuahah vuatetta ta hyvyä ruokua .
Šilloin piti olla kaikkien hil’l’ua , konša leškiakka moli .Tytöt alettih pyrkie kylyh iltua istumah šillä aikua , jotta hiän šais rauhašša molie .Leškiakka lupai , ta tytöt mäntih kylyh .Čuarin poika tuli leškiakkah , kyšyy :
– Missä tytöt ollah ?
Akka šanou , jotta "kylyh mäntih , kun mie rupesin molimah , jottei häirittäis milma .Šielä sovietuijah ".
Mäni čuarin poika kuuntelomah kylyn ikkunan alla , jotta mitä tytöt paissah .Kuuntelou , niin tytöt ollah iänettä , ei virketäi mitä .Vanhin tyttö virkkau , jotta "paiska myö hoš mielitiettylöistä .Milma kun ottais čuarin ruuvankeittäjä naisekšeh , niin mie šaisin liinan kuijušta šotamiehillä vuattiet ".Keškimmäini tyttö šanou , jotta "mie kun šaisin šen pöyvälläkantajan , niin mie šaisin yheštä osranjyväštä šotamiehillä ruuvan ".Kolmaš šanou , jotta "miun kun ottais čuarin poika , niin mie šaisin kolme lašta : ensimmäisenä tytön , mill ois kiät kultaset kalvosista šuahe , jalat hopieset polvista , kuutamoiset kulmilla , otavaiset olkapäillä , tähet taivan harteilla ".
Čuarin poika kuuli i läksi pois .Šanou šiitä ruuvanlaittajalla , jotta "etkö šie ottais tuota vanhinta tyttyö naisekšeš , niin piemmä hiät ta tuomma tänne ".Keittäjä lupuau ottua .Toisella , pöytähkantajalla , tuaš šanou , jotta "ota keškimmäini tyttö , niin mie otan nuorimman ".Še lupai tuaš ottua .Niin hyö kaikki käytih ta otettih tytöt čuarih järeštäh , niin kun luvattih .
Kun alettih elyä šiinä , niin vanhemmat sisäret ollah vihasie nuorimmalla , kun še nyt piäsi čuarin pojalla .Čuarin poika läksi matkoilla ta naini jäi pakšukše .Sisäreh tuumatah šielä , jotta "nyt kun šuau kultasen lapšen , niin otamma pois ta penemma koiranpennun tilalla ".
Aika kulu , ta hiän šai tyttären .Sisäreh piätetäh nyt še tappua .Hypättih šitä muka hoitamah , tai vietih koiranpenikka , ta lapši otettih pois .Lapši pantih ripakkoih ta työnneltih lautapalasella jokeh .Lautapalasen kanto tuuli čuarin puutarhan hoitajan rantah .Tarhuri otti lapšen ičelläh , kun ei heilä ollun lašta .Čuarin pojalla sisäreh kirjutettih , jotta "naiseš šai koiranpenikan ".
Ollah-eletäh .Čuarin poika tulou kotih , ta aletah elyä kun ennenki , ei šen pahempua .Tuaš kun čuarin poika lähtöy , ka naini jiäyki pakšukše .Nyt hiän ajattelou tulovan šemmosen pojan , kuin tyttö šano .Tuaš tuli šuantiaika , niin sisäret tuaš otettih lapši , työnnettih jokeh lautapasella , ta hurtan pentu vietih tilah .Puutarhuri lapšen tuaš otti .Čuarin pojalla kirjutetah , jotta "nyt še šai hurtan pennun ".Tuli čuarin poika kotih .Jo häntä vähäsen šiännyttäis , vain ei virka i mitä .
Lähtöy čuarin poika kolmannen kerran matkoilla .Naini tuaš jiäy pakšukše .Tuaš – šama kauppa .Nyt pantih šijan poršaš tilalla .Kučuttih čuarin poika kaččomah , jotta nyt on poršaš .Čuarin poika läksi vihašša , jotta nyt hiän šen tappau .Tuli kotih ta kuto še naiseh alačči kivikuvelmah muantiehe päin .Rahvaški hävetäh alačointa , toiset sualiutuu [?].
Lapšet kaikki kašvetah puutarhurin luona .Puutarhuri laittau heilä huvikse šenmallisen tarhan , kun on čuarillaki .Puutarhan hoitaja vanheni ta kuoli .Lapšet jiätih yksinäh .Hyö ruštatah aina šitä puutarhuah , ta šiitä tulou niin kaunis ta hyvä , jotta jo toisešta valtakunnašta käyväh šitä kaččomah .
Pojat lähettih kerran mečällä ta tyttö jäi yksin kotih .Tuli muilta mailta vanha akka kaččomah hiän tarhua .
– Kun , – šanou , – šitä on niin kehuttu , niin milmaki himotti nähä .
Tyttö lähtöy näyttämäh .
