Texts
Return to list | edit | delete | Create a new | history | Statistics | ? Help
Rosvo-Kliimon starina
Rosvo-Kliimon starina
Karelian Proper
Uhta
Оli ennen
ukko ta akka , ta heilä oli poika , poika oli mykkä .А , pojalla on Kliimo nimi .Та hyö kaikella luatuh kuotellah , jotta poika rupieis pakajamah .A ei rupie .Akka šanou ukollah , jotta "mäne šie käyttele mečäššä , eikö rupie šielä pakajamah ".Hiän šielä käytti mečäššä .Tultih kujan šuuhu ; šielä оn šuuri vanha honka .
– Tuatto , mie kun kašvan šuurekši , niin tämän honkan kuan šiun piällä , anna kuolet šiih , – šen šano poika , ei muuta enämpi ni paissut .
Akka šanou ukolla , jotta "vie tämä poika rosvojen joukkoh , a kun kuatau šiula honkan piällä , niin šiih kuolet ".Šiitä tuatto vei šen rosvojen joukkoh .Še otettih hyvin vaštah .
Tai ilta kun tuli , tai lähettih rosvoloiksi .Mäntih pohatan talon ulkoaittah , noššettin šalmo kankiloilla .
– No , Kliimo , mänehän nyt šyytämäh , – še oli nuori rosvo , – opašteliutumah .
No Kliimo pistäyty aittah ta šieltä šyyti , šyyti kaikki mitä oli , yksi liinakukla jäi .Häneltä kyšytäh :
– Onko vielä mitä ?
Kliimo šanou :
– Ei ole ni mitä , yksi liinakukla jäi .
Hyö kannettih kaikki pois , šalmo pantih kiinni , a Kliimo jäi aittah .A hyö juoštih ikkunan alla , karjuttih :
– Hoi , rosvot on aitašša !
Šieltä hypättih talonväki juokšomah , a rosvo-Kliimo kun kuuli – nyt tullah !– hiän viritti liinakuklan palamah , a iče rupesi ovikorvah .
A hyö kun hypättih šammuttamah , šilloin rosvo-Kliimo käsistä aličči pakoh .Та hiän juokšiki šinne rosvon majalla .Kun oli pimie , nin häntä ei ni nähty .
– Oho työ , stukoit-stakoit , mintäh miut jättijä ?
– Ka nuorta rosvuo opaššamma .
Та tuaš tois iltana ni lähetäh .Männäh toisen talon aittah .Та šanotah :
– Kliimo , mäne i tuaš !
Hiän šanou :
– Ei še Kliimo kaikičči lähe , nyt on toisen vuoro .
Toini mieš i läksi , kun šalmo noššettih .No tai kyšytäh :
– Joko šie šyyvit kaikki ?– šanotah .
– No tulehan nyt pois !
Таi pantih šalmo kiinni .Kun hiän rupei tulomah , hiän šiih ličkautu ta kuoli .Та hyö näpättih niitä šivotoja šelkäh ta lähettih juokšomah .Kliimo šanou šiitä , jotta ei hiän yhtä joukošta jätä : "mie lähen käyn pois ".Hiän mäni šinne , nošti šalmon , otti pois miehen ta šeläššäh kantau ruumista .Та vei meččäh ta pani puuta vaššen šeisomah .Šiitä mäni šinne rosvon majalla .Yön ta päivän šyötih , illalla tuaš lähettih .Mäntih čuarin karšinah , noššettih šalmo .Čuarilla on karšinašša šivotat .No ta Kliimo šinne čuarin karšinah läksi šivotoja šyytämäh .Kyšytäh , jotta "vieläkö on mitä "?
– Ei enämpiä ole kuin čuarin ta čarovnan venčävuattiet .
Та šilloin pissettih kiinni šeinä ta hiän jäi karšinah , rosvo-Kliimo .Hiän tuumaiččou , miten hiän piäšöy pois tiältä , jotta ei šuatais kiinni .Kuuntelou , kun čuarissa šuoritah heinällä piijat ta kasakat .Hiän šuorisi , pani čuarin vuattiet alla , čarovnan vuattiet piällä .Noušou karšinašta , šanou :
– Hospoti pomilui , tämmösenä pruasniekkana šuorietta heinällä , mitä teilä jumala antau !
