Texts
Return to list | edit | delete | Create a new | history | Statistics | ? Help
Hoi, hurit!
Hoi, hurit!
Karelian Proper
Padany
Оli en’n’en
akka , akalla oli poiga da tytär .Poiga huomukšella lähtöy , en tiijä , mihi roadoh meččäh , a moamo da tytär d’eähäh kodih .Moamo päčin panou lämbiemäh , päčissä d’o ollah yhet keglehyöt , leibät voaliu , tytöllä šanou nimie myöteh (en muišša , mi oli tytöllä nimi ):
– Mäne kašša rannašša hau .
Tyttö ku mäni hauo kaštamah , a därvi eu levie , ga därvestä poikki huhutah mužikat :
– Hoi , tyttö , siä ku mennet därven toižella puolella miehellä , dai enzi kerdoa därvestä poikki proidiešša mänet vedeh .
Tyttö itušša perttih .Perttih tulou , ga moamoh kyzyy :
– Midä itet ?
– Mužikat huhutah , što ku mänet därvestä poikki kellä ni gi miehellä , ni enzi kerdoa därvestä poikki proidiešša mänet vedeh .
Moamo tarttuh hänellä kaglah : ga itkömäh , ga itkömäh , ga itkömäh .Päivä d’o ildapuolessa , vielä moamo da tytär itetäh .Leibät d’o stolalla reämissyttih , päčči viluštu .Hyö van yksi yhen kaglašša riputah da itetäh .D’o poiga tuli kodih , kyzyy :
– Midä kaglakkah itettä šezissä ?
Hyö sanottih – sidä da sidä itemmä .Poiga sanou da peädä lekuttau :
– No hurit , no hurit !Pidäy lähtie , engo voi vielä mistä ni gi hurie löydeä .
Mäni , mäni , ga mužikka kylyn ku van on kylvenyn , humalašša van missä ollou , koadeida ei voi d’algah panna , unohti kui koadiet pannah d’algah .Koadiet on ažettanun kahen seibähän peähäh opuškapuolešta , seärykšet riputah alašpäin .Sidä d’uoksou , d’uoksou – hypähtäy koadeiheh , no ku ei aigauuttoa d’algah .Poiga sanou :
– Kačoi , yhen hurin ni löyin .
Poiga kyzyy mužikalda :
– Midä siä roat ?
Heän sanou :
– Unohin kuin koadeida d’algah pannah , ni koadeida d’algah panen .
– Hoi , huri , vet ei näin pandoa koadeida d’algah .
Andanet šoan rubl’oa , ga miä opaššan , kui pidäy koadiet d’algah panna .
– Anan , van siä šoata koadiet d’algah .
Poiga koadiet d’algah pani , šoan rubl’oa otti da ni läksi ielläh , a mužikka vielä sil’mät risti , ku koadiet šoadih d’algah .
Poiga mäni , mäni , mäni , ga kylyn peällä lehmeä noššetah .Kylyn peällä , katoksella on kazvan heineä , ni seniidä heinie syömän noššetah lehmeä .Poiga sanou :
– Kačo , ei kai hurit oldu sielä , on vielä i teälä hurie .Midä työ roatta ?
– Ka lehmeä noššamma katoksella heiniä syömäh .
– Hoi , hurit , niittäkkeä libo nyhikkeä heinät , a elgeä lehmeä sin noššakkoa .
Hyö niin ni roattih , pojalla šada rubl’oa annettih , poiga läksi ielläh .Mäni , ga kodie srojitah , ni kuhu rodieu pitembi hirzi , ni sidä pal’l’alla riehitäh , štobi lyhenis , a kuhu lienöy lyhemmäksi , ni siidä venytetäh – ei roattoa , a kigletäh .Poiga sanou :
– Elgiä senin roakkoa , a roakkoa näin : ku vuidiu pitemmäksi hirzi , ni se pilikkeä , a ku vuidiu lyhyemmäksi , ni d’atokkoa .
Pojalla toas annettih šada rubl’oa , poiga otti d’engat da läksi ielläh .
Matkai , matkai , matkai , kačou – ga hurstiloin kera d’uokšennellah rahvaš pihalda perttih , pihalda perttih , ielläh-därelläh .Poiga tuli , sanou :
– Midä työ roatta ?
– Ka vasta ku srojima pertin uuen , ni ku eu päiveä pertissä .
Ni pertih päiveä kannamma .
Poiga duumaiččou : "Ka dai teälä on hurie ".Sanou :
– Ongo teilä ikkunat pertissä ?
– Ka eu , velli , ni midä .
– Ni ottakkoa pila da pilakkoa loukot seinih , rakennakkoa , oššakkoa st’oklat , loajikkoa roamat , dai päiveä tulou perttih kandamatta .
– Slava tebe , hospodi , poiga-rukkoa n’euvonnalda !
Annettih šada rubl’oa , da poiga otti i läksi ielläh .Matkai , matkai , matkai , ga toas uuešša pertissä viuhketäh rahvas hurstiloin kera – pertistä pihalla hurštiloilla šauda kannetah .Poiga kyzyy :
– Midä roatta ?
– Ole siä , ku vaštanikkoš koin srojima , ni ku pertti täyzi on šauda : ni ei šoa ni silmie avata .
Ni pertistä pihalla hurštiloilla šauda kannamma .
– Ka hoi , hurit , ongo teilä hoti truba ?
– Ei , velli , ole ni midä .
– No ku ei ole truboa , ni kaivakkoa van loukko lageh da loajikkoa truba , ni enämbi šauda hurštiloilla ei pie kandoa .
– Passibo da passibo neuolda .
Toas šada rubl’oa annettih , poiga otti , läksi .Puolen tuhatta d’engoa sai , ei vet midä i männyn .Poiga duumaiččou : "Ei oldoa yhet miän hurit , on vielä i muualla hurie ".
Sihi i starina loppieti .
Hoi, hurit!
Karelian Proper
Padany
–
–
–
–
–
–
–
–
–
–
–
–
–
Эх, глупцы!
Russian
–
–
–
–
–
–
–
–
–
–
–
–
–