– Ei tämä vielä ole , – šanou , – valmis , täštä puuttuu kolmie ainetta .
Tyttö kyšyy , jotta "mitä še puuttuu "?
– Ka šuihkuvua vettä , helisijyä puuta ta ičelaulavua lintuo .
Tyttö kyšyy , jotta "mistäpä myö ne šaisima "?
– Ne on , – šanou , – pohjoistunturien takana . Šielä on šemmoni tarha , jotta šielä on , kun voinetta šuaha .
Akka mäni pois , ta pojat tultih mečältä .Tyttö kerto , mitä akka oli šanon puutarhašta , mitä puuttuu .Pojat ollah hyvin innokkahie mänömäh .
Vanhin poika läksi käymäh .Ajau tuon pitkyä , tämän lyhyttä , ta tulou ukko vaštah , niin vanha jotta ei ni paissa šuata .Hiän keriččöy ukolta partua , ta ukko piäšöy pakajamah .Kyšyy :
– Onko tällä tiellä heläsijie puita ?
– On , – šanou ukko , – še ei olekana vuara loittona . Mie annan šiula lakin , ta kun ajat vuaran piällä , niin elä ota lakkie šilmiltäš , vaikka mitä karjehta kuullet .Šilloin piäšet , tai läššä on .
Hiän kun pani lakin šilmilläh ta läksi noušomah vuarua myöte , alettih karjuo :
– Kačo , mie olen šiun muamoš !Täššä on tuattoš !Nyt mänet tuleh , palat !
Ei ni keštän poika : vain livahutti lakkie šilmiltäh , tai muuttu kivekše .
Koissah kun vuotettih , ta kun ei tullun , niin toini poika läksi ajamah .Še tuaš näki ukon , otti lakin , kačahti – tai muuttu kivekše .
Tyttö kun jäi yksinäh , niin ajatteli , jotta "mitäpä mieki täššä yksin ?Lähen mieki eččimäh ".Tuli ukon luo ta pesi šen , keričči parran ta šanou , jotta "juohata nyt hyväsistä , mitein mie piäšen "!Ukko antau tuaš lakin , ta tyttö lähtöy .Niin tyttö läksi ielläh , pani lakin šilmilläh ta noušou vuarah .Vaikka ois kuin karjuttu , niin tyttö ei ottan lakkie šilmiltäh , ta niin piäsi vuaran piällä .Hänellä annetah šieltä helisijän puun okša , šuihkuovua vettä pullošša ta laulava lintu .Tuli vuarah , missä velleh oltih kivenä , ta hänellä kun oli elävyä vettä , niin virotti velleh .Yheššä šiitä mäntih kaikki kotih .
Šiitä pantih lintu laulamah , šuihkuva vesi ta helisijä puu .No tietyšti , aina vain enämpi käypi rahvašta kaččomašša .
Ei tyttö eikä pojat tiijetä , jotta hyö ollah čuarin pojan lapšie .Hyö toivotah olovan puutarhurin lapšie .Tyttö šanou laulavalla linnulla , jotta "mitä myö čuarin pojalla šyötämmä , kun tulou puutarhua kaččomah : eihän meilä ole niin hyvyä "?Lintu šanou , jotta "käy kaupašta haulie , ta pane monta hunttua niitä kukokše .Hoikkani vehnäkuori vain pane piällä ".
Tyttö luati kukon haulista ta kyšyy :
– Mitäpä šiihi muuta pannah ?
– Ei mitänä muuta , kun kukko luuvalla ta pöytäveičči reunah .
Tyttö hätäytyy jotta mitäpä še šiitä tulou .Lintu šanou , jotta "mie vaštuan ".
Čuarin poika tuli vierahikše , kaččeli tarhua monta tuntie , käveli nälkähäš šuahe , ta tyttö kuččuu hänet šiitä kamarih šyömäh .Čuarin poika istuutuu pöytäh ta leikkasi veičellä kukon poikki .Haulit ni pirahettih ympäri stolua .Čuarin poika šiänty ta kyšyy :
– Mintäh tämmösellä valehukšella milma šyötät ?
Laulava lintu rupei šanomah , jotta "et šiekänä , čuarin poika , käytä oikein aseitaš : kerran pantih šiula lapšekše koiranpentu , toisen kerran hurtanpentu , kolmaš kerta šijanporšaš .A šiula oli lapšet – kiät kultaset , jalat hopieset , ta kaikki niin , kuin naiseš šiula oli luvannun šuaha .Vihamiehet kun vajehettih , niin šie naiseš panit alačči kivikuvelmah , jotta koko kaupunki häpiey .Nämä on täššä šiun lapšet , puutarhuri kašvatti ".
Čuarin poika ottau lapšet , piäštäy naiseh pois ta alkau elyä elmetellä .
Kolme sisäreštä
Karelian Proper
Voknavolok
–
–
–
–
–
Три сестры
Russian
–
–
–
–
–