A hiän iče pihalla hivuttautuu .Ne arvellah , jotta kummitteliutu šillä keinoin , karšinašta nousi .Čuari šiitä käški noštua koko kaupunkilla ruškiet plakut , jotta nyt on pruasniekka .Šiinä , kačo , čuari petty !
Šiinä kävelöy toisenä piänä rosvo-Kliimo čuarin pihalla .Čuari kaččou tai pisti piän ikkunašta .
– Mitä kävelet ?
– šanou .
– Ka kävelen työtä-ruokua eččimäššä .
– No tulehan , – šanou , – pirttih , niin on työtä-ruokua .
Šiitä tuli pirttih , čuari šanou :
– Äšen olet rosvo-Kliimo , kun šuanet miulta härän varaštua liäväštä .
Še poika šiitä otti illalla ta šuoriutu čuarin vuatteih pimieššä , tuaš liinakuklan i otti šelkähäš .A čuarỉ pani härän liäväh ta pani kolme saltattua vahtih .A hiän mänöy niillä saltatoilla šanou :
– Antakkua miula härkä , mie panen tämän liinakuklan liäväh , hiän kuitenki teiltä šuau , a miulta ei šua .
Ne i annetah , kun on čuarin vuatteissa (arvellah , jotta čuari še on ).
Čuari tuli huomenekšella , kyšyy :
– Onko käynyn rosvo-Kliimo ?
– Ei ole käynyn , – šanotah , – šie kun toit tuon liinakuklan , nin šielä on – ei ole käynyn rosvo-Kliimo .
Čuari pisti piäh liäväh , kaččou : šielä on liinakukla parrešša .Otti piššualin saltatoilta ta alko lyyvä niitä saltattoja , jotta "työki oletta yheššä rosvo-Kliimon kera , milma petättä ".
A tuaš toisena päivänä kävelöy rosvo-Kliimo čuarin ikkunan alla .Čuari tuaš pisti piän ikkunah :
– Mitä kellisteliyvyt , kun et tule pirttih ?
No ta tuaš tuli poika pirttih , čuari šanou :
– Äšen rosvo-Kliimo olet , još voit varaštua miulta šyöttilähän orihin tallista .
A čuari pani kuuši saltattua vahtih (ei pannun niitä vanhoja , pani uuvet ).A rosvo-Kliimo kokosi kiššua värčin .Ta šuorisi čuarin vuatteih ta mäni šinne .Hiän mäni šinne , šanou :
– Slušivoit , anna kun mie otan šen šyöttilähän , lašemma nämä kiššat šinnе , anna hiän keriäy näitä kiššoja .
Hyö annettih .Čuari tuli huomenekšella , kyšyy :
– Onko käynyn rosvo-Kliimo ?
– Ei ole käynyn , šie kun piäššit nuo kiššat tuonne , niin tuola nuo vielä vilšketäh .
Hiän ni kačahti , šanou :
– No jo še vei , stukoi-stakoi , – ta tuaš niitä piššalin perällä piekšäy .
A šiitä tuaš mäni kolmantena piänä rosvo-Kliimo , kävelöy čuarin ikkunojen alla .Čuari pisti piäh ikkunašta , šanou :
– Äšen olet rosvo-Kliimo , kun šuanet rahalippahan miun naisen elta , šormukšet šormista , korvarenkahat korvista .
A ilta kun tuli , hämärty , Kliimo pani ne tuaš čuarin vuattehet piälläh .Nyt hiän mäni kävi šen pokoiniekan , min pani puuta vaššen pistyh , šeläššä kanto .A rahalipaš on peräššä lattiella , čuarin naini istuu rahalippahalla ta čuari naisellah yšäššä .Руššу on šuorana ovie kohti , jotta kun tulou še rosvo-Kliimo , niin šamašša ampuo .A rosvo-Kliimo kun tuli , lonkasi ovie ta ašetti šen pokoiniekan oviloukošta kaččomah .Iče mäni peittoh šinčin peräh .A še pokoiniekka kun kaččou oviloukošta – toivou , jotta še on rosvo-Kliimo , tai ampuo ločkasi .Še kun ampu , niin še i kolahti še ruuimis – čuari toivo , jotta nyt še kuoli še rosvo-Kliimo .Čuari šano :
– Nyt milma šyytetäh , kun miehen tapoin , lähen vien peittoh .
A čuari kun proiti pihalla , rosvo-Kliimo tuli pirttih naisen luo .Hänellä kun on čuarin vuattiet piällä , niin naini arvelou , jotta še on čuari .
– Anna , – šanou , – rutto še rahalipaš , šormukšet ta korvarenkahat , moušet ei ni ollut še rosvo-Kliimo , niin vien pois : šiulta hiän šuau , a miulta ei šua .
Та hiän mäni pihalla , liputtau , jotta "nyt jäit näistä "!Čarovna juokšou jälkeh , jotta "anna hot’ rahua vähäsen , nyt milma čuari kiruou , kun annoin kaikki ".Hiän nošti kolme kertua kultarahua : "No mänehän nyt ".
Še proiti .A pappi alko muka nakrua čuarie , kun rupesi rosvo-Kliimo petettäväkši .No ta rosvo-Kliimo i šai kuulla , jotta pappi čuarie nakrau .Rosvo-Kliimo otti ta luajitti hopiešauvah .Ta mäni kirikköh , šuorisi čarovnan vuatteih : šiinä čillit heläjäy , hopiet läikkyy , jotta kun pimieh huoneheh mänöy , niin kaikki valon antau .Tai rahvaš kaččou – kenhän tuo tuli , kahapäin väki jakautuu , hänellä tietä annetah .Hän mäni šuorah kriiloššulla , alko kallehie molitvoja šielä jorhata .Pappi kyšyy , jotta "ken šie olet "?Šanou :
– Mie olen taivahašta , šilma kučuttih šinne pokuajimah .
Pappi kun hätäyty , jotta "millä mie šinne piäšen "?Še rosvo-Kliimo šanou :
– Kyllä šie piäšet , älä varaja .Lähemmä vain pihalla , mie noššan .
Pappi läksi pihalla , kaikilla rahvahalla prostiutuu :
– Antakkua šynnit antehekši , još kellä pahua ruavoin .
Rahvahalla kumartau , rahvaš hänellä vaštah .A čuariki šielä oli kiriköššä , hyväšteli häntä .No hiän šiitä kun panou papin hopijašauvan piäh istumah , kun pappi vareutu , kun rupesi [Kliimo ] noštamah šitä šauvua , rapesi [pappi ] värisemäh tai pieri .Ätkäsi šen muah papin .
– Nyt šie mänet läpi muaemäštä , kun taivahan männeššä pieret , – ta šitä lyöy šauvalla .
Šiitä hiän nuakličči hänet kirikön šeinäh hiemoista ta pukšunlahkehista ta heittäy šauvan reunah , jotta ken matkuau , niin pappie lyyvä .A šiitä šen papin maatuška šai kuulla , jotta pappi riečkottau kirikön šeinäššä , mäni ta piäšti pois papin .
Papilla tulou čuari vaštah šiitä .Čuari šanou :
– Šie nakroit milma , jotta petti rosvo-Kliimo , ka pettipähän i šiut .
Pappi šanou :
– Elä , veikkon , virka , niin on huikie , jotta en voi rahvahan šilmih kaččuo .
Та šen pivuš i starina .
Kullan lehti kuulijalla ,
lemmen lehti laulajalla ,
a ken ei liene kuullut –
kuurnisnieklat korvih .
Rosvo-Kliimon starina
Karelian Proper
Uhta
–
–
–
–
–
–
–
–
–
–
–
–
–
–
–
–
–
–
–
–
–
–
Cказка о воре Клиймо
Russian
–
–
–
–
–
–
–
–
–
–
–
–
–
–
–
–
–
–
–
–
–